Andlaust blogg

Ekki alveg með bloggandann yfir mér svífandi. Ætla samt aðeins að láta heyra í mér. Setti inn myndir hjá strákunum og ritaði smá hjá Henrik.

Ég held að þessi sumarhelgi með hlýju veðri og sól hafi sett innra úrið úr skorðum. Eiginlega var ég komin í haustgírinn. Hann er þægilegur, hvað er eiginlega orðið yfir "melancholy" á íslensku? Mér líður þannig á haustin. Er það að vera "melló" á slæmri íslensku? Þegar þokan hangir yfir og jafnvel rigningar finn ég innri frið. Að vísu elska ég eitthvað við allar árstíðir. Sól, sumar, strönd/sundlaugar á sumrin, borða úti osfrv.
Vetursins sakna ég hér, það kemur örsjaldan snjór og því er veturinn eina árstíðin sem ég fíla ekki alveg hér. Vorið er yndislegt, allt vaknar til lífsins eftir veturinn. Það má sjá jákvætt við hverja árstíð, það finnst mér.

Haustleg mynd (ekki eftir mig)

Eigið góða viku. Ég þarf til tannsa á morgun. Vona að Henrik opni munninn líka. Bíð svo eftir fréttum af nýjasta fjölskyldumeðlimunum. Sultan er sett 2.9.

Góða nótt á eftir

Jarðarför

Í dag er jarðarförin hans afa. Megi hann hvíla í friði. Hugur minn er hjá þér amma.

Góða helgi

Pirringur

Vá hvað ég er pirruð í dag, í gær reyndar líka. Hef allt á hornum mér. Allt sem strákarnir gera fer í mig, þeim tekst að rústa stofunni meðan að ég spjalla í "smá stund" við vinkonu á msn. Þvílík tillitsleysi hjá þessum ungu drengjum........

Ég sendi þá inn í herbergi núna. Þeir voru búnir að stúta fjórum jógúrtdollum, smá af innihaldinu fór á sófann (er sem betur fer með leður), dollurnar lágu hér, ekkert verið að fara með þær í ruslið, ó nei. Jú, Henrik fór með eina þeirra.

Ég verð að fara að aga þessa gemlinga betur, hætta að leyfa þeim að borða inni í stofu (og hætta því þar með sjálf líka), leyfa bara smá stund í tölvunni í einu, leika meira við þá (allskonar spil) eða drullast til að fara meira með þá út. Allt mér að kenna......

Þetta kom allt beint frá hjartanu. Það eru ekki allir dagar "Friede, Freude, Eierkuchen" (friður, ánægja og eggjakaka). Ætli allir þekki ekki svona daga, seinniparta myndi ég segja. Var rosa dugleg og hjólaði með Julian í bæinn áður en við sóttum svo Henrik í leikskólann, á hjólum auðvitað.
Ég held bara svei mér þá að ég sé sorgmædd yfir því að vera ekki heima núna. Nokkuð viss um það bara.

Strákarnir eru sáttir inni í herbergi, búnir að rústa fína kubbahúsinu sem ég myndaði en Henrik bað um það. Ætla að byggja eitthvað nýtt, eitthvað stórkostlegt. Þeir eru algerir byggingahönnuðir, sérstaklega Julian. Mynd af húsinu og brosi gemlinganna fylgir hér með. Þegar öllu er á botninn hvolft eru þeir yndislegir og ég er stolt af strákunum mínum.


Yndisástandið varði ekki lengi við.........Henrik er kominn fram. Julian vill víst ráða hvernig nýja húsið á að vera. Gott mál, þeir geta ekki verið saman daginn út og inn.

Hafið það gott elskurnar og njótið lífsins, dag eftir dag eftir dag :)

PS. Afsakið línurnar undir fyrrihlutanum ef músin fer yfir textann. Færði myndina og þetta kom svona.

Heimþrá

Ég viðurkenni hér með að ég fékk heimþrá í gær. Réttara sagt, (heim)þrá í íslenskan mat..... Í gær var sýndur þáttur með þekktum bandarískum kokki, Andrew Zimmern. Hann fer á milli landa og kynnir sér og áhorfendum þjóðlegan mat. Kannski voru þessir þættir sýndir á Fróni??

Allavega var 1. þáttur frá Íslandi. Herra Zimmern fór fyrst og smakkaði hákarl, svo til Vestmannaeyja og borðaði grillaðan lunda, þar næst (minnir mig) í gufurekið eldhús á veitingastað (náði ekki nafninu: Kjöt og .....). Þar næst skrapp hann á bóndabæ og bjó til blóðmör, mmmmm. Síðan var búið til skyr og rjómi beint úr kúnni á öðrum bóndabæ og hann endaði hjá Sigga Hall og borðaði saltfisk. Fór auðvitað líka í Bláa Lónið. Já og hann fékk sér líka pylsu á Bæjarins bestu.

Já, ég fékk vatn í munninn við að horfa á þennan þátt. Hr. Zimmern var alltaf að taka það fram hvað ísl. eldhúsið væri einfalt og "frumlegt". Mikið notað beint úr náttúrunni. Ég er kannski gamaldags en mér finndist synd ef þessi matreiðsla myndi leggjast niður. T.d. að taka slátur. Vilja krakkar í dag slátur? Ég bara spyr eins og bjálfi utan úr heim...........

Kveðja úr 18° hita.

Handbolti

Sit hér í hálfleik eftir að hafa horft á leikinn á eurovisionsport.tv. Reddaði deginum þessi útsending því að hér virtust úrslit körfuboltans vera mikilvægari heldur en handboltinn! Sem betur fer er nú karfan búin en ég efast um að hér verði seinni hálfleikur sýndur beinn heldur frá byrjun. Sjáum til. Reyndar er þessi útsending á netinu aðeins á eftir lýsingunni á RUV en það er alltaf skemmtilegra að horfa heldur en bara heyra. Finnst mér allavega.

Jú, þeir ætla að sýna seinni hálfleik beint á eurosport, frá byrjun á ZDF. Best að setjast fyrir framan sjónvarpið. Þori ekki að spá um leikslok...........

Elsku afi

Hann afi Jón dó í morgun. Hjálmar bróðir var hjá honum og hringdi strax í mig. Það er alltaf sárt að missa ástvin en eins og þegar afi Jósteinn og amma Þórey dóu finnst mér ég máttlaus svona langt í burtu, allt svo óraunverulegt. Ég veit að ég á ekki eftir að hitta afa aftur en minningin lifir. Ég veit ekki hvað ég skal segja meira.

Elsku amma, mínar innilegustu samúðarkveðjur. Þú ert yndisleg.

Elsku allir, bið um kærar kveðjur til ykkar.

Hvað er vont og hvað er ekki vont?

Keypti mér tryllitæki í morgun og prófaði þegar ég kom heim. Ég keypti mér "epilator" (fann ekkert íslenskt orð yfir trylltækið). Var búin að hugsa mig lengi um áður en ég keypti tækið, spyrja aðrar konur hvernig þeim líkaði osfrv. Svarið sem ég fékk frá þessum konum var "nei, nei, þetta er ekkert vont".........EKKERT VONT. Ég hlýt að vera alger "chicken". Mér fannst þetta allavega vont.

Sama segir um fæðingu. Margar (flestar) sögðu við mig "þetta er ekkert svo voðalega vont"......... EKKERT VOÐALEGA VONT. Fyrir mig voru þetta hræðilegustu verkir sem ég hef upplifað. Okey, launin voru yndislegt EN ég vildi samt að einhver hefði þorað að segja mér að það væri (mjög sennilega) vont að upplifa hríðir. Ég hefði samt ákveðið að eignast barn. Systir Seydi var nú viðstödd fæðingu Julian og sá hvað ég kvaldist en hún er nú að fara eignast sitt annað barn í september. Ég ætla allavega að segja við þær sem spyrja mig hvernig það sé að eignast barn "mér fannst það hrikalega VONT". Sjálfsagt hafa einhverjar ykkar upplifað stutta og "auðvelda" fæðingu en ekki ég!

Eftir fæðingu Julian óskaði ég mér líka að einhver hefði upplýst mig meira um það hvað gerist EFTIR fæðingu. Hvernig pjallan er og allt þar í kring! Okey, mismunandi eftir konum en það hefði mátt segja mér eitthvað smá allavega ;) Hvað gæti gerst. Ef ég ætti dóttur myndi ég upplýsa hana um þetta fyrir fæðingu. Ekkert segja neinar horror sögur en upplýsa svo ekkert komi á óvart. Virðist vera eitthvað voðalegt feimnismál. Eins og þetta sé eitthvað nýtt!

Það er hins vegar eitt sem ég óttast: "Brazilian Wax". Það ætla ég aaaaaaaaaldrei að fara í. Nei, ég bara myndi ekki geta glennt mig framan í einhverja fína dömu og sársaukinn........nei nei nei. Þið sem farið í svona hljótið að vera með lágan sársaukaþröskuld. Á þýsku er til orðatiltæki "Wer schön sein will, muss leiden" Þýðir svo mikið sem "sá sem vill vera fagur, verður að þjást". Þá vil ég frekar vera bara ljót..........ha ha ha.

Sólarkveðja

Klikkaði

Ansinn, ég klikkaði á bloggi í gær. En það er fjör í ummælunum svo að þetta hlýtur að vera í lagi :)

Kominn mánudagur og eitthvað klikkaði í skólanum í dag. Ég fór ekkert í vinnuna því að ég þurfti til kvennsa í reglulega hálf árs skoðun. Ætlaði svo að sækja Julian kl. 11:30 í skólann. Ég sé hvað hann kemur hlaupandi út, skólatöskulaus og fer að leika sér......ég hugsa "hmmm, er ég orðin rugluð eða hvað?" Sá samt aðra foreldra bíða. Við skiljum ekkert í neinu þegar ein stelpan segir við mömmu sína að leikfimin sé eftir! Við fórum því og töluðum við kennarann og þá hafði gleymst einn tími hjá henni. Þau eru s.s. búin kl. 12:30. Ég spurðu Julian hvort hann vildi fara heim eða í leikfimi og auðvitað vildi hann fara í sportið.

Ég er því eiginlega að fara að leggja af stað til að ná í hann. Ákvað samt að skrifa nokkur orð í tilefni nýrrar vinnuviku.
Sé að Völsungsstelpur hafa unnið Hött í gær. Frábært.
Ekkert að gerast hér svo sem. Fórum á flóamarkað í gær, keyptum ekkert merkilegt. Aðallega nammi.
Ég á eftir að blogga smá um ferðalagið, sérstaklega Serbíu. Kemur við tækifæri.

Eigið góða viku. Mamma, þú lætur mig vita þegar pakkinn kemur.

Föstudagsblogg

Mér finnst ég þurfa að blogga smá svona á föstudegi. Fyrstu viku frumburðarins í skólanum lokið og enn er voða gaman í skólanum (vona að það haldist sem lengst). Kallinn búinn að finna "vin" sem situr við borðið hans og heitir Kevin. Hann á sko ekki í vandræðum með það að kynnast fólki, svo mikið er víst. M.a.s. Florian vinur hans sagði við mömmu sína að Julian væri búinn að vera þarna í 1 dag og hann þekkti strax krakka! That´s my son.
Ég efast um að sá yngri verði svona glaður að byrja í skóla, margt miklu flóknara með hann. Var að sjá í fréttum að "vinstrihandarskrifarar" væru og hefðu verið miklir menn/konur. Að heili þessa "öfugra" myndi virka betur þar sem þeir noti bæði heilahvelfin meira en við þessi rétthentu.........ég held að Henrik sé þessvegna svona flókinn. Nei, nei, grín á föstudegi. Hann er bara þrjóskur eins og andsk..... samt voða ljúfur og góður. Hann var að taka smá rimmu rétt áðan, þessvegna skrifa ég þetta. Kemur bara beint í æði til ykkar, ekki amalegt.

En hann allavega vildi bara alls ekki horfa á einhvern disk sem Julian er núna að horfa á. Einni mínútu fyrr hafði ég spurt hvort hann vildi horfa á þennan disk og hann hrópar "jáááááá" Voða gaman. Mamma fer inn og ætlar að setja diskinn í en þá er drengurinn búinn að skipta um skoðun. Vildi frekar horfa á það sama og í gær........Og það var gargað og grenjað. Núna situr hann hér og skoða bók um hákarla. Skjótt skipast veður í lofti. Búið til fyrir Henrik minn.

Ákvað að vera bara heima í dag. Var með strákana á ferðinni í fyrradag. Skruppum til Goch (við holl. landamærin) og keyptum bíl. Skruppum aðeins yfir landamærin og keyptum Pickwick te ofl. Í gær löbbuðum við í bókasafnið og bæinn. Nóg komið af flandri. Veðrið er að vísu fínt, spáð var þrumum og eldingum. Sólin skín nú bara enn og ekkert bólar á óveðurskýjum. Þoli ekki þegar spáð er svona hrikalega rangt.

ÓL gengur hér daginn út og inn. Ég missti hins vegar af hörkuspennandi leik Íslands og Þjóðverja í handbolta. Vissi bara ekki af honum. Svona fylgist ég með! Þjóðverjar eru í 3ja sæti á verðlaunalistanum, enn. Ekki held ég að þeir haldi þessu sæti. Sá Pólverjann vinna fyrsta gullið í kúluvarpi áðan. Fyrsta gullið á þessum fuglshreiðursleikvangi. Fullt af frjálsum á næstunni. Ég mun reyna að horfa eins mikið og ég mögulega get. Fer kannski á flóamarkað í Dorsten á sunnudaginn. Vantar líka nýja þvottavél. Spurning hvort að kallinn komi nógu snemma til að fara í búðina í kvöld. Efast um það. Förum þá bara á morgun.

Orðið alltof langt hjá mér. Nennir einhver að lesa þessa þvælu?
Eigið góða helgi kæru vinir og ættingjar.

Spurning um........

.....að reyna að hnipra niður nokkur orð. Andinn er ekki alveg kominn en ég sit allavega hér í ró og næði meðan að strákarnir horfa á Pokemon.

Líka spurning hvort ég skrifi eitthvað meira um ferðalagið eða bara um daginn og veginn????
Get allavega skrifað um það að 28. júlí keyrt var á okkur í Antalya. Ekkert alvarlegt, hinn bíllinn er allur rispaður á hliðinni en hann straukst ansi vel við stuðarann okkar að aftan. Var ekki alveg að vanda sig að beygja inn í þrönga götuna, ekkert bólaði á stefnuljósi heldur (ég held að bílar í Tyrklandi séu yfir höfuð ekki með stefnusljós!) og þegar Seydi sagðist nú ná í lögguna því að þetta væri nú skaði á bílnum flippaði gaurinn út!! Ætlaði bara að ráðast á Seydi, smá trítill með tvær "gangstéttarsvölur" (lesist vændiskonur) í bílnum. Svo segir Seydi allavega, önnur þeirra varð alveg trítilóð og æsti sig allan tímann. Sagði við Seydi að hún myndi sko þéna meira á einu kvöldi en hann á heilli viku. Vá, en æðislegt. Við erum að kanna hvort við getum fengið tyrkneskan lögmann til að fá skaðann borgaðann. Seydi er viss um að gaurinn á bílnum hafi verið drukkinn (mælirinn sýndi 0,0) og að hann hafi látið mútað löggunni, þ.e. einhver stór gaur sem kom þarna eftir smá tíma. Seydi var EKKI par ánægður með sína landsmenn þetta kvöld.

Ekki skánaði það næsta kvöld en þá urðum við vitni af slysi. Bíll keyrði á vespu á fullri ferð, örugglega 80 km/h. Þar sem hjálmar virðast líka vera lítið notaðir var parið á hjólinu mikið slasað. Seydi hljóp fyrstur á slysstað, ég varð eftir hjá strákunum en forvitnin sigraði og ég sagði við strákana að ég ætlaði bara aðeins að athuga hvar pabbi væri! Ég sé smá eftir að hafa farið á slysstað. Tvær dældir í rúðunni sögðu mikið. En parið var allavega lifandi og konan gat sagt Seydi að þau ættu ættingja á ströndinni og brunaði Seydi til að ná í þau. Á meðan komu sjúkrabílarnir, LOKSINS, en einn ættinginn ætlaði gjörsamlega að fara inn í annan bílinn og lamdi á hurðina. Hvað gerir fólk ekki í æsingi. Sagði víst við bílstjórann að ef annað þeirra myndi deyja, myndi hann ekki lifa lengi!!! Bílstjórinn sko.

Þetta kvöld var Seydi MJÖG pirraður út í allt og alla, nema okkur sko. Fannst sjúkrabíllinn koma of seint, allir gláptu bara en gerðu ekkert að viti, ein konan hringdi í sjúkrabíl og sagði, svo sú slasaða heyrði, að konan væri nú bara að deyja....... Mynduð þið vilja heyra svona liggjandi á götunni stórslösuð? Umferðin þarna er bilun bara. Það búa jú tæplega milljón þarna en meðan að við vorum þarna höfðu komið 5 milljónir fljúgandi til Antalya plús allir sem koma á bíl, bæði Tyrkir og frá öðrum löndum. Flautað er á mann á gulu, 3 akreinar verða allt í einu 5, keyrt er á 80 þar sem 50 er hámarkshraði, fólk labbar hvar sem er yfir göturnar. KAÓS. Er sjálfsagt enn verra í einhverjum borgum en við vorum mjög fegin að komast í sveitina til tengdó. Það búa nú víst 6000 manns í þeim bæ en það ber ekki mikið á því.

Vorum líka heppin að lenda ekki í skógareldum. Um viku eftir að við fórum að gilinu brutust út skógareldar. Það brann víst eins stórt svæði og 17.000 fótboltavellir. Veit ekki hvort að það sé rétt því að Seydi er ekki sá besti að þýða fyrir mig. Tekur alveg hálftíma að hugsa yfir á annað tungumál :)

Nenniði að lesa meira? Julian byrjar í skólanum á morgun. Nú verður ekkert sofið út lengur :( Reyndar byrjar athöfnin klukkan 10 (messa kl. 9:15 en mér dettur ekki í hug að fara í hana) svo að eitthvað get ég sofið, þarf reyndar að koma Henrik í leikskólann fyrir 9. Hann var sko EKKI á því að fara einn í leikskólann í morgun. Ég þurfti að skilja hann eftir grátandi en það lagaðist víst fljótt. Það venst að hafa ekki stóra bróður. Ég veit ekki hvað Julian spurði oft hvenær við myndum ná í Henrik! Alveg eins og samlokur. Hundur og köttur þess á milli........

Veðrið er ágætt, um 22° og sól og skýjað til skiptis. Ekkert bólar á sumarveðri. Ætli það komi ekki í september þegar sundlaugarnar eru búnar að loka........útisundlaugar sko.

Hef ég meira að segja, held bara ekki í bili.

Knús

Myndir

Setti inn fullt af myndum úr ferðinni undir "Picasa myndir". Bloggandinn hefur ekki komið yfir mig ennþá. Það gerist vonandi á næstu dögum. Læt myndirnar tala sínum máli á meðan. Sleppti myndum af strákunum enda nóg af þeim á þeirra síðum.
Er á leið í "eftir" afmæli hjá tveim sonum Ünal mágs.
Sól og ský til skiptis, hitinn rétt yfir 20°.
Skrapp aðeins í bæinn í morgun, hann var enn á sínum stað.

Góða helgi

Komin heim

Ferðasagan kemur seinna. Er þreytt eftir ferðalagið. Lögðum af stað frá tengdó á þriðjudagsmorgun og vorum að koma heim í kvöld. Ég þrái svefn, zzzzzzzzzzzzzzz

Sumarsmellurinn minn:www.youtube.com/watch?v=U4RA3TCBKgM
Kann ekki að setja þetta inn öðruvísi, getur einhver leiðbeint mér? T.d. að gefa linknum nafn?
Love it............

Farin að sofa