Komið að bloggi. Hef samt ekkert merkilegt að segja. Vikan hefur verið fín. Ég var með 3 rétta í lottói. Já, ég tók þátt í lottó á miðvikudaginn. Ekki oft sem ég geri það en þar sem "Jackpot" eru heilar 28 milljónir Evra, ákvað ég að spreða 9,35 € í einn miða. Ætli ég fái ekki eitthvað svipað fyrir þessar 3 réttu. Er að hugsa um að kaupa bara nýjan miða, enginn var með 6 réttar + þessa andskotans tölu sem maður ræðu engu um :( Hún kemur sjálfkrafa á miðann. Þeir sem voru með 6 rétta fengu næstum því 1 milljón.........það hefði alveg verið nóg fyrir mig. Gerir um 160 milljónir ísl. krónur........ekki slæmt. Ég ætla að bjóða pabba á Eagles tónleika í júní ef ég vinn einhverja álitlega summu :)

Sólin skín þessa dagana enda hæð yfir landinu og því kyrrt og kalt veður. Eitthvað á að hlýna á morgun en kólna aftur á laugardagskvöldið. Þá er veðurfréttum lokið að sinni.

Fór í bæinn í gær og tók þátt í skoðanakönnun á nýju mýkingarefni. Vann mér inn 2 € fyrir það :) Ætlaði að kíkja á útsölur í bænum en náði bara að fara 1 hring í H&M og þar er engin útsala, allt löngu búið. Fyrir nokkrum árum var "útsölubyrjunardeginum" útrýmt, þ.e. búðir urðu að byrja með útsölur á vissum degi. Margir gera það, ekki H&M, þeir byrja að lækka verðið fyrir jól. En eins og ég hef sjálfsagt sagt áður, mig vantar svo sem ekkert........gæti samt fundið eitthvað í öðrum búðum. Sé til á morgun.

Ég elska facebook. Snilldar uppfinning. Fann gamla vinkonu, sem ég hef ekki séð í 100 ár. Sum ykkar muna örugglega eftir Guffý sem átti heima í "appelsínugulu" blokkinni? Loksins "fann" ég hana, eftir nokkra leit. Enn og aftur gerði facebook mig enn glaðari. Heilu ættarmótin verða örugglega plönuð þarna. Snilld og aftur snilld.

Hringdi aðeins í ömmu í gær en það geri ég alltof sjaldan. Hefði verið til í að skreppa til hennar í kaffi. Afi hefði nefnilega átt afmæli í gær.
Ég er yfir höfuð löt að hringja í fólk........hefði kannski átt að setja það sem áramótaheit. HRINGJA OFTAR Í FÓLK.

Eigið góðan dag. Er ekki snjór í borginni? Allir út að renna........

Mánudagur

Hæ hó úr vinnunni. Julian er með mér þar sem skólinn er lokaður í dag, einhver vinnudagur kennara en á morgun byrjar ný önn. Ætli Julian byrji þá ekki í ensku, ég er spennt.

Hef svo sem ekkert mikið að gera. Mánudagar eru oft rólegir og flestir kúnnar koma seinni partinn. Hef samt svarað nokkrum sinnum í símann og sagt þremur kúnnum að Seydi sé ekki kominn og komi bráðum......bráðum er þó sveigjanlegt. Hann er þó kominn núna og er á kafi ofan í mótor á einhverjum bíl úti. Skil ekkert í honum að vera úti, það er frekar kalt þó að sólin skíni. Ekki myndi ég vilja vinna úti núna. Það er víst nógu kalt hérna á skrifstofunni, þrátt fyrir lítinn hitablásara hérna fyrir aftan mig. Nú er gott að vera í ullarvestinu góða. TAKK UNNUR.

Fórum í sund hérna í Dorsten í gær. Það var tilbreyting og við áttum góða fjölskyldustund saman. Þær eru ekki margar, nema heima fyrir. Ekki oft sem við förum eitthvað öll saman. Við vorum greinilega ekki þau einu sem ákváðu að fara í sund í gær! Laugin var svo troðin, jeminn eini. Það var því nóg að skoða; feitir, mjóir, litlir, stórir, loðnir, rakaðir..........og allt þar á milli. Strákarnir skemmtu sér vel og það er aðalmálið. Ég fór ekki eina ferð í rennibraut. Við Henrik vorum alveg að komast að (röðin var löng) þá þarf hann endilega að pissa! Við löbbuðum því aftur niður og ég nennti ekki að fara í röðina aftur en hann bað heldur ekkert um það, sem betur fer. Mér er illa við að standa svona hálf nakin í röð í tröppum. Ég er nú ekki spéhrædd en fyrr má nú aldeilis fyrr vera.........það sést hver æð, hver kotasæla, hvert hár! Úff. Best að fá sér vatnssopa :)

Kuldaboli er mættur aftur, allt frosið í morgun. Ég þurfti s.s. að skafa rúðurnar á bílnum. Enginn snjór samt en kalt. Veturinn er sko ekkert farinn. Meðan að sólin skín er þetta bara fínt. Það kom enginn alvöru stormur hérna um daginn. Ekki sem ég kalla storm. Dúkurinn á borðinu úti brettist upp, það er allt og sumt.

Jæja, best að gera eitthvað af viti.

Sólarkveðja

Fyrst af öllu við ég byrja á því að spyrja ykkur að einu. Þekkir einhver ykkar "Sokkabandið"? Þessi grúbba (eða hvað þetta nú er) er víst með sýningar hér á listahátíðinni í sumar. Sá þetta í blaðinu í dag en þema hátíðarinnar eru "Norðurljósin", þ.e. Norðurlönd. Mér datt í hug að skella mér á þessa sýningu og bjóða Bärbel vinkonu með. Endilega látið mig vita ef þið þekkið Sokkabandið.

Skólinn féll niður í dag, heita vatnið fór af þ.e. ísakuldi skólanum svo að ég mátti ná í Julian strax rúmlega 8. Ég hringdi þá bara í leikskólann og hann mátti koma með Henrik þangað. Ég gat því unnið til að verða hálf tvö í dag. Þurfti reyndar að skutlast aðeins fyrir Seydi "eftir vinnu" en er nú komin heim núna. Strákarnir sofnuðu í bílnum svo að það má búast við ennnnn seinni svefntíma í kvöld! Það sem þessi börn þurfa lítinn svefn. Mamma sagði að ég hefði víst verið svona líka. Kannski gengur þetta í erfðir? Sérstaklega Julian virðist alveg komast af án mikils svefns.

Hér er spáð stormi á morgun með rigningu og jafnvel höglum. Það gæti nú alveg farið framhjá hér, aldrei að vita hvar versta veðrið er. Það er aðeins byrjað að hvessa en ennþá bjart og um 5° hiti.

Jæja, hef þetta ekki lengra í dag. Þarf að taka úr þvottavélinni og elda eitthvað úr kjúklingabringum sem ég á.

Kveðja í byltinguna

Var í smá nostalgíukasti hérna í dag, eða varla hægt að segja nostalgía en við vorum að horfa á video af strákunum frá 2005. Mamma og pabbi komu þar fyrir en þau heimsóttu okkur í apríl. Strákarnir hlógu sig máttlausa af sjálfum sér.........je hvað Henrik var (og er) mikil dúlla. Þetta var skemmtileg stund.

Fór í vinnuna í morgun, eins og aðra mánudaga. Skráði einn bíl sem við vorum að selja og afskráði annan, þreif aðeins, þvoði eina vél, gerði kaffi handa tveimur kúnnum og þreif bílinn minn. Hann var orðinn ansi skítugur að innan, oj oj.

Er svo bara heima í dag. Keypti pítubrauð og við borðuðum það með grænmeti og ljúffengri pítusósu frá Gunnari, mmmmmmmmmm Gott að þurfa ekki að elda í kvöld. Borðum bara eitthvað snakk.

HM í handbolta í algleymingi, er m.a.s. sýnt á RTL! Það hefur ekki verið áður. Akkúrat núna eru Þjóðverjar að spila við Alsír. Ég hef verið að kíkja eftir úrslitum á mbl.is og svona en ekkert fundið??? Engin extra síða um mótið en það er sjálfsagt vegna þess að Ísland er ekki með, því miður.

Hryllilegt morð átti sér stað fyrir um viku síðan. 8 ára stelpa af tyrkneskum ættum hvarf í Paderborn á mánudegi og fannst líkið af henni við vatn í Sauerland, 60 km frá Paderborn, að mig minnir á föstudeginum. Hún hafði verið misnotuð.......hún ætlaði bara að skreppa til vinkonu að leika....vinkonan var ekki heima svo hún fór aftur.......og kom aldrei heim :( Hver andskotinn gengur á í hausnum á þeim sem fremur svona glæp? Ég yrði galin ef ég reyndi að skilja það. Gæti aldrei verið sálfræðingur. Ég er fegin að Julian vill að ég labbi með sér næstum því alla leiðina í skólann og ég sæki hann aftur. Maður veit aldrei, þessir pervertar virðast vera allsstaðar. Ég fæ hroll af því að hugsa um svona mál. Vonandi næst pervertinn sem fyrst.

Farið vel með ykkur

Þar sem ég sit hérna við tölvuna hvort eð er ætla ég rita nokkur orð. Bara óska öllum góðrar helgar. Planið hér er að fara á nýja innileikvöllinn í suðurbænum á morgun með Bärbel og Florian, annað ekki. Ætli ég haldi ekki áfram að lesa "Þriðja Táknið" eða "Das letzte Ritual" eins og hún heitir á þýsku. Spennandi, spennandi.

Keypti mér daim mola í dag, góðir, góðir! Verð að passa mig á þeim, hægt að borða heilan poka á nóinu....Keypti líka góðar karamellur, namm, namm. Keypti ekki bara óþarfa heldur líka nautasteik, epli og banana :) Og eitthvað fleira, eyddi allavega helling í real búðinni.

Sá svo fína eldri konu í dag. Hún var með fína nælu í treflinum sínum. Mér finnst svo gaman að sjá svona konur í sínum straujuðu buxum og fínu jökkunum sínum, jafnvel með fallega hatta. Stundum eru þær líka í pilsum og fallegum skóm, með uppsett hárið og varalit. Oft sé ég líka hjón svona líka fín og uppstríluð, bara eins og þau séu að fara á mannamót (annað en að labba í bænum).
Ég verð ekki svona þegar ég eldist, finnst óþarfi að strauja og efast um að ég taki upp á því á gamals aldri að ganga í pilsi og setja upp hárið.

Strákarnir horfa á föstudagsmyndina í TV, ekkert í TV fyrir mig. Best að lesa bara áfram......og fá mér kaffi og daim mola (eins gott að molar eru eins í ein- og fleirtölu) hahaha

Góða helgi

Það liggur við að ég hermi eftir minni kæru vinkonu, Stellu Ameríkufara, og lýsi eftir lesendum bloggsíðunnar minnar! Allir dottnir í facebook, nema þau gömlu og Unnur ;) Mig grunar nú að einhverjir lesi bloggið mitt en hafi svo sem engu við að bæta eða leggja orð í belg. Það er líka allt í lagi en ég viðurkenni alveg að mér líður eins og Stellu........ég kíki reglulega á síðuna og vonast eftir að fleiri hafi skilið eftir sig spor.

Æi hvað er ég að kvarta?! Ég er ekki miðdepill himingeimsins, ekki ofurbloggari ársins á moggablogginu (það virkaði ekki hjá mér) né eitthvað megabeib sem setur inn pósumyndir af sér reglulega. Ég er bara venjuleg kona sem býr í útlöndum. Ég er ekkert fræg, er ekki í námi, hef ekki afrekað neitt merkilegt. Mér hefur stundum fundist eins og fólki finnist ég "þurfa" að vera að gera eitthvað rosa merkilegt, bara af því að ég bý erlendis??? Hvað segið þið sem búið eða hafið búið erlendis? Reyndar er ég búin að vera hérna svo lengi að líkurnar á því að ég slái í gegn eru sáralitlar, ha ha ha. Birtist reyndar í bæjarblaðinu í fyrra en það var allt og sumt.

Nú er barnaland eitthvað í "öppdeiti", síðurnar virka stundum, stundum ekki. Ætlaði að setja inn myndir áðan. Þið fyrirgefið mér það, þið barnalandsskoðarar.

Snjórinn er farinn, nokkrir skítugir haugar eftir. Ætli það komi nokkuð meiri snjór þennan veturinn??? Fyndið hvað mér fannst "hlýtt" síðustu daga, alveg 5°! Það kom smá vorfílingur í mig, fuglarnir sungu enn hærra og mér fannst ég finna vorilm. Áttaði mig samt á því að það er miður janúar, mánuður í árin 39...... hvað svo tekur við ári síðar, ÚFF! Hvernig ætli mömmu líði að eiga barn sem er að verða fertugt?! Ætli það sé ekki skrýtin tilfinning?

Oh hvað ég væri til í að fara á þorrablót um helgina. Shit ég vildi að ég væri milljónamæringur núna. Myndi bara hoppa til Íslands og skreppa á þorrablót. Ansinn sjálfur. Vona að fólk skemmti sér vel.

Hrikalega eru mörg spurninga- og upphrópunarmerki í þessu bloggi!!!!

Var dugleg í morgun og fór út að labba, þrátt fyrir þoku og frekar drungalegt veður *klapp á bak*. Eitthvað verð ég að gera til losna við þessi a.m.k. 2 kg sem komu á Íslandi. Er reyndar á svipuðu róli og ég var fyrir flensuna miklu. Það var bara svo gott að sjá annan tug á vigtinni..........best að fá sér vatn.

Gott kvöld

Ég er nú bara nokkuð þreytt eftir þennan dag. Vaknaði eiturhress á undan vekjaraklukkunni í morgun en hún fer af stað kl. 6:45. Reyndar er útvarpsvekjarinn eitthvað að stríða okkur, hann argar í staðin fyrir að setja af stað útvarpið, jú það heyrist reyndar aðeins í útvarpinu á bakvið en þetta arg fer alveg í mínar fínustu. Skil ekki afhverju vekjarinn gerir þetta af og til?!

Fór nú loksins í vinnuna í dag en ég fór ekkert í síðustu viku enda tölvan hér heima og allt svona að komast af stað aftur á verkstæðinu eftir jólafríið. Ég þreif gólfin á WC og skrifstofunni, saltaði klakann fyrir utan dyrnar (með venjulegu salti, allt hitt uppselt!) og kíkti smá á bókhaldið.

Eftir að hafa sótt Julian og hann búinn með heimaverkefnin, sótti ég Henrik og við fórum beint í bæinn. Fyrst á bókasafnið, svo í dm en ég hafði keypt mér meik á laugardaginn og ætlaði svo að klína því framan í mig í morgun en haldiði að dollan hafi ekki verið TÓM!!! Búið að skafa allt meikið úr henni. Ég gat skilað þessu, afgreiðslukonan trúði mér alveg að ég hefði sko ekki gert þetta. Sagði að sennilega hefði einhver komið með tóma dolluna og tekið nýja, var ekkert hissa. Það sem fólki dettur í hug að gera.......... Næst lá leiðin í Deco, svona gjafavörubúð en mig vantaði blómavasa handa Sultan í afmælisgjöf en hún er þrítug í dag. Fann þennan líka fína "afríska" blómavasa og gaf henni túlipana með. Á leiðinni til hennar í kaffi kom ég við í búð og keypti afmælisgjöf handa einkabróðurnum. Stefni að því að senda pakkann til hans á miðvikudaginn. Verður kannski ekki kominn á föstudaginn, því miður er póstur ekki borinn út á laugardögum á Íslandi. Þú fyrirgefur mér það vonandi kæri bróðir :)

Sultan kellingin var á fullu að elda þegar ég kom og Liya lá á gólfinu og gargaði. Bara af frekju held ég, það er búið að venja prinsessuna á ýmislegt eins og að sofa helst í fanginu! Sultan hefði átt að hneykslast meira á mér þegar Julian var lítill og við vorum að svæfa hann í rúminu okkar kvöld eftir kvöld. Ég tók dúlluna bara upp og hún var bara ánægð með það. Tengdó komu líka, það voru þau sem vildu mat. Sultan ætlaði bara að vera með kökur og kaffi. Það var svo á eftir matnum. Engar íslenskar rjómatertur eða heitir réttir, nei nei, allt keyptar kökur. Ekki að þær séu ekki gómsætar en það jafnast fátt á við íslenskt kaffiboð. Ég reyni nú að vera með allavega nokkar heimalagaðar sortir þegar ég held afmæli. Einhvern veginn heimilislegra finnst mér.

Þó ég væri búin að borða, steikti ég kjötbollur þegar ég kom heim því að hakkið rann út í dag. Veit að það þýðir ekkert að frysta það, ég gleymi því bara í frystinum um ár og aldir. Var að henda kjúklingabringum fyrir jól en þær hefðu runnið út 12.9. Voru kannski í lagi en ég henti þeim samt. Strákarnir átu nokkrar bollur, Seydi er svo kannski svangur á eftir. Verður að duga handa honum í dag.

Oh, nú er ég búin að babla alltof mikið. Best að kíkja á fréttir og koma strákunum í ró.

Knús

Kuldi og snjór

Það var kalt að fylgja Julian í skólann í morgun, eitthvað um -10° en sem betur fer stillt veður. Sólin var að koma upp og öll tré fallega héluð. Það mætti halda að ég ætti heima í Ölpunum núna. Mér líkar þetta vel, gæti vel vanist svona veðri. Allt er eitthvað svo rólegt, allir keyra hægar, labba hægar og allt er eins og pakkað inn í bómull. Nú hafa lúffurnar og 66°N húfan frá Rakel komið sér vel plús þykki góði heimaprjónaði trefillinn frá Unni. Gott að eiga góðar systur :)

Vikan hefur verið góð, strákarnir hlökkuðu til að fara í skóla/leikskóla. Tvo daga fórum við að renna okkur og þess á milli hef ég tekið niður jólaskrautið, þrifið, þvegið, sett upp gardínur, keypt í matinn, gengið frá töskum upp á loft ofl. ofl. Hef farið hér eins og stormsveipur um undanfarna daga. Á eftir að skúra frammi en ætla að blogga aðeins fyrst svona í tilefni föstudags. Veit ekki hvort við förum að renna okkur um helgina, hætta á að brekkan verði FULL. Þar sem mínir strákar eru glannar á þotum gætu orðið slys, svo eru margir á hraðskreiðum trésleðum og sumir kunna ekki að beygja.

Alveg merkilegt hvað sumir eru illa klæddir í kuldanum. Fólk er að renna sér í gallabuxum! Sumir eru á strigaskóm hér á götunum, húfu-, vettlinga- og trefilslaust. Mætti halda að það fengjust ekki kuldaskór í búðunum hérna. Þegar fer svo að hlýna munu örugglega margir liggja í rúminu með einhvern vírus sem herjar á vandmeðfarið ónæmiskerfið.

Ég fæ bara ekki nóg af því að líta hér útum gluggann. Snjór á þökum, héluð tré og sól. För eftir þotur skreyta svo himininn. Ég elska fallegt vetrarveður :)

Óska öllum góðrar helgar. Verið góð við hvert annað.

Komin heim

Ég er komin á ról eftir frekar langa nótt, á minn mælikvarða allavega. Ég var örugglega sofnuð fyrir ellefu og vaknaði við símann hans Seydi klukkan 8. Hefði kannski sofið enn lengur ef hann hefði ekki hringt.

Ferðalagið í gær var langt en gekk mjög vel. Rakel, þessi elska, fór á fætur um miðja nótt og keyrði okkur á BSÍ til að taka flugrútuna. Þar var mikið um manninn og alveg 3 rútur að fara þarna á sama tíma. Þessvegna var líka troðið í Leifsstöð, margir að tékka sig inn, öllum troðið í sömu röðina, sama hvort þeir voru að fara til Osló, Stokkhólms eða Frankfurt. Sumir tékkuðu sig inn sjálfir en þar voru líka langar biðraðir svo við fórum bara í "venjulegt" tékk inn. Gaurarnir stóðu sig með prýði enda vanir menn. Töskurnar voru ekki meira en 80 kg svo að það var í góðu lagi. Við gátum slappað aðeins af í Leifsstöð, fengum okkur að drekka og harðfisk að borða. Garurarnir léku sér í krakkahorninu. Ég keypti mér einn geisladisk, Simsalabimm með Ruth Reginalds :)

Ekki byrjaði nú flugið vel heldur þurftum við að bíða í næstum því klukkutíma til að mega fara af stað.........allt í klessu í Frankfurt vegna mikillar umferðar og snjóa! Sem betur fer vorum við í vél með nýju sætunum svo að græjurnar voru settar af stað til að við gætum notið afþreyingar á meðan á bið stóð. Ég byrjaði að horfa á "Sex and the city" myndina en eftir smá stund fannst mér hún heldur "gróf" fyrir litla gaura við hliðina á mér, þeir þurfa ekkert að horfa á svona í TV strax. Nestið hennar mömmu kom sér vel þarna í biðinni.

Flugið gekk mjög vel, gaurarnir sátu og horfðu á "Shrek", Henrik sofnaði og Julian horfði svo á "Simpson". Ég horfði á mynd "Monster in Law" en dottaði nú eitthvað í lokin. Hrikalega var ég orðin þreytt.........

Við flugum yfir Hjaltlandseyjar sem böðuðu sig í sólinni, í suðri sást í fjöllin í Skotlandi. Þegar við komum svo að meginlandinu var ALLT hvítt. Í Frankfurt þurftum við að bíða alllengi eftir að komast í stæðið. Sumir voru orðnir óþolinmóðir, aðallega Julian. Honum fannst hann vera búinn að bíða nóg þennan dag. Sem betur fer fengumvið töskurnar strax, Julian sá um að finna þær. Við drifum okkur svo út í snjóinn, tókum leigubíl að stæðinu þar sem bíllinn okkar stóð og drifum okkur af stað. Tókum smá útúrdúr til að kíkja á einn bíl sem Seydi fann á netinu en ekkert varð úr þeim kaupum. Nú var brunað heim. Sem betur fer voru hraðbrautirnar vel ruddar og saltaðar. Við fengum m.a.s. tvisvar saltgusu framan í okkur!

Vorum komin hingað heim um hálf sjö og hér er svo mikill snjór að annað eins hefur ekki gerst í ein 10 ár!!!!!!! Alveg 15 cm jafnfallinn snjór og göturnar illa ruddar. Svo er spáð Síberískum kulda næstu daga og nætur..........í morgun voru 8,3 gráður mínus!!! Brrrrrrrrrr

Ég held ég fari að renna með gaurunum í dag, þegar ég er búin að taka upp úr töskunum. Ég nennti því sko ekki í gærkveldi. Tók bara fiskinn, pítusósuna og Gottann upp úr og búið.

Nú hef ég verið að fara yfir þessi jól í huganum undanfarið og þau voru auðvitað yndisleg og allt það. En mig vantar svo snjóinn til að leika/renna í og mig vantar að labba í bæinn á Þorláksmessu. Þetta vantar inn í minninguna um jólin 2008. Sem betur fer fundum við snjó til að renna allavega tvisvar, það reddaði heilmiklu. Með veðrið þarna 22.-24. verður engu breytt.

Ég náði auðvitað ekki að sjá og hitta alla sem mig langaði að hitta. Þegar þetta eru bara nokkrir dagar og margir af þeim hátíðisdagar er ekki mikill tími til að heimsækja fólk. Eftir að ég eignaðist strákana geri ég líka miklu minna af því. Fólk má líka alveg koma á Garðarsbraut og hitta mig eins og elsku Maja gerði. Þú ert alveg frábær Maja mín :) Svoooo gaman að sjá þig og krílin þín.

Ég ætla mér að koma í sumar og vonast ég þá til að geta hitt fleiri og séð enda ekkert jólastress í gangi þá. Vona bara að þá komi ekki snjór, ha ha ha.

Nú er sólin farin að skína á snæviþakin þökin hér úti. Seydi er farinn að kaupa "Brötchen" og ég ætla að vekja gaurana.

Knús og kossar á ykkur öll. Takk fyrir allt elsku fjölskylda og vinir.

Gleðilegt ár

Þetta verður ekki langt, nenni ekkert að hanga hér í tölvunni í jólafríinu. Hef nóg annað að gera eins og að borða, sofa, skemmta mér, renna mér (fann snjó ofan við Húsavík), borða meira og sofa enn meira.........

Árið leggst vel í mig, ég strengi engin áramótaheit. Væri samt til í að losna við þessi kíló sem ég hef hlaðið utan á mig hérna hjá mömmu! Eins gott að ég lagði af áður en ég kom, hjúkkit bara. Við fljúgum suður á sunnudagskvöldið og "gistum" hjá Rakel í smá stund áður en við förum með flybus rúmlega 5 um á mánudagsmorguninn. Fljúgum svo kl. 8:10 heim aftur. Hversdagsleikinn tekur þá við eins og alltaf. Anna Lína sagði mér góða setningu úti í Kaskó um daginn. Einhver hafði sagt við hana "þú kemur alltaf til að fara aftur".......þannig er þetta hjá mér/okkur.

Kaffið er tilbúið, kleinur, pungar, skonsur ofl. á boðstólnum. Segi því bless í bili.

Knús