Íslendingur í Þýskalandi

Blogglok.........

2011-09-23T10:13:00.000+02:00

Ég er mikið að hugsa um að hætta að blogga, ætla að sjá til hvernig nýja facebook með "timeline" verður og sjá svo til. Mamma verður bara að fara á facebook eða fá að kíkja hjá Hjálmari. Svo eru fréttir af strákunum á barnalandi..........fyrir utan að við sjáumst á msn nánast vikulega. Andleysi til að blogga er líka ástæða til að hætta þessu.........
Læt vita þegar ég er búin að ákveða mig.
Góða helgi, Inga

Uppgjör sumarsins 2011

2011-08-31T20:23:00.001+02:00

Veit samt ekki alveg hvar ég á að byrja, kannski bara á því að hér í Germany var víst blautt sumar og þeir sem voru hér í fríi voru heldur fúlir út í sumarfríið en Henrik fór á 1. fótboltaæfinguna áðan og ég spjallaði við nokkra þar. Einn pabbinn sagði m.a.s. að á Spáni hefðir rignt alla fyrstu vikuna og það mikið! Ég tel mig því mjög heppna bara, fékk örfáa rigningardaga, annars bara sól og þurrt veður. Fékk svo sem ekkert Mallorca veður en því býst ég nú aldrei við á Íslandi..........nú er ég ljúga, vikan eftir Mærudaga var þokkaleg þó svo að fólki hér finnist nú 25° hiti engin bongóblíða. Síðan að við komum heim hefur rignt flesta daga en í dag var fínt veður, 20° og sól annað slagið, hlýnandi :)

Best að setja inn eina mynd svona til að minnast Íslandsferðarinnar...

Mærudagar á fullu

Ég er allavega sátt við þessar 5 vikur NEMA að ég er alltaf jafn löt að heimsækja fólk.......fór að hugsa um það að ef ég heimsótti ALLA væri ég í heimsóknum ALLA daga. En svona er þetta nú bara, ég hitti reyndar vinkonu sem ég hafði ekki séð í 4 ár, heimsótti hana samt ekki heldur kom hún til mín. Takk fyrir heimsóknina Inga Jóna. Svo komu Gummi og Íris í óvænta kvöldheimsókn, það var indælt. Allir eru alltaf velkomnir á Garðarsbraut 53. Við tókum m.a.s. á móti 2 Þjóðverjum sem ég þekki aðeins héðan. Verst að við vorum ekki með svið eða slátur í matinn þann daginn heldur Tacos! Oh jæja.

Þessi aukakíló sem hrönnuðust á mig á Íslandi leka nú af. Svona er það að sitja bara og éta, eftir morgunmat kemur hádegismatur, þar næst kaffitími og svo kvöldmatur.......jafnvel kvöldsnarl. Enginn hreyfing með þessu plús íslenskt nammi. Þetta gera 3-4 kíló takk fyrir! Svo sit ég núna og borða Bingókúlur..........Var að enda við að borða rækjusamloku. Finn að hjartslátturinn eykst eftir þetta lakkrísát, best að hætta NÚNA. Get átt þessar örfáu kúlur til góða seinna ;)

Rakel "litla" systir varð þrítug 25.7.

Framundan er spennandi mánuður, litla systir á eignast sitt 1. barn og mamma á afmæli. Ég er m.a.s. búin að kaupa afmælisgjöf. Verð að koma henni í póst sem fyrst. Ætla að standa mig núna í því að senda gjafir á réttum tíma. Ferlegt þegar fólk er að fá gjafir langt eftir afmælið.

Mig grunar að Henrik sé sofnaður.........strákarnir voru í skemmtigarði með gæslunni í dag og svo var fótboltaæfing og ætli lítill maður sé ekki þreyttur. Ætla að gá...........neibb, hann tórir enn en þeir liggja báðir í holunni minni og horfa á Svamp Sveinsson. Sjónvarpið í stofunni er við það að gefa upp öndina og það á víst að reyna að láta gera við gripinn. Veit nú ekki hvort að það sé eitthvað hægt......sjáum til. Algert drasl þetta nýja rafmagnsdót, sjónvarpið er t.d. ekki orðið 4. ára.

Hvað passar betur við sumarið en lúpína??

Nú er sumri tekið að halla. Samt er nú spáð um 25° hita hér um helgina. Er að hugsa um að fara á "ströndina" við Halterner Stausee með Tarek vini Henriks og mömmu hans. Sjáum til hvort að spár rætast. Væri nú gott að fá smá yl í kroppinn, kannski smá tan líka ;)

Þetta er orðið gott, þangað til næst. Hafið það gott öll sömul og við sjáumst.

Heimferð búin.......

2011-08-27T17:20:00.000+02:00

...nenni nú samt ekki að blogga mikið alveg strax, svo margt sem sveimar um í huga mér en ég er ekki í rétta gírnum akkúrat núna. Langaði bara að breyta efsta blogginu, leiðinlegt að hafa "Heimferð nálgast" efst á lista svona þegar ég er komin hingað heim núna, allstaðar heima, hér og þar ;)

Þrumuveður úti núna, sit í eldhúsinu og horfi út, ætla að fara að huga að kvöldmat enda fínt að borða um sexleytið. Ætla nú bara að hafa fisk og kartöflur, að ósk Julians. Er búin að þvo 3 vélar, þrífa og laga til, taka upp úr öllum töskum ofl. Nú þarf ég að skottast upp með töskurnar, taka asskoti mikið pláss hérna inni. Þarf líka að losna við dýnuna hans Seydi en hann keypti sér nýja um daginn. Óþarfa dót svona til lengdar.....

Tók hring í bænum áðan, það var alltaf jafn indælt. Keypti ekkert merkilegt en vantaði sárlega klósettpappír og ég skutlaðist því í dm og keypti hann ásamt fleiri nauðsynjum. Kom aðeins við í Netto á leiðinni heim, en þá kom skýfall og við urðum smá blaut áður en við náðum inn, sluppum samt ágætlega. Verslaði smá og labbaði svo heim í sól!!

Seydi fór eitthvert að kaupa bíl, ekki eftir neinu að bíða með að vinna. Fótboltagrill hjá honum og gaurunum hans á morgun, þ.e. ef það rignir ekki of mikið........sjáum til.

Jæja, þetta er gott í bili, lengra blogg mun fylgja á næstu dögum. Ég lofa.

Inga

Heimferð nálgast....

2011-07-17T14:45:00.000+02:00

...sem þýðir það að ég þarf að pakka niður! Ekki beint uppáhalds, jafnvel þó að ég sé alls ekki að gera það í 1.skipti. Alltaf koma upp sömu spurningarnar um hvað á taka með??? Bleika bolinn, uppáhaldsbolinn, fína bolinn, fínu skóna,strigaskó, fínu peysuna, flíspeysuna, lopavestið, náttbuxur, gallabuxur?????? Hvað á að taka með fyrir strákana er líka eilífðar spurning.......þykka peysu, þunna peysu, gallabuxur, fínni buxur, jakka, stígvél, skó (þoli ekki að ferðast með skó) osfrv. osfrv.????? Núna er taska strákanna orðinn full, rétt um 20 kg. Mín er orðin 16 kg. og ekki allt komið í hana........ætla að taka þriðju töskuna með, svona sem nátt-/fataskiptistösku. Ég verð alveg að stoppa mig af í þessu stressi, ég EKKI að fara að vera með yfirvigt sko enda má ég koma með 60 kg. plús handfarangur EEEEEEEEEN ég nenni ekki að hafa mikið í handfarangri OG það er höfuðverkur hvað á að koma með, hvaða föt passa við hvaða tilefni. Ég þarf að hafa eitthvað til að fara út á lífið, eitthvað til að fara í göngutúr, eitthvað til að fara í sund (á reyndar sundbol heima), já og svo skó við öll þessi tilefni! Allar konur í fjölskyldunni svo fótnettar að ég get ekki fengið neina skó lánaða hjá þeim........heldur ekki hjá vinkonum. Djöfull er ég að stressa mig á þessu alltaf hreint, þoli það ekki og reyni að stemma stigu við því, tekst svona la la. Finnst ég alltaf vera að gleyma einhverju. En það verður bara að hafa það þá........mikilvægast er að koma með passana, myndavél (ekki gleyma hleðslutækinu samt), gemsann, peningaveskið (með kortum og peningum), sjúkrakassakortin og smá snyrtidót. Basta!

Engin mynd í dag, blíðuveður úti, 20° og skýjað, glittir í blátt annað slagið. Afmæli hjá frænda strákanna á morgun, hitta Ricarda á þriðjudaginn, fótboltaslútt á miðvikudaginn og svo er bara kominn fimmtudagur! Verð fegin þegar ég lendi.........nema að ég stressast alltaf smá við að fara í fríhöfnina. Reyndar ekki eins slæmt núna þegar strákarnir eru orðnir svona stórir en samt, alltaf smá stress í gangi í minni........Æi, skítt með það.

Góðan sunnudag

Bara kominn júlí.........

2011-07-11T22:47:00.001+02:00

Alveg ótrúlegt hvað tíminn líður hratt, mér fannst ég bara hafa bloggað í gær en var að sjá það að ég bloggaði síðast um Jónsmessu eða 21.júní! Leti er þetta........eða bara ekkert að segja, nú eða enginn tími. Ég gef mér allavega ekki tíma til að blogga eins og er. Nú er ekki nema rúmlega vika í Íslandsferð..........er þetta eðlilegt? Ég er að hugsa um að pakka niður flestu á sunnudaginn, nenni ekki að halda veislu fyrir fjölskylduna en Henrik verður víst 7 ára á laugardaginn og hann vill auðvitað halda veisluna í Kinderwelt með vinum sínum. Svo er hvort eð er fjölskylduveisla á mánudaginn þegar Jemain frændi hans verður 6 ára.......Nei, ég ætla að sleppa þessu í ár, nenni því bara ekki, í alvöru talað. Á eftir að komast í búðir áður en ég flýg, kaupa fyrir Unni systur, afmælisgjöf handa Hlyni ofl. gjafir. Gæti kannski komist á miðvikudaginn en þá er ég í fríi því að ég ætla að hjálpa við íþróttavikuna í skólanum. Verður fínt að gera eitthvað annað en að "hanga" á verkstæðinu.

Átti aldeilis indælan sunnudag en Seydi tók strákana með í fótboltann. Ég dreif mig út að hjóla, eitthvað út í buskann, upp götuna, til hægri í Marl, aftur til hægri og var allt í einu komin í Oer-Erkenschwick áður en ég kom aftur til Recklinghausen. Ljúft að láta sig renna heim, niður í móti. Tók eina mynd á leiðinni. OH, hún er ekki í fartölvunni minni, bara í stóru tölvunni........kemur seinna, hehe.

Ég ligg nefnilega uppi í rúmi, strákarnir sofa, Henrik greyið með risa roða eftir (mjög sennilega) geitungabit/stungu. Var að kanna hvað þetta gæti verið hérna á netinu og komst að þessari niðurstöðu. Litla greyið er víst frekar viðkvæmur fyrir stungum og bitum. Elsku kallinn minn. Er að pæla í því hvort að ég eigi að ná í Seydi........hann liggur á sófanum inni í stofu. Ekki beint þægilegt að sofa þar EN hann getur sjálfum sér um kennt, verður bara að drullast inn í rúm áður en hann sofnar eða......... Ætla að hugsa málið betur ;)

Best að fara að hvíla sig, þarf að vakna kl. 6:30 eins og alltaf. Spáð bongóblíðu á morgun, spurning um að drífa sig í sund???

Prófa...

2011-06-21T18:38:00.000+02:00

Ég verð að prófa að blogga á nýju fartölvunni minni, gengur nú ekki annað. Nú get ég verið uppi í rúmi, setið úti á svölum, í eldhúsinu, jafnvel á klóinu og vafrað um netið, aldeilis indælt. Akkúrat núna sit ég í eldhúsinu og elda núðlur á meðan. Gæti svo sem setið úti því að hitastigið er víst yfir 20° en þetta er ágætt, er bara með opið út á svalir.

Á morgun fer ég til húðlæknis en ég fór til heimilislæknisins í blettaskoðun 10.júní og hún vildi endilega að ég léti kíkja á 3 bletti, 2 á malla og einn undir tá. Ég er reyndar á því að það sé sár en það er best að láta kíkja á þetta. Fór loksins í handnudd, sem ég fékk í fertugsafmælisgjöf, á miðvikudaginn var. Minntist eitthvað þessar "freknur" sem ég væri með á höndunum en snyrtifræðingurinn meinti nú að þetta væru elliblettir! Ha, elliblettir...... almáttugur. Er nú ekki nóg að ég sé komin með grátt í vanga......þarf ég nú að fá ellibletti á hendurnar líka.? Nú jæja, sagði ég bara, þegar hún sagði mér að hafa nú ekki áhyggjur af þessum blettum. Sagði líka að ég væri þó allavega með minni hrukkur en sumir á mínum aldri...........

Ætli ég eigi einhverja mynd, örugglega ekki. Hef ekki verið virk með myndavélina undafarið, nema þá helst af strákunum og það fer á barnaland enda er þetta bloggið MITT en ekki strákanna. Ég var samt að pæla í því að þegar ég hætti með barnaland, get ég bara bloggað í staðinn, kostar ekkert og er auðvelt í notkun. Hef allavega ekki hugsað mér að hafa of mikið um strákana á facebook, það er líka MITT.

Set bara m.a. inn myndir af sýningunni sem við fórum á um Hvítasunnuna. Hef því miður ekkert annað upp á að bjóða........ Engar pönnsur núna.

Þetta er nú við "Sorpu" í Dorsten, smekklegt :)

Hann hefur þótt flottur þessi

Sumarið er eitthvað í pásu núna, örugglega í fríi í Tyrklandi bara. Engir sólríkir, heitir dagar núna, bara skýjað, annað slagið sól og um 20°. Var m.a.s. bara 13° "hiti" í fyrradag, það þótti mér dapurt. En svona er þetta bara, ekkert hægt að gera við því svo sem. Við höfum því ekkert farið í útisundlaugar þetta sumarið, þarf að vera ansi hlýtt til þess enda eru laugarnar upphitaðar með sól og hlýju en er samt ískaldar allt sumar, það finnst mér allavega. Vona bara innilega að ég fái ágætis veður á Íslandi.........annars #?&µ~# Ég er engin Pollýanna og finnst norðanátt með rigningu og 10° kulda ÓGEÐSLEGT veður, sama í hverju ég væri......... *hrollur*

Jæja, núðlurnar örugglega orðnar "al dente" og meira til..........bæjó í bili.

15 mínútur

2011-06-04T23:20:00.001+02:00

Ég ætla að gefa mér 15 mínútur til að blogga, athuga hvort ég kem ekki einhverju gáfulegu frá mér. Nenni samt alls ekki að skrifa neitt, hef ekkert að segja, ekkert krassandi að gerast........ Ég er hins vegar komin með nóg af sjálfri mér núna, finnst ég vera gjörsamlega að springa úr fitu, uppþembd og ógeðsleg bara. Kannski eru þetta sýklalyfin sem ég fékk við blöðrubólgunni........alveg spurning. Þetta gæti jafnvel verið íslenska nammið sem ég lauma mér í í tíma og ótíma.........Nú eða bara hrein leti, enginn agi og þar fram eftir götunum. Núna segi ég STOPP,hingað og ekki lengra........nú skal vigtin fara aftur niður á við. Eftir þessa viku verð ég bara að taka mig á, annars líður mér bara illa. Ég vil komast aftur þangað sem ég var fyrir 2 árum, jafnvel neðar en ég ætla ekki að gera mér einhverjar grillur strax. Reyndar er ég á svipuðu róli og ég var þegar ég var 17 ára, svona um það leyti sem ég fór til USA. Margir vita nú hvernig ég kom þaðan........ég segi nú bara "Rolin´, rolin´" (mamma, rolin þýðir rúllandi). Mér finnst ég sérstaklega þrútin þegar það er hlýtt úti, í dag var 30° hiti og ég á fullu að drekka vatn, samkv. læknisráði. Ætti kannski að fá mér einhver vatnslosandi töflur? Bíddu nú við, hvenær byrjaði ég að blogga? Ég ætlaði að gefa mér 15 mínútur, þær hljóta að vera langt komnar.
Best að setja bara inn mynd......

Svona var þetta líka í dag, fór hæst í 31,5.

Ég ætla nú samt ekkert að kvarta yfir þessari blíðu, sei, sei, nei. Lagðist aðeins í sólbað í dag. Hef nú ekki gert það síðan í Tyrklandi í fyrrasumar en þar sem ég kemst nú ekki í sund (útaf blöðrubólgu, sem er reyndar búin) þá ákvað ég að tana mig smá hérna á svölunum. Það var var gott að fá smá yl í kroppinn og ég fékk frið. Julian var hjá vini og Henrik var ýmist í lego eða í tölvunni. Seydi var auðvitað að vinna, hvað annað.....

Núna er loksins allir sofnaðir hér,nema ég. Sunnudagur á morgun eftir laaaaaaaaaanga helgi. Svo er löng helgi aftur um næstu helgi en þó "bara" 3 dagar. Ég er að velta því fyrir mér að koma mér inn í rúm, taka vatnsflöskuna með og reyna að finna eitthvað til að horfa á í imbanum. Annars arfaslök dagskrá í kvöld, þessvegna sit ég hér og blogga og feisbúkkast.

Mig langar í nammi, ætla ekki að láta það eftir mér og drekk bara vatn. Nú er það bara harkan sex! Hversu lengi það svo endist.....

Góða nótt

Time flies

2011-05-17T19:06:00.000+02:00

Já tíminn æðir áfram, endalaust. Ég hef ekki bloggað í 2 vikur, Júróprinsessur eru komnar og farnar, hversdagsleikinn tekinn við aftur. Allavega um tíma, eftir rúmlega 2 mánuði verð ég komin til Íslands......og farin aftur heim. Ætli jólin séu ekki bara á næsta leyti???

Prinsessurnar fóru beint í ísinn þegar þær komu

Það er alltaf jafn mikið að gera hjá manni, vinna, heimilisverkin, fótboltaæfingar, versla, redda hinu og þessu fyrir skólann. Sem betur fer eru nokkrir frídagar framundan í júní, fyrst uppstigningardagur 2.6. og frídagur í skólanum daginn eftir, svo kemur Hvítasunnan með 3ja daga helgi og 23.6. er líka frídagur, einhver kaþólskur frídagur held ég. Daginn eftir er því miður ekki frídagur í ár og gæslan lokuð. Þar á eftir kemur svo júlí en þá byrja sumarfríin, reyndar ekki fyrr en 25.júlí. Skólinn byrjar svo aftur 7.september. 18. júní á að gera skólalóðina skemmtilegri með málningu ofl. Spurning um að taka þátt í því, verð að skila miða fyrir föstudaginn ef ég ætla að vera með, þ.e. get verið með.

Sú gamla á Eurovision.

Ég efast um að ég hefði farið á Eurovision ef að prinsessurnar hefðu ekki komið. Þetta var frábær upplifun en lokakvöldið heima í stofu var líka yndislegt enda hafði ég magnaðan félagsskap. Gerði mér bara gott að fá skvísurnar í heimsókn til að spjalla, hlæja og grínast. Hlakka til að hitta þær í sumar. Ekki það að ég sé þessi týpa sem leiðist og er einmana en þetta var hressandi og skemmtilegt.

Þarna erum við skvísurnar :)

Hef svo sem ekkert meira að segja, það er búið að rigna í 2 daga núna og það var svalt að standa á vellinum í gær en framundan er svo bara blíða með 20° hita og sól. Indælt.

Love you

LOKSINS

2011-05-03T19:58:00.000+02:00

Loksins er ég búin að panta miða heim til Íslands í sumar! Er búin að vera með hnút í maganum útaf þessu leeeengi.......fyrst var að ákveða hvað ég ætti að vera lengi, svo var að ákveða hvort ég flygi frá Dusseldorf eða Köln, nú eða með Icelandair (sem útilokaðist snemma vegna ofurverðs og fjarlægðar frá flugvöllum) eða Express (sem útilokaðist líka vegna þess á hvaða dögum þeir fljúga, já og fjarlægðar til Hahn). Það er alltaf smá magaverkur að panta miðana heim. Ég vissi reyndar alveg upp á hár hvaða dag ég YRÐI að fljúga, kemur bara 21.júlí til greina þar sem skólafríin byrja daginn eftir þetta árið. Ég bara VERÐ að komast á Mærudaga, þó að ég muni missa af opnunarhátíðinni. Næst þurfti að ákveða hvað ég yrði lengi........Julian fannst nú mánuður of stutt! Ég ákvað því að vera í mánuð + 5 daga eða til 26.ágúst. Nú er næsti magaverkur að komast heim til Húsavíkur þarna á föstudeginum.......ætli það sé ekki allt uppselt í flug, já og svo verð ég að gista einhvers staðar á fimmtudagskvöldinu! Eilífðar magaverkur er þetta..........Ég get engan veginn ætlast til þess að einhver sæki mig á miðjum Mærudögum, eða þannig. En það kemur seinna í ljós hvernig ég kem, en ég kem allavega. Verið bara viðbúin gott fólk. Ekki búast samt við því að ég heimsæki ALLA, ef einhver vill sjá mig verð ég á Garðarsbraut 53, jafnvel úti á palli í góðu veðri. Ætli ég verði ekki eitthvað á labbinu, í sundi eða á djamminu, held það nú..........

Er ekki kominn tími á mynd. Extra handa henni Unni minni sem er nú að koma til mín á sunnudaginn ásamt fríðu föruneyti, þeim Rakel litlu sys og Kristey frábæru. Mikið hlakka ég til, við hlökkum ÖLL til.

Adidas lagersalan í Herzogenaurach

Við komum aðeins við hjá adidas og Puma á leiðinni heim frá Ungverjalandi. Ætla nú ekkert að fara að tíunda þá ferð of mikið, skrifaði aðeins hjá strákunum og svo var mamma ofurkvittari á staðnum svo að hún veit svona nokkurn veginn hvernig ferðin var og svona. Flestir vita líka að viftureimin fór í bílnum, fór alveg í tætlur en sem betur fer ekki á ferð heldur bara akkúrat þegar við ætluðum út af bílastæðinu á hótelinu. Heppin þar. Til að gera langa sögu stutta fengum við ekki reim fyrr en á þriðjudegi eftir páska, seinni partinn........Seydi setti hana sjálfur á og bölvaði sjálfum sér að hafa ekki tekið reim með, hafði tekið hana úr bílnum áður en við lögðum af stað, alveg satt! Við vorum því eina nótt í viðbót á Club Tihany og gistum svo í Regensburg á leiðinni heim. Ekki hægt að keyra heim alla nóttina, hefðum ALDREI getað það. Sem varð svo til þess að við höfðum tíma til að fara á lagersölurnar, gaman af því. Ég keypti mér eina skó........aðrir keyptu sér MÖRG pör. Sjá mynd......

Seydi á flesta af þessum......

Strákarnir fengu Bayern Munchen bol og stuttbuxur, einhver pör af skóm og bakpoka. Eyddum meira þarna heldur en í öllu fríinu........

Þetta er allt saman ágætt. Veðrið er fínt, aðeins svalt í gær og í dag, sennilega á morgun líka en svo bara hækkandi hitastig og sól. Er reyndar ekkert sniðugt fyrir bændur eða kafteina á Rínarskipunum, þurrkar og lækkandi árborð eru ekki góð merki fyrir góða uppskeru eða flutninga. Veðrið er samt bara eins og það er, ekkert hægt að breyta því. Ég vona bara að ég fái gott veður á Fróni, pant ekki fá rigningu og innan við 10°, DANKE.

Verð nú að setja eina mynd frá Ungverjalandi. Tihany þorp

Þetta er orðið gott.........loksins þegar ég blogga skrifa ég heila ritgerð, eins og mér finnst/fannst ÖMURLEGT að skrifa ritgerð, oj bara.

Segi bara, eigið góða viku og við sjáumst svo bara :)

Mátunarklefar...

2011-04-07T16:40:00.000+02:00

Ekki alveg uppáhaldið þessir klefar, ég er viss um að fangaklefar eru ekki eins "vondir" við mig, nema ef þeir eru lokaðir ;) Fór í einn svona klefa í hádeginu, skrapp aðeins í H&M. Þó ég væri bara að máta efri parta, fannst mér spegillinn, ljósið og bara allt, vera nógu slæmt..........eins gott að ég var ekki að máta buxur! Ég hefði lagst í þunglyndi (er ekki að gera lítið úr þessum sjúkdómi samt). Afhverju þurfti ég að erfa þessar stuttu og breiðu lappir hans pabba, WHY??? Mig langar stundum að skera aðeins utan af þeim, lengja svo smá í leiðinni..... Ef ég myndi fara í megrun eða breyta um lífsstíl, fara að hlaupa úti og svona, borða minna en ég brenni.....bara svona allsherjar átak.......þá myndi ég örugglega EKKI leggja af "að neðan" heldur missa allt að ofan líka! Já og örugglega fljótar en að neðan........stundum pirra ég mig á þessu, bara stundum.....svona eftir að hafa heimsótt mátunarklefa.

Ég keypti mér samt hlýra-, stutt- og langermabol en eiginlega ætla ég að bíða með að kaupa mér mikið af fötum þangað til að tískursérfræðingurinn, hún Rakel Dögg, kemur í heimsókn. Ætla að fá hana með mér í búð(ir). Hún má kaupa sér eitthvað í leiðinni líka. Fæ svo Unni og Kristey til að dæma með henni, þær mega líka kaupa og skoða, ekki málið :)

Halterner Strasse

Þar sem vorið er komið, fer það að verða nauðsynlegt að fækka fötum nema þá að stikna. Þetta er allt í lagi ennþá, ekki það heitt að maður þurfi að sýna leggi og upphandleggi EN það styttist í það og þá verður maður sko að vera reddí með rakaða leggi og stífa bingóvöðva! Tala nú ekki um að fara í sund.....ÆI, fólk horfir þá bara, mér er stundum alveg sama en ekki alltaf........ ég reyni bara að vera sem mest ofan í lauginni eða liggjandi á handklæði, labba sem minnst um og þá helst með "pareo" utan um mig.

NEI, ég er ekki að fara í átak..........er alltof agalaus til þess og greinilega ekki alveg nógu óánægð til að byrja í átaki.

Klukkufærsla og annað

2011-03-27T12:55:00.000+02:00

Voðalega finnst mér vitlaust að færa klukkuna á vorin og haustin, gegnir engum tilgangi, absolut engum. Átti að spara rafmagn þegar þetta var tekið upp aftur á níunda áratugnum. Í dag segja allir að þetta skipti engu máli, rafmagnslega séð, ruglar bara alla í ríminu, 20% meiri líkur á hjartaáfalli þegar klukkan er færð áfram (eins og í nótt), fleiri árekstrar fyrstu dagana, kýrnar vita ekkert í sinn kýrhaus og mjólka bara áfram á sínum tíma en ég hef heyrt að bændurnir venji þær hægt og sígandi við klukkufærslunni! Þvílík vitleysa........bara að hætta þessu eins og Rússar munu gera, þeir ætla að halda sumartímanum áfram og munu því ekki færa klukkuna aftur í haust. Vonandi vakna þeir sem ráða þessu hér og hætta þessu bulli........

Hef verið löt með myndavélina undanfarið, hef ekkert verið að mynda, hvorki vorið né strákana en ég lofa að bæta úr því fljótlega. Veit ekki hvort ég finn einhverjar mynd til að setja með núna.........

Fann mynd úr sirkus Roncalli :)

Við skemmtum okkur vel í sirkus. Henrik var samt á mörkunum að vera nógu gamall (þroskaður) og leiddist stundum, fannst þó strákurinn með fótboltana geggjaður og kallaði "zugabe" (meira) og klappaði mikið. Ég á eftir að setja sirkus myndir inn á síður strákanna, geri það líka fljótlega.......

Foreldraviðtöl í næstu viku, hjá Henrik á morgun (og ég ætla að taka mér frí í vinnunni) og hjá Julian á þriðjudaginn. Ég ætla að undirbúa mig vel og mæta með bros á vör, ekki láta vaða yfir mig og ætla að svara fyrir mig ef mér passar ekki eitthvað. Vonandi stend ég við þetta........

Vorið fór í pásu í gær, það var svalt og rigndi smá en í dag er sólin komin aftur. Ekki kannski alveg eins hlýtt og undanfarið en vorlegt og fínt. Trén eru aðeins farin að grænka og páskaliljurnar blómstra, þó að það séu ekki páskar enda eru þeir mjög seint í ár. Þá ætlum við að skella okkur til Ungverjalands í 5 daga, verðum á sama hóteli og karlakórinn Hreimur. Verður ekki leiðinlegt að hitta þau gömlu og alla hina, verður líka gaman að koma að Balaton vatninu. Vonandi verður veðrið bara gott, ekki rigning, ég þoli ekki rigningu þegar ég er í fríi.........

Nágrannakonuherfan brosti til okkar um daginn.........meira að segja tvisvar! Hún er kannski búin að átta sig á því að við erum engin skrýmsli. Ég reyndar bannaði strákunum að hoppa í stiganum en annars höfum við ekki breytt neinu þó að ég hafi orðið ofur viðkvæm fyrir látum eftir að hún lét mig heyraða........svo bara sá ég að ég var að nöldra í strákunum útaf einhverju sem skipti engu máli og börn eru bara börn OG þau mega vera með hávaða!!!

Skellti mér í IKEA í gær og keypti aðra hillu á svalirnar. Aðeins farin að undirbúa vorið/sumarið en þó ekki búin að kaupa sumarblómin. Ætla samt ekki að geyma það eins lengi og í fyrra en meðan að það frýs af og til á nóttunni þori ég ekki að kaupa blóm. Fylgist bara með hvenær blómakonurnar hérna í hverfinu setja sín upp, þá get ég farið að kaupa :)

Kveðjur af Halterner Strasse

Pabbi

2011-03-19T12:14:00.001+01:00

Í dag er elsku pabbi minn sjötugur..........alveg ótrúlegt að hann sé virkilega orðinn 70 ára! Þegar ég var yngri var bara gamalt fólk 70 ára........ekki pabbi minn en þar sem ég eldist nú líka breytist hugarfarið og ég læri af reynslunni, við eldumst jú öll. Pabbi er góð fyrirmynd, fyrir honum er mikilvægast að gera sitt besta, veit ekki hvað hann sagði það oft við mig þegar ég var yngri, þennan boðskap gefur hann svo áfram til sona minna, ég líka. Ég reyndi alltaf að gera mitt besta og hingað til hefur það bara virkað vel. Ég gef það líka áfram að það er mikilvægara að vera í hreinum fötum heldur en að þau séu af dýrustu sort, þetta gaf pabbi mér líka á lífsleiðinni. Þó svo að við höfum ekki alltaf sömu skoðun á mörgu í lífinu þakka ég pabba fyrir hvernig ég er í dag (með hjálp elsku mömmu líka) og ég er þakklát fyrir það hvað þeim tókst vel til með uppeldið á okkur öllum fjórum ;) hehe

Þakkir fyrir brúnu augun, þau björguðu oft sjálfstraustinu á síðustu og verstu, hahahaha.

Ég þakka samt ekki fyrir stuttar lappir og fótboltakálfa.........þó svo að ég hafi lært að lifa með þeim.

Pabbi hefur líka glatt mörg hjörtu á ævinni, ung sem gömul og heldur því vonandi áfram næstu áratugana........

Hlakka til að hitta "þann gamla" í næsta mánuði og svo aftur í sumar. Alles Gute elsku pabbi.

Þín Inga Björk
PS: Þakkir til foreldra minn fyrir valið á nafninu mínu, passar vel við svona heimsborgara eins og mig :)

Breyta og bæta

2011-03-05T16:16:00.000+01:00

Ég er í þvílíku stuði til að breyta og bæta heima hjá mér núna. Keypti nýtt teppi og ljós í stofuna, breytti aðeins í eldhúsinu í dag og færði myndir hingað og þangað. Nú þarf ég að fá tíma hjá "rafvirkjanum" til að setja upp ljósið, treysti mér ekki alveg til þess að gera það sjálf........Hlýtur að vera vorið sem ýtir á mig að breyta til og bæta. Er samt ekki nógu dugleg að breyta sjálfri mér, þ.e. gera æfingar og hreyfa mig! Nenni bara engan vegin að vakna rúmlega 6 til að sprikla á hálftíma eða svo........fer nú nógu seint að sofa stundum. Ég sé því ekki fram á að losna við þessi aukakíló sem hanga á mér, eða réttara sagt, sitja sem fastast. En svona er þetta þegar ég geri ekkert í þessu af alvöru, aginn hefur aldrei verið mín sterka hlið og mér finnst bara gott að borða það sem er gott á bragðið, já OK, ananas er alveg góður, gúrkur líka, sólblómafræ einnig EN ég borða bara það sem ég vil, sama hvað það er og sama hvað stendur á innihaldslýsingunni (svona næstum því alveg sama). Er reyndar byrjuð að drekka te á morgnana í staðinn fyrir kaffi, bara svona að prófa en mér var stundum illt í mallanum og einhver gangur þar í gangi....... Ég kaupi örsjaldan lífrænt ræktað grænmeti eða kjöt, finnst verðlagið ekki sameinast gæðum og svo finnst mér ekkert að "venjulegum" mat. Hef aldrei hugsað mikið um hin og þessi aukaefni, eiturefni og ég veit ekki hvað. Hræðsluáróður kemst ekki að í mínum heila, fer inn um eitt og út um annað. Alveg það sama með þessi blessuðu gróðurhúsaáhrif en það er annað mál. Best að koma með mynd.

Blíða á 1.leik Henriks (3.frá vinstri)

Nú er leiktímabilið byrjað hjá Henrik, sem þýðir að flestir laugardagar næstu mánuðina fara í vakna snemma og drífa sig á leikina sem byrja kl.10! Æi, við höfum bara gott af því og Henrik stendur sig vel í boltanum og hefur mikinn áhuga. Hann er líka ansi góður, þó ég segi sjálf frá, er búinn að æfa í tæpt ár núna og hefur tekið miklum framförum. Julian hefur líka gaman af að vera með og hvetur bróður sinn vel.

16.mars ætlum við í sirkus Roncalli (ýta á Circus Roncalli) sem heldur upp á 35 ára afmælið sitt hér í Recklinghausen, þ.e. byrjar hér. Ætlum að fara með Tarek, mömmu hans og ömmu. Verður örugglega fjör þó svo að Henrik missi af fótboltaæfingu ;)

Aaaaaðeins farið að gulna, vorið skammt undan

Þó svo að það hafi verið kalt í dag (4°) er vorið komið, ég leyfi mér að halda því fram. Síðustu daga hefur verið sól og 9° hiti en svalt á næturna. Sólin ætlar svo að koma aftur á morgun til að ylja okkur, líka á mánudaginn þegar Karnevalið nær hápunkti með skrúðgöngu og látum. Við munum sennilega labba okkur í bæinn og næla í nokkra nammimola í poka. Vonandi ekki bara vonda mola með engu bragði........

Góða helgi, löng helgi hér, skólafrí á mánudaginn :)

Febrúarkuldi

2011-02-20T16:33:00.001+01:00

Já það er svalt núna þessa dagana, sólin skín þó í dag en undanfarið hafa verið um 2-3 stig og skýjað. Sólin hlýjar manni aðeins en þegar kaldur vindurinn þeytir um eyrun er erfitt að halda vorfílingnum. Skrapp aðeins í almenningsgarðinn með strákana áðan, hjóluðum þangað, og það var bara asskoti kalt. Sérstaklega puttarnir urðu fyrir kuldakasti og það var því gott að koma heim, hita kakó og drekka það með rjóma plús borða osta- og skúffuköku með.

Strákarnir í garðinum

Núna er afmælistörnin búin, ég fékk síðustu gjöfina í gær þegar Bärbel kom og færði mér bók, 2 gjafakort í bíó og boð um pössun :) Við Seydi munum sem sagt geta farið í bíó með góða pössun. Ekki amalegt það.

Oft er ég að velta því fyrir mér hvort ég eigi að halda áfram þessu bloggi, hvort ég eigi kannski að fara að blogga um "heit" mál eins og um launamismun kynjanna, feminisma, rasisma, sifjaspell, misnotkun, trúmál og fleira en kemst alltaf að þeirri niðurstöðu að ég sé bara alls ekki nógu góð í rökræðu að ég geti alltaf staðið undir því sem ég skrifa........hef aldrei verið góð í að rökræða þó svo að ég hafi vissar skoðanir. Ég held þeim oft bara fyrir mig, nenni engu tuði og rifrildi. Ég hef samt vissa skoðun á umskurði og þegar Seydi sagði að okkur væri boðið í umskurðsveislu í Aachen, hjá einhverjum fjarlægum ættingja, sagði ég NEI, þangað fer ég ekki.........það var alger undantekning að ég fór í veisluna hjá systur Seydi en í þessa færi ég ekki. Skil ekki til hvers verið er að skera heilbrigðan hluta af strákum, bara útaf hefðinni, allt annað ef að þetta er nauðsynlegt t.d. útaf þröngri forhúð. Þetta er víst "fyrsta brúðkaup" lítilla múslímskra stráka.......þeir eru ekki menn með mönnum nema vera "aflimaðir". Ég veit að kaþólikkar og gyðingar gera þetta líka og sjálfsagt fleiri en ég sé enga ástæðu til þess. Eru menn með forhúð eitthvað skítugri en hinir........ég hélt ekki!

Nei, ég held að ég haldi mig bara við persónulegt blogg, um daglegt líf á Halterner Strasse. Hætti mér ekki út á hálar brautir..........

Sá 1.krókussinn á afmælisdaginn

Veisluborðið á sunnudaginn fyrir viku

Ég ætti að setjast inn í rúm og taka bókina "Karlar sem hata konur" með mér og lesa smá. Ná úr mér hrollinum í leiðinni þó að kakóið hafi hjálpað mikið til.

Gleðilegan konudag og Góu :)

PS. Barnaland er eitthvað bilað, verið að sameina einhverjar síður svo að ég get hvorki sett inn myndir né skrifað í vefdagbókina...........

Endalaus afmæli

2011-02-10T16:09:00.000+01:00

Nú er ekki hægt að kvarta undan kulda, ónei.....ég ætti kannski að sleppa því að tala um veðrið svona einu sinni! Efast samt um að það sé hægt, það er alltaf hægt að tala um veðrið, endalaust. En vorið er eitthvað að láta sjá sig aftur núna, 10° hiti dag eftir dag, á samt að kólna næstu daga og fara að rigna en samt enginn vetur í augsýn. Páskaliljurnar eru farnar að láta sjá sig.......sjá hér:

Þær hafa reyndar stækkað síðan þessi mynd var tekin

Alveg indælt að finna vorið koma, finna skítalykt af ökrunum á leiðinni í vinnuna, mæta bændum með skítadreifara og ekki gleyma snjóklukkunum........

Tók eftir þessum þegar ég skrapp í bókasafnið

Nóg að gera þessa dagana, reyndar ekkert brjálað að gera í vinnunni en meira í einhverju standi. Er fegin að afmæli Julians er búið, var ekkert stress samt en því fylgir alltaf undirbúningur þó að hann hafi haldið það á innileiksvæði. Næsta afmæli er svo á laugardaginn þegar Florian og Bärbel koma í kaffi, á sunnudaginn ætlar fjölskyldan að koma í kaffi og mat. Spurning um að hafa bara keyptar kökur handa þeim, held að það sé best! Svo vanþakklátt þetta lið ;) Ætla svo að reyna að troða í þau argentínskri kjötsúpu en hvort að það verður "the hit" veit ég ekki, verð með eitthvað annað handa krökkunum allavega. Á eftir að ákveða hvað. Tengdapabbi er nú svo "bilaður" að hann vill bara heilagt kjöt.......sem er svo kannski ekkert heilagt..hver veit. Oft er lífrænt ekkert lífrænt.....allt til. Ekki myndi ég láta einhverja trú ákveða það hvað ég ætti að borða og hvað ekki, dytti það bara aldrei í hug. Gæti nú haldið heila ræðu um svínakjötsát, eða ekki svínakjötsát. Meiri vitleysan finnst mér. Mér finnst nú nóg að þurfa að fara eftir lögum og reglum en að þurfa/vilja svo að fylgja einhverjum trúarreglum, neeeeeeeeeee. Nóg um það, hehe.

Eitthvað er að þykkna upp núna, ég meina svona veðurslega séð, rigningin sennilega á leiðinni. Ætli þvotturinn minn verði þá nokkuð þurru þó hann standi undir þakskegginu?? Ég set hann þá bara inn.

Loksins eru komnir nýir nágrannar við hliðina á okkur, hjón með 1 son sem er 4 ára. Loksins fleiri börn í stigaganginn. Þau eru svona hálfflutt inn sýnist mér en ég er fegin að það kom ekki enn einn eldri borgarinn í húsið. Ekki að ég hafi neitt á móti þeim enda faðir minn, mun bráðlega, eldri borgari með rentu. Samt eru eldri borgarar ansi duglegir að kvarta og kveina. Eru núna að mótmæla því að ný lög, um að leikskólar verði leyfðir í íbúðarhverfum, komi kannski!! Sérstakt eldri borgara ráð CDU (kristilegir demókratar) mótmælir (já flest er nú til). Þjóðverjar eru bara orðnir svo óvanir barnahávaða, þ.e. hlátri, gráti, öskrum og því sem þeim fylgir, að þau hrökkva upp í hvert skipti sem heyrist smá hljóð. Þessir borgarar voru sennilega aldrei börn, allavega laaaaaaangt síðan.

Þeir sem lesa þetta fá stórt knús frá mér :)

Ennþá kalt

2011-01-30T11:43:00.001+01:00

Enginn endir á þessum kulda, allavega ekki í bili. En þar sem það er hæð yfir landinu er veðrið ofur rólegt, logn og í gær var sól. Fínt að hafa þetta bara svona, betra en aðeins hlýrra og rigning.

Vorið er samt eitthvað að reyna, komnir hnappar á nokkra runna og tré, krókussar gægjast upp úr jörðinni og moldvörpurnar mættar.

En meðan að það er svona kalt, fer náttúran á "hold", stendur bara í stað. Vona bara að veturinn verði ekki eins langur og í fyrra.......

Veikindi hafa hrjáð okkur undanfarið. Henrik með bronkítis og Julian kvef og fékk svo hita í vikunni. Við urðum samt að sinna ýmsu, ég fór aðeins í vinnuna á fimmtudaginn, svo átti Henrik tíma hjá lækni til að hlusta og þar á eftir áttum við þrjú tíma hjá tannsa. Þar var gert við holur hjá báðum og mínar framtennur slípaðar, eins og vanalega......ég þurfti því að borga 10 evrurnar komugjald en fyrir bara skoðun þarf ég ekki að borga neitt. Tannsarnir eru svo ekki með í kerfinu hjá hinum læknunum svo að ef ég þarf til læknis á þessum fjórðung verð ég að borga 10 evrur þar líka, reyndar bara einu sinni og get þá farið til eins margra lækna og ég vil. Er nú samt ekkert mikið fyrir að fara til læknis, annað en flestir Þjóðverjar. Þeir eru heimsmeistarar í læknisheimsóknum eða um 18 sinnum á ári!! Get rétt ímyndað mér hvað sumir fara OFT en ég fer kannski þrisvar á ári...... Það þarf eitthvað að gera í þessu, t.d. að hafa komugjald í hvert skipti. Svo þarf að sameina sjúkrakassana og hafa þá færri en þeir eru bara of margir og hver með sitt batterí....... Alltaf að hækka gjöldin og taka aukagjöld. Get samt ekki kvartað yfir þessu kerfi t.d. fá strákarnir allt frítt.

Jæja, nóg komið af kvarti. Best að setja aðra mynd inn.

Gat loksins hengt út þvott, þrátt fyrir kulda.

Þetta er orðið ágætt í dag. Segi bara bless í bili

Vorið er farið....

2011-01-20T17:25:00.000+01:00

....og orðið kalt aftur. Ekkert gífurlega kalt en í dag var um 2° hiti og það kallast nú ekki hlýtt, er víst eðlilegt fyrir janúar en ekki 13° eins og fyrir nokkrum dögum. Ég hef bara ekkert verið að mynda undanfarið enda allt grátt, brúnt og ljótt.......ekki beint uppáhaldstíminn, svona náttúrulega séð. Reyndar eru sumir akrar grænir, bændur búnir að sá einhverju. Spurning hvort að það lendir undir snjó?! Það snjóaði nokkrum kornum í nótt en það var fljótt að fara.

Hef ekkert hitt nágrannakerlinguna síðan síðast. Hef reyndar ekki hitt hana nema einum þrisvar sinnum síðan að hún flutti inn, man ekki alveg hvenær það var samt. Sama er mér, langar ekkert að hitta þessa fúlu kerlingu. Ég trúi samt alltaf á hið góða í manneskjunni og hef því tekið á því að trampa ekki niður stigann, þ.e. segja strákunum að labba rólega, þó þeir séu í þungum vetrarskó. Litli kútur með sínar stuttu lappir þarf stundum að trampa smá en það er ekkert hægt að gera í því, sorry fúla kerling!

Best að setja inn eina gamla góða.........those were the days :)

Þekkiði þessar skvísur?

Látum þetta gott heita, ætlaði bara að láta vita að vorið fór í frí, örugglega til Tyrklands.......

Knús

Vorið er komið.....

2011-01-16T11:35:00.000+01:00

...nei ekki alveg EN það er 10° hiti og sól í dag, fuglarnir syngja og einhvern veginn liggur vor í lofti!

Ég er samt ekki nógu sátt í dag......þegar ég kem heim eftir að hafa sótt strákana í gærmorgun (þeir sváfu hjá ömmu og afa) spurði nýja nágrannakonan (býr 2. hæðum fyrir neðan) hvort hún mætti spyrja mig að svolitlu. Ég hélt það nú...... hefði kannski átt að segja nei því að hún byrjaði að romsa út úr sér,í ömurlegum tón, hvort að strákarnir þyrftu að hoppa í stiganum,þ.e. 3-4 tröppur og lenda neðst, já og hvort þeir væru eiginlega á skónum inni, þeir væru hlaupandi um eins og íbúðin væri 150 fermetrar! Ég varð eiginlega hálf hissa, aldrei hefur neinn sagt neitt við okkur, mér hefur alltaf liðið vel hérna. Ég veit alveg að strákarnir eru eins og fílar þegar þeir labba niður stigann, sérstaklega í þungum vetrarskóm, þeir hafa líka hoppað nokkrar tröppur já já, ég hef oft sagt þeim að labba nú varlega en að þetta sé á hverjum degi er sko alls ekki satt. Já og hún kvartaði sérstaklega yfir því þegar þeir fara í skólann, hvað þeir hefðu þá hátt! Það er bara alls ekki satt, þeir reyndar labba/hlaupa frekar hratt niður stigann og það bergmálar talsvert frammi en ég get nú ekkert gert af því. Við búum ekki á elliheimili en erum þau einu sem eru með börn......reyndar voru börn í heimsókn hjá öðrum nágrönnum í jólafríinu, kannski heyrði hún líka í þeim. Ég, eins og alltaf, hef endalaust verið að hugsa um hvað ég hefði átt að segja, kom engu almennilegu út úr mér.......oh, alltaf saman sagan. Mér líður í fyrsta skipti illa í þessu húsi.....Seydi sagði að þetta væri góð ástæða til að fara að leita að húsi......fyrir alvöru! Samt ætti ég að spjalla aðeins við hina nágrannana fyrst, aðeins að heyra hvað þau segja, opna munninn í staðinn fyrir að ergja mig í hljóði. Ég vona svo innilega að það flytji inn barnafólk fyrir neðan okkur en Frau Pralat lést rétt fyrir áramót. Þá getur nýja nágrannakonan haft hlaupandi krakka beint fyrir ofan sig, hehe.

Annars var helgin fín, fórum út að djamma á föstudagskvöldið. Systir Seydi átti afmæli á miðvikudaginn og við ákváðum að fara öll út á lífið, þ.e. systkinin 4 og makar. Reyndar var maður Sultan heima með hnakkaverk, gat varla hreyft hausinn. Við fórum í Ratskeller, staðinn undir ráðhúsinu. Fyrst þegar við komum var enginn mættur svo að við skruppum á pöbb og drukkum 1 drykk þar en ákváðum að fara aftur seinna. Þá var sko komið líf á staðinn! Fullt af fólki, góð músík og ég og Sultan dönsuðum heilan helling. Ég hitti bæði Nadine (fóstru strákann) og sá kennarann hans Julian. Samt voru þetta mest unglingar, svona miðað við mig ;) Þar sem ég drakk ekki of mikið leið mér bara ágætlega í gær. Ældi ekkert, það er nú alger framför.......

Veit ekki hvort að ég finn einhverja mynd til að setja inn........kannski bara eina vetrarmynd svona í tilefni þess að allur snjór er farinn.

Vetrarkyrrð

Ég virðist ekki eiga í vandræðum með að logga mig inn núna. Ég læt þig samt vita ef mig vantar hjálp Stella :)

Bið að heilsa ykkur í bili

Gleðilegt ár

2011-01-04T20:02:00.000+01:00

Megi þetta ár verða öllum gleðiríkt.......bloggið er eitthvað að stríða mér, vill ekki opnast á Firefox, vantar eitthvað "Certificate" dæmi, æi ég fór bara framhjá því á Explorer og ákvað því að rita niður nokkur orð. Engin mynd mun þó fylgja í dag þar sem ég er í vinnutölvunni, sem er hér heima, og engar nýjar myndir þar. Kannski ég setji bara einhverja gamla, svona til að líta um öxl, er það ekki hefð um áramót??

Ég lít um öxl og sé mig fyrir næstum því 9 árum, alveg að fara að eignast mitt 1.barn.......flottur bolur!

Hef reynt að draga strákana út síðustu daga, það er voða þægilegt að hanga inni í jólafríi og leika í Nintendo. Skólarnir byrja ekki fyrr en 10.jan......ég er búin að biðja Seydi um að sækja um á geðsjúkrahúsi á mánudaginn.......ég er ekki að gera grín af geðveikum en þar sem strákarnir vildu ekki fara í gæslun (sem er í öðrum skóla í þessu fríi) erum við MIKIÐ saman, daginn út og inn. Það getur tekið á taugarnar, já já.
En á sunnudaginn splittuðum við strákunum, ég fór með Henrik að leikhúsinu að renna og Julian var heima hjá Seydi. Í gær fórum við svo öll, nema Seydi auðvitað, að renna í snilldar færi. Í dag var svo skautaferð á dagskrá. Flott skautasvell fyrir framan ráðhúsið og það var svo gaman að strákarnir vilja helst fara aftur. Sjáum til, það lokar á laugardaginn en við getum þó alltaf farið á skauta á íshokkívöllunum hér í kring t.d. í Dorsten, Herne eða Gelsenkirchen.

Ég er því vel þreytt núna, örugglega næstum því eins þreytt og á þessari mynd hér að ofan......andlitið á mér logar, ég er örugglega eins og karfi í framan. Fór nefnilega í pizzubakstur þegar við komum heim og hitnaði við það. Pizzan var góð, mmmmmmmm en ég ætla samt ekki að borða yfir mig. Passa línurnar, hehe. Þyngdist reyndar ekkert yfir hátíðarnar svo þetta er allt í góðu, þannig......mig langar alveg að losna við nokkur kíló en ég er búin að biðja um fitness disk fyrir Xbox í afmælisgjöf. Get þá hamast hér heima við, það verður fínt.

Vó, ætlaði sko ekki að skrifa svona mikið.........orðin gott í dag.
Bis dann

Ósk um gleðilegt ár

2010-12-31T19:15:00.000+01:00

Rennið vel inn í nýja árið, eins og sagt er hér.......hérna munu örugglega margir renna í alvörunni því að það er glerhált, í morgun var íshúð á gangstéttum og bílum. Ég datt samt ekki á leið í bakaríið og til kjötkaupmannsins. Eftir hádegi fór ég EIN í bæinn, það var kærkomin stund og þegar heim var komið var ég áfram ein, það var indælt svo ég skellti í kurltoppa, reyndar ekki alvöru, setti annað súkkulaði........ætla að luma á lakkrískurlinu aðeins lengur. Þar sem topparnir pössuðu ekki allir á eina plötu gerði ég bara botn úr restinni, skellti rjóma á hann og frosna trópíska ávextir þar ofan á.......ætla með tertuna til Sultan mágkonu á eftir. Við munum eyða áramótunum þar, förum alveg að leggja í´ann. Sitjum bara hér og horfum á TV, höngum á netinu og fleira mis gáfulegt. Ég er tilbúin, þarf kannski aðeins að laga á mér hárið og taka til dót í handtösku til að fara með. Ætla líka að taka slatta af heimabarnum með, þarf endilega að losna við eitthvað af þessu.

Ég set mér engin áramótaheit, ekki þannig. Mætti samt alveg slaka aðeins á, ekki stressa mig svona á smáhlutum ..... taka hlutunum með ró, ekki æsa mig og svo framvegis. Það er fínt áramótaheit. Njóta líka þess sem ég hef með bros á vörum. Neikvæðni fer illa með mann, ójá.

Gangið hægt um gleðinnar dyr kæru lesendur. Sjáumst á nýju ári.

Gleðileg jól...

2010-12-25T22:01:00.001+01:00

...gangið hægt um gleðinnar dyr en étið á ykkur gat.....ég er búin að því 2 daga í röð og sá þriðji verður á morgun!
Hjá okkur er örugglega strærsta grýlukerti bæjarins......

Knús í öll hús

1 dagur til jóla

2010-12-23T16:39:00.003+01:00

Ætla nú ekkert að blogga neitt mikið núna, bara nokkur orð svona á Þorláksmessu. Verði þeim að góðu sem borða skötu, ekki geri ég það en Seydi át þennan viðbjóð með bestu lyst hér um árið....

Ég fór í vinnuna fyrri partinn til að hjálpa smá til, tók strákana bara með. Þeir eru "örlítið" spenntir fyrir jólunum, smá þreytandi þessa stundina, mikið að kýta og nöldra.........er það ekki bara eðlilegt svona korter í jól???

Í fyrradag veiktist ég smá en mér leið svoooooooooooo illa seinni partinn, var viss um að eitthvað hefði nú verið í ólagi hjá Kínverjanum en við Seydi fórum út að borða í hádeginu. Ég fór því í bað og lagðist í rúmið og var þar þangað til daginn eftir, tja svona næstum því, náði nú í þvottinn og tók upp þátt fyrir Bärbel vinkonu. Fór ekkert í vinnu í gær, skellti mér til læknis sem heyrði smá hljóð í mallakút og lét mig hafa resept fyrir malladropum, MCP heita þeir nú og gera kraftaverk. Þar sem ég var í bænum notaði ég tækifærið og keypti jólagjafir handa strákunum, rogaðist svo með herlegheitin heim og pakkaði inn áður en ég náði í strákana úr gæslunni en í gær var síðasti skóladagurinn. Gæslan er reyndar opin í dag en við ákváðum bara að vera heima.

Núna er ég komin heim, sit við eldhúsborðið með þráðlausa netið mitt, hlusta á jólakveðjur. Hangikjötið er alveg að fara að sjóða og rauðkálið er byrjað að malla. Strákarnir leika sér í tölvunni og sjónvarpið er í gangi..... Þeir vilja helst opna pakka núna en það er bannað! Ég á eftir að kaupa mér eitthvað svo ég fari ekki í jólaköttinn, eiginlega gjöf handa Seydi líka en hann vill ekkert og segist ekki vanta neitt. Það eru opnar búðir í fyrramálið svo að ég ætla að drífa mig þá.

Óska öllum lesendum gleðilegrar hátíðar og farsældar á nýju ári. Reyndar getur alveg verið að ég bloggi aftur fyrir áramót en ef ekki, læt ég þetta standa líka. Hér verða hvít jól, grýlukerta jól. Ég þarf sem sagt ekkert að fara til Íslands til að fá hvít jól..........enda hefur það gengi brösulega að fá þau þessi síðustu tvö skipti sem ég kom um jólin, hahaha. Vantar bara fjall til að skíða í, þá væri þetta frábært. Get reyndar keyrt í fjöllin en það tekur um 2 tíma, veit ekki hvort að ég nenni því í þessu vetrarríki sem hér er núna.

Farið ykkur hægt og ekkert stress...........

10 dagar til jóla...

2010-12-14T20:01:00.000+01:00

...og ég á bara eftir að kaupa jólagjafir handa strákunum, Seydi og Bärbel, baka kannski smá og já, ætli ég verði ekki að kaupa eitthvað nýtt til að fara í, þó ekki væri nema nýja brók....... ómögulegt að fara í jólaköttinn! Kemst bara svo asskoti sjaldan ein í bæinn. Glatað að vera með strákana í bænum, þeim finnst svoooooooo leiðinlegt að fara í búðir, nema dótabúðir auðvitað. Reyndar er allt í lagi að fara með Julian einan en Henrik er alger horror, það bara verður að segjast.......

Ekki veit ég hverju ég ætla að klæðast á aðfangadag enda eru þetta kannski 2-3 tímar sem ég er fín og svo taka bara lummuheitin við, þ.e. heimadress og sjónvarpsgláp. Þegar ég fer til Íslands er allt annað upp á teningnum, þá þarf að eiga mörg dress...... eitt fyrir aðfangadag, annað á jóladag, þriðja á jólaball, fjórða á gamlárs og eitthvað fleiri þar á milli. Þvílíkt stress sem ég slepp við í ár, hahaha. Svo á ég nú eitthvað að fínni fötum sem hanga inni í skáp og rykfalla því að þau eru svo sjaldan notuð. Ég er eiginlega hætt að kaupa mér "ofur" fín föt þar sem ég sé varla fram á að nota þau, er meira þessi praktíska týpa og finnst auðvitað best að vera í gallabuxum og langerma bol, kannski vesti utan yfir ef það er kalt. Lopavestið frá Unni er í miklu uppáhaldi þessa dagana, ég er ansi hrædd um að ég þurfi að þvo það á næstunni......já hrædd um, því að ég er skíthrædd um að skemma það! Á ég að treysta ullarstillingunni á þvottavélinni??? Ég á alveg þvottaefni fyrir ull en ég bara má ekki láta vestið hlaupa.......það væri hálfgerður heimsendir.

Best að ath. hvort ég eigi mynd handa ykkur..........

Jólin, jólin, jólin koma brátt...

Ég veit, fyrir ykkur sem eruð á facebook er þetta ekki ný mynd en mamma, kvittarinn mikli, er ekki búin að sjá hana.....nema hún hafi fengið að kíkka hjá einkasyninum, efast samt um það. Mamma, fyrir þig :) Ég dreif bara í því að skreyta en Julian vildi endilega ná í jólatréð svo ég lét af þeirri ósk þó að hefð hafi verið fyrir því á Garðarsbraut 53, að skreyta tréð á Þorláksmessu. Ég bý bara til mínar eigin hefðir, blanda þeim við gamlar hefðir en læt engan segja mér hvenær ég geri hitt eða þetta........Ég ræð mér sjálf. Nei, nei, það var enginn að segja mér að gera neitt, er bara að reyna að blogga um eitthvað, allt og ekkert, hitt og þetta, hehe.

Mig langar svo til að komast í klippingu fyrir jól. Er samt ekki búin að finna neinn klippara sem ég myndi endilega fara aftur til og í strípur hef ég aldrei farið......hér í Þýskalandi sko. Treysti þeim ekki alveg, nema ég fari á einhverja fína stofu en það er varla stígandi þar inn nema vera með millur í veskinu, svo segja sögurnar. Mér fannst klippingin á fréttakonunni í "Megamind" bíómyndinni ansi girnileg en með mitt liðaða hár veit ég ekki hvernig hún kæmi út.......tek það fram að þetta er teiknimynd ;) Eða svona Pixar dæmi, þið vitið. Ef ég léti klippa mig frekar stutt núna væri ég komið með minn eigin háralit, geri aðrir betur.........Þó ég segi sjálf frá, þá er ég bara með nokkuð fallega brúnt hár, fyrir utan þessi nokkru gráu í vöngunum, mætti kannski vera meiri gljái en það má redda því. Sé til hvað ég geri.......

Þetta er skvísan úr Megamind :)

Jæja elskurnar, óska þess að jólastressið fari ekki alveg með ykkur. Mamma sagði alltaf fyrir jólin: Jólin koma þó að allt sé ekki tilbúið........

Jólin nálgast óðum...

2010-12-05T18:27:00.000+01:00

... og ég held að ég sé bara í góðum málum. Búin að kaupa allar jólagjafir sem fara heim, pakka þeim inn, skrifa á umslögin (er með standard kort handa öllum), kaupa kassa á pósthúsinu og koma þessu öllu í hann ásamt smá sætindum, skrifa á tollmiðann, meira sem þetta er orðið flókið allt saman........er víst ekki vel séð að skrifa bara "föt" (eða clothes á ensku) heldur á helst að skrifa "bómullar skyrta" osfrv........ég skrifaði þetta alveg eins skynsamlega og ég gat enda ekki endalaust pláss til að koma þessu öllu fyrir! Ekki gert ráð fyrir að fólk sé að senda marga tugi af mismunandi dóti eða hvað??? Æi, ég vona bara að pakkinn komist til skila fyrir jól, á að taka 5-10 daga að komast til Íslands. Nú svo þarf pósturinn á Íslandi endilega að vera með annað kóðakerfi en hér svo ég gat t.d. ekki fylgst með pakkanum á Íslandi í fyrra.........og hann kom á aðfangadag. Var löngu farinn úr landi, það gat ég séð. Vonum bara það besta.

Hér er allavega kominn jólasnjór, alveg spurning hvort að hann verður enn þegar jólin sjálf koma. Við skelltum okkur á þotu í dag. Komum svo hundblaut heim enda var hálfgerð slydda og slabb og blautt úti. Ég hitaði því kakó handa okkur til að ylja kaldar tásur og putta. Best að sýna ykkur fína snjókarlinn minn :)

Flottur með 66°N húfu, samt smá fúll greyið....

Ég labbaði ein í bæinn áðan, mikið var það nú gott, þrátt fyrir slabb og læti. Og viti menn....ég fann bæði dagatalakerti og aðventuljós, jibbí. Eitthvað sem er alger hefð hjá mér en aðventuljósið sem ég keypti í fyrra á flóamarkaði er klikk, fæ engar perur í það og ég var búin að leita að dagatalakerti útum allt! Fann það svo í dm-drogeriemarkt þrátt fyrir að starfstúlkurnar þar hefðu sagt mér um daginn að þau væru ekki til....... örugglega kerti frá því í fyrra eða hitteðfyrra (er þetta orð skrifað svona??). Þegar ég kem heim úr bænum, búin að ryðja þunga snjónum af bílunum okkar, mæti ég köllunum mínum á leið til tengdó. Æi, ég ákvað bara að vera heima og hlusta á jólastjörnuna, blogga og skoða facebook, hahaha. Er enn smá kvefuð og ákvað að taka töflurnar mínar góðu við nefholustíflum og þær eru að virka en í gær fékk ég í vinstra eyrað.....ég sem fæ aldrei í eyrun, ekki einu sinni sem krakki. Er skárri í dag en verð að passa mig.

Þokkalegt blogg í dag.......að ég skuli nenna þessu.

Knús á sunnudegi og gleðilegan annað í aðventu. Já og vitiði hvaðan aðventurkransinn er??? Nú auðvitað frá Þýskalandi, hvað annað :)

Nennekki.....

2010-11-25T19:04:00.000+01:00

.....að blogga þessa dagana, ætla ekki að fara að röfla um foreldra viðtalið hjá Julian sem fór alveg "úr böndunum". Læt duga að hafa skrifað í vefdagbók hans en þetta er geymt en ekki gleymt.........líður betur núna, þessi vika er búin að vera fín, nóg að gera í föndri, bakstri og amstri. Nokkrum jólagjöfum var reddað í dag. Hætti fyrr í vinnunni og skrapp í bæinn í Dorsten. Notalegt að versla þar, ekkert of mikið úrval en samt nóg. H&M, dm og co.klikka ekki. Náði svo í strákana og við beint til dokksa að láta bólusetja Henrik aftur við hlaupabólu (þarf að fara tvisvar) en í staðin fengum við okkur öll þrjú flensusprautu. Henrik fer bara aftur í næstu viku í bólusetningu. Ég er ekki frá því að ég sé hálf lasin núna, með kvef og örþreytt! Kannski eftir sprautuna?! Best að koma með myndir......

Mini kiwi sem Heri vinnumaður á verkstæðinu kom með :)

Í dag er Þakkargjörðin í USA, ekkert þannig hér, allavega ekki í sömu mynd. Reyndar er eitthvað svipað hér en það er í október,heitir "Erntedankfest" eða uppskeruhátíð. Ég væri alveg til í svona þakkargjörð með kalkún, fjölskylduna í heimsókn og endalaust át......verð að bíða fram að jólum, allavega með matinn. Er ekkert á leið til Ísland enda óhemju dýrt að fljúga með Icelandair, alveg óheyrilegt bara! Fyrst að ég kem ekki verður örugglega snjór, nokkuð víst held ég bara ;) Kannski fáum við snjó hér aftur, allavega er nógu kalt núna og spáð snjó í nótt. Kannski verður hált í fyrramálið, best að keyra varlega á morgun.

Jæja, önnur mynd

Jólamarkaðurinn opnaði á mánudaginn

Ég er svo að hugsa um að sleppa jólakortum í ár............EN eiginlega langar mig ekki til þess. Ætli ég panti ekki myndakort á netinu eins og síðustu ár. Nenni varla að skrifa á jólakort........úff, ég nenni bara engu! Á líka eftir að pakka inn jólagjöfum, kaupa nokkrar og baka smákökur. Gerði piparkökudeig í gær til að Julian gæti farið með það í skólann. Það heppnaðist bara feykivel :)

Læt þetta duga í dag........ætla að spjalla við mömmu á msn.

Knús

Gestir farnir

2010-11-12T16:07:00.001+01:00

Ég þori allavega að staðhæfa það að lúsirnar eru farnar, allar sem ein. Ég veit ekki hvað er búin að reyta mörg hár úr mínu höfði en í hvert skipti sem mig klæjaði, eða að mér fannst vera hreyfing í hárinu, greip ég í kambinn góða og þjösnaðist í hárinu........eins gott að ég er með þykkt og mikið hár! Annars væri ég hálf sköllótt. Ég óska engum þess að fá þessa óboðnu gesti en ég sá í sjónvarpinu og m.a.s. súperstjörnur eins og Madonna fá líka svona gesti, hehe.

Smá haustlokamynd til að lífga upp á stemminguna.

Nú er mig virkilega farið að langa í að komast EIN í búðir, þarf svo að fara að huga að jólagjöfum. Ég sé ekki fram á það á næstunni, alltaf eitthvað um að vera, mikið að gera í vinnunni líka. Ætli það endi ekki með því að ég panta flest á netinu, ætti kannski að huga að því, ekki svo vitlaus hugmynd. Mig langar samt að komast ein í búðir, helst með þúsund evrur með mér.......bara spreða. Er samt viss um að ég myndi ekki finna neitt sem mig langar í en það er annað mál ;)

Í næstu viku eru foreldarviðtöl í skólanum og ég gæti skrifað heila ritgerð um hvernig það gekk að fá réttan tíma hjá kennurunum. Best að hafa þetta stutt samt....... Fyrst fékk ég blað til að fylla út, hjá Henrik hvenær ég kæmist ekki, hjá Julian hvenær ég kæmist......OK. Hjá H. fékk ég tíma á mánudaginn kl.13:45, hjá J. á þriðjudaginn kl.14:40.......fattaði þá að ég þarf að fara með H. í heyrnarpróf á þriðjudaginn kl.15:15, í bæ sem er í um hálftíma fjarlægð.....OK, ég bið um nýjan tíma fyrir J. Fékk það og hann er á mán. kl.13:40.... .....glæsilegt.......gleymdi að segja hvenær ég ætti tíma hjá H. Þvílík hringavitleysa, ég var algerlega komin með rugluna í gær. Skrifaði bréf til kennara J. um að fá enn nýjan tíma EN J. gleymdi að láta hana hafa miðann.......SHIT, hvað geri ég nú??? OK, ég skrifa bara bréf til beggja kennaranna um að ég muni vera á staðnum, mæta þar sem ég kæmist fyrst að (oftast þarf maður að bíða, sumir foreldrar hafa mikið að spyrja osfrv.). Vona svo að strákarnir sýni nú kennurunum bréfin á mánudaginn. Náðuð þið þessu......ef ekki, skiptir ekki máli. Það er föstudagur og það er uppáhaldsdagurinn minn. Ég fór í bakaríið og keypti bakkelsi, borðaði það og drakk örbylgjuhitað kaffi með. Úti er haustveður, hvasst og þungbúið. Best að vera bara inni, þvo þvott og hanga á netinu........

Góða helgi og takk fyrir innlitið.

Smá andi

2010-11-03T20:33:00.000+01:00

Bara smá samt......veit ekki hve mikinn frið ég fæ til að skrifa nokkur orð. Strákarnir eru reyndar ný farnir inn í herbergi að dunda, eða eitthvað, er ekkert að trufla of mikið. Eina sem komið hefur var "Mamma, Henrik er að trufla mig".......alltaf sama sagan. Ég sagði bara, "Æi strákar" og hef ekki heyrt meira síðan.

Eiginlega hafði ég svo mikið að segja en núna er eins og allt sé dottið út, ég held að þetta lúsaeitur hafi hreinsað til fyrir innan hauskúpuna líka. Alveg hreint ótrúlegt. Mig klæjar enn í hausinn og gríp í kambinn um leið og mig klæjar......hef ekki fundið lús í dag, 7,9,13, Þetta hjálpar sjálfsagt ekkert, hef hingað til ekki verið hjátrúarfull en mér finnst þetta bara passa við núna. Þessi lús hefur haft okkur í heljargreipum í viku! Henrik greiddi mér aðeins áðan og leit yfir hárið, fannst það nú heldur mikið samt. Ég sagði að lýsnar væru farnar og þá sagði dúllan "Getum við þá knúsast?" Auðvitað gerðum við það........Reyndar áttum við góða stund í gærkvöld, kúrðum öll (ég og strákarnir) áður en að þeir fóru að sofa. Það er toppurinn á tilverunni, sérstaklega hjá Julian.

Nú er aldeilis orðið dimmt seinni partinn. Síðan að klukkan var færð aftur um klukkutíma er fyrr dimmt á kvöldin en þeim mun lengur bjart á morgnana. Gott þegar skólar byrjar kl.8 en núna er ekki dimmt þegar við löbbum þangað. Henrik vill enn að ég fylgi honum og ég geri það, eins lengi og hann vill. Mér er alveg sama þó að það sé mælt með því að krakkar labbi einir eftir nokkrar vikur.......maður veit aldrei hvað getur gerst þó að þetta sé stutt leið. Julian vill ekki labba einn þegar hann þarf í 2.tíma og þarf helst að sjá einhvern til að labba inn á skólalóð. Vill vera viss á því að einhver sé þarna. Æi þeir eru báðir yndislegir blessaðir.

Hey, gleymdi næstum því að setja inn myndir.........

Þessi hjú auglýstu Þakkargjarðar markað í Hochlar bæjarhlutanum

Recklinghausen leuchtet=RE upplýst

Síðustu dagar laufsins á trjánum eru fallegastir

Nú eru laufblöðin alveg að hverfa, falla til jarðar ótt og títt, sérstaklega þegar hvasst er. Í gær lenti ég í stórhríð, þ.e. laufblaðastórhríð. Ég elska þessa hríð, ég fyllist angurværð í svona hríð. Yndislegt. Enn er frekar hlýtt í veðri, 14° í dag og spáð hlýrra á morgun. Svo er víst spáð kaldara, kannski að veturinn sé bara á næsta leyti.......hver veit? Vonandi ekki alveg strax, fyrst mega nú laufin falla alveg af trjánum en sum eiga nokkuð í land. Laufin eru varla fallinn til jarðar þegar einhver kemur og rakar þau í burtu, ef þú gerir það ekki og einhver fellur fyrir utan hjá þér er hægt að sakast við þig.......það er bara þannig. Á sumum götum koma þeir sem vinna hjá bænum og raka/blása saman laufunum, henda þeim svo í tilheyrandi tunnur. Það sést m.a.s. í svona græna tunnu á neðstu myndinni. Laufblásararnir eru háværir, hrikalega leiðinlegt hljóð í þeim, verra en slátturvélasuð eða trjásög. Sem betur fer eru þeir ekki mikið notaðir fyrir utan hjá mér því að bæjarstarfsmennirnir byrja oft MJÖG snemma að blása........

Læt þetta duga í dag, Henrik er kominn til að "trufla", hann vill að ég lesi allt bloggið fyrir hann. Erfitt fyrir hann að lesa íslensku en hann er orðinn ansi sleipur í þýskunni, þ.e. að lesa. Ég þyrfti að fá einkakennara til að vera með strákana í íslensku........Hjálmar, langar þig ekki bara að koma sem Au-Pair? Hahahaha. Yrði reyndar að fá mér stærra húsnæði til að taka á móti barnapíum. Ekkert gengur eða rekur í því, erum kannski ekki að leita með miklum móð en alltaf með augu og eyru opin. Lítið að hafa, annað hvort hús á hálfa milljón eða hreysi á 100 þús. Ég ætla ekki að kaupa hús, bara til að kaupa hús.......verð að velja vel. Kona sem við þekkjum vinnur sem fasteignasali og hún sagði "Númer 1 er staðsetning, nr. 2 er staðsetning og nr.3 er staðsetning"! Sjáum til hvað verður........

Kallinn kominn heim, bara snemma í því í dag, klukkan er bara hálf níu. Og ég sem eldaði ekki neitt, át bara samlokur með skinku og osti. Strákunum til mikillar gleði. Henrik át tvær :)

Bið að heilsa og við heyrumst síðar gott fólk.

Andinn fer að koma...

2010-11-01T19:43:00.000+01:00

...örstutt. Andinn er ekki kominn, gef mér ekki tíma til að blogga almennilega, vildi samt láta vita af mér. Að ég sé enn lifandi þrátt fyrir lúsagang..........þessir óboðnu gestir settu allt úr skorðum í mínu lífi, ég fékk næstum því taugaáfall, varð "paranojuð" útaf mylsnu og húðflögum, hrikalega pirruð bara! Þetta bitnaði á öllum í fjölskyldunni, eins gott að hún er ekki stór. Ég klippti strákana vel í gær, greiði mér og þeim oft á dag. Úff, þetta var ömurleg vika, þannig.
Skrifa meira seinna.........lofa því og þá fylgja myndir með.

Bleyta

2010-10-16T12:10:00.000+02:00

Engin haustblíða lengur, heldur er komin rigning og hitastigið ekkert til að hrópa húrra yfir, rétt skríður yfir 10° þessa dagana. Suma morgna í síðustu viku var svo kalt að það var frost við jörðu og sumstaðar þurfti að skafa rúður! Þegar það er svona bjart yfir er frostið fljótt að koma. Mætti halda að ég hefði ekki um neitt að skrifa nema veðrið......gerir maður það ekki þegar ekkert er að frétta? Er kannski eitthvað að frétta? Alveg spurning.

Ég er allavega búin að losa mig við þessi aukakíló sem ég bætti á mig þegar ég kom frá Tyrklandi. Ekki að ég hafi samt verið dugleg að labba úti, nei, því er af og frá. Ég byrjaði rosa dugleg en svo fékk ég helvítis kvefið og þegar það var farið var orðið svo dimmt úti klukkan 6 á morgnana, að ég hætti mér ekki út. Ætla mér frekar að hætta fyrr í vinnunni og hreyfa mig áður en ég næ í strákana. Geri það þegar skólinn byrjar aftur en núna er haustfrí. Var nú svo vond mamma að ég sendi gaurana í gæslu þar sem ég er í vinnu. Julian er nú ekki beint hrifinn af því að þurfa báðar vikurnar í gæsluna, þetta sé sko ekkert frí, segir hann. Við ræðum kannski við "bossinn" um að fá frí einhverja daga í næstu viku ;)

Best að koma með eina mynd eða svo.......

Séð frá göngubrú rétt hjá slökkvistöðinni

Mikið var gott að vera í fríi í mánudaginn en ég þurfti til kvennsa kl.10 og ákvað að vera bara í fríi. Ég vafraði svo um bæinn eftir læknisheimsóknina en fann bara ekkert sem mig langaði í.......fattaði ekki fyrr en eftir á að auðvitað hefði ég átt að nota tímann til að kaupa jólagjafir. Alveg asni get ég verið, alltaf með jólagjafirnar á síðustu stundu. Ég hlýt að finna mér tíma til að kaupa eitthvað fallegt handa vinum og vandamönnum, ef ekki panta ég bara gjafir á netinu og læt færa mér heim. Allt hægt að fá á netinu, næstum því allavega. Ætli ég muni eftir að kaupa litlar og léttar jólagjafir í ár???? Efast um það, í fyrra sendi ég tæplega 8 kg. pakka til Íslands! Sem er náttúrulega alger bilun en ég er aldrei vitur eftir á þegar kemur að jólagjöfum, úbbs.

Laugardagur í dag, Seydi farinn að kaupa bíla, strákarnir leika sér, ég búin að baka "cup cakes" úr pakka. Bíð eftir að þær kólni svo ég geti sett kremið á, þarf reyndar að hræra það fyrst. Hálf hráslagalegt úti núna, rigning af og til og þungskýjað. Nóvemberlegt veður, segja spekingarnir. Þarf að fara að huga að graskeri til að skera út í. Keyri nú framhjá graskerja söluskúr á hverjum degi, þarf bara að gefa mér tíma og stoppa einn daginn. Hlusta á Rás 2 á laugardegi, indælt.......ha, á að snjóa fyrir norðan á mánudaginn? Svo segja þau á Rás 2. Veturinn er sem sagt ekki langt undan, bæði hér og á Íslandi. Vona að skíðaíþróttir fari að byrja í TV, hlýtur að styttast í það.

Góða helgi allir.

Breytingar enn og aftur.....

2010-10-10T00:09:00.001+02:00

....nenni samt ekkert að blogga núna enda komið yfir miðnætti, það er sem sagt kominn 10.10.10. Örugglega margir sem gifta sig í dag. Ekki ég samt...... Kannski finn ég mynd til að senda með þessu breytta útliti, æi ég varð bara að setja eitthvað appelsínugult í tilefni af október, Halloween, graskerjum og svona. Hér er geggjað haustveður sem engan endi sér á, eitthvað á að kólna en það er allt í lagi meðan að blessuð sólin skín.

Sparkað í haustsólinni :) Þekkiði Henrik?

Segi bara góða nótt og sofið vel.

Blíða og ekkert nema blíða

2010-10-03T17:57:00.006+02:00

Var byrjuð að blogga í morgun þegar Seydi kom óvænt heim, hætt við fótboltann, mættu of fáir......ég ákvað því að geyma það aðeins að blogga, þarf frið til þess. Hef hann núna, í smá stund allavega. Seydi sefur, eða svaf, dyrabjallan hringdi og truflaði. Strákarnir leika inni í herbergi en þeir heimsóttu afa sinn og ömmu eftir bæjarferðina okkar. Í dag er víst þjóðhátíðardagur, reyndar sameiningardagur austur- og vestur Þýskalands. Það ber lítið á þessum degi hér, í bænum er bæjarhátíð, í Dorsten líka, búðir opnar og alles. Veðrið er alger æði, stuttermabola veður og sól. Má alveg vera svona áfram svo við fáum gullinn október, eins og sagt er hér.

Um daginn var svona þoka...

Í gær fyrir framan skólann

og í dag 22° hiti og sól :)

Æi,nú er friðurinn úti.......ég ætlaði að skrifa meira en Henrik vill spila ólsen, ólsen og ætli við verðum ekki að borða eitthvað.......

Heyri í ykkur seinna

PS. ég sé að myndavélin er með vitlausa dagsetningu......verð að breyta því NÚNA!

Rigningar mánudagur

2010-09-27T17:07:00.000+02:00

Vikan byrjar blaut hér á bæ, köld og blaut. Já mér finnst 10° ekki beint hlýtt svona í september en því verður ekki breytt. Kannski verður veturinn mildur, allavega vona ég að hann verði eitthvað styttri en í fyrra en snjórinn má alveg láta sjá sig, helst um jólin takk....... Talandi um jólin, eru ekki minna en 100 dagar til jóla, það er allavega komið jólanammi í búðir, m.a.s. dagatöl! Heyrði í móður í Lidl í dag þar sem hún var að útskýra fyrir dóttur sinni að dagatalið yrði að bíða inni í skáp þangað til 1.des. Það ætti ekki að opna það fyrr. Ég meina, hvað eiga börn að halda......súkkulaði jólasveinar í september.......jafnvel í lok ágúst! Jæja, ein mynd til að byrja með.

Ég keyrði til Gelsenkirchen á fimmtudaginn, þurfti að ná í mótorblokk úr slípun. Rakst þar á þetta fallega tré í haustlitinum. Sum eru komin lengra en önnur, sum eru búin að missa nær öll lauf, önnur eru algræn. Á leiðinni lenti ég líka á eftir "skítadreifarabíl".......komst bara ekki fram úr honum, aðstæður buðu ekki upp á það!

Eins gott að hann missti ekkert úr sér eða eitthvað gerðist.......um daginn klikkaði eitthvað hjá svona farartæki og fullt af húsum og bílum fengu skítasletturnar yfir sig! Gerðist í þorpi rétt hjá Köln. Það er víst enn skítalykt þar.

Er bara heima núna, væri sko annars á fótboltavellinum eins og góðri "soccermom" sæmir. En sökum rigninga fellur æfingin niður enda eru engir leikir á næstunni, skiptir kannski ekkert svo miklu máli. Ég var bara fegin að þurfa ekki út úr húsi og fór beint í heimabuxur og ákvað að blogga. Svo tekur eldamennska við, kjúllavængir + kartöflur úr ofni. Var með kálfasnitsel í gær, svona er það þegar Seydi fer í "Tyrkjabúðina", hann kaupir kjöt fyrir marga daga en í fyrrdag voru kálfakótelettur!!

Ein mynd að lokum. Fór með Henrik í bæinn í gær en Julian var í afmæli. Mig hefur oft langað til að sýna flottu blómakörfurnar sem hanga á ljósastaurunum hér, voða sniðugt og gerir bæinn fallegri. Væri ekki hægt að setja svona á Víkinni góðu?

Jæja, þetta er gott. Ég er enn með dúndrandi hausverk en kvefið er betra og nef- og ennisholur nokkuð góðar. Ég lifi bara á aspirín og panodíl þessa dagana.......verð eiginlega að redda mér íbúfen.

Eigið góða viku

Haustkvef og annað "skemmtilegt"

2010-09-21T12:22:00.000+02:00

Já já, mín komin með kvef og tilheyrandi, þ.e. nef- og ennisholustíflur......gaman, gaman. Átti sem betur fer Sinupret töflur heima og er byrjuð á þeim. Ákvað að vera heima í dag, Julian átti að mæta seinna svo ég labbaði mér í bæinn til að fá smá ferskt loft. Fór í dm, náði í myndirnar úr neðansjávarmyndavélinni sem var með í för í Tyrklandi, þær minna helst á myndir frá 9.áratugnum, allavega þær sem teknar eru ofansjávar......hvað um það, gaman af þessu :) Ég keypti mér líka nefsprey til að losa aðeins um til að geta nú andað með nefinu, lítur alveg hræðilega út þegar ég anda með munninum, ég er bara eins og fiskur :o

Ætli ég finni ekki einhverja mynd handa ykkur.........

Danssýningartjaldið á ráðhústorginu

Á síðasta fimmtudag fórum við á danssýningu í þessu tjaldi. Unglingar frá 8 löndum sýndu ýmsan dans. Julian fannst gaman en Henrik leiddist, var kannski heldur lítill en honum fannst þó gaman þegar dansað var hipp hopp. Örugglega gaman að vera unglingur í þessari sýningu, ferðast um og dansa :)

Oft dettur mér eitthvað sniðugt í hug til að blogga um en akkúrat þá gef ég mér ekki tíma til að setjast niður og blogga........sagði ég þetta ekki síðast líka..........setti ég eitthvað á Post-it miða.......NEI. Því verður þetta ekkert spennandi blogg, frekar en vanalega. Ég sit bara hér, horfi á fréttir og drekk heimatilbúinn "smoothie". Fór ekkert út að ganga í gærmorgun, var of slöpp. Sé til hvort ég kem mér út í fyrramálið........Veðrið er nefnilega alveg indælt, rólegt haustveður og hlýtt. Má alveg vera svona áfram.

Bis dann

Haustið nálgast

2010-09-08T19:38:00.000+02:00

Ég er alltaf að fara að blogga........stundum er ég ekki búin að setja inn myndir í tölvuna, stundum hef ég ekki tíma, gef mér ekki tíma eða eitthvað þannig, stundum hef ég ekkert að segja en oftast er ég bara ekki í rétta stuðinu, alltaf eitthvað sem truflar mig. Núna læt ég ekkert trufla mig, strákarnir eru að horfa á TV og ég nýbúin að borða kartöflu/hrísgrjóna "eitthvað", svona mitt á milli súpu og "Eintopf" eða German stew, hvað á að kalla þetta á íslensku????

Áður en ég skrifa meira, mynd af veðrinu hérna um daginn.....þessu fylgdi þokkaleg rigning!

Veðrið hefur verið bæði gott og minna gott, haustið er ekki langt undan svo að það eru oft sveiflur í lofti. Einn daginn 25° hiti og sól en þann næsta kannski 15° og rigning. Í síðustu viku var frekar svalt á morgnana, svo svalt að það koma "reykur" út um munninn. Haustinu fylgir oft "depurð".......reyndar finnst þér þetta orð ekki passa við orðið "Melancholie" en ég er að meina það. Google Translate segir depurð, hmmmm. Hér er þetta orð oft notað fyrir vissa þægilega tónlist sem sendir mann í draumaheima. Verð að kanna þetta betur. Þangað til segi ég bara "melankólísk" :) Er það allavega á norsku svo að þetta hlýtur að skiljast. Ég er allavega allt annað en döpur, svo mikið er víst.

Varð reyndar döpur þegar ég leit á vigtina fyrir nokkrum dögum...........SCHEISSE hvað hún sýndi mikið. Ég fór beint út að hjóla og er núna tvisvar búin að fara út að labba kl. 6 að morgni og stefni á að gera það 3var í viku, plús kannski hjólatúra já og að borða minna..........sérstaklega minna nammi! Ég þyngdist sko ekkert í Tyrklandi, sennilega útaf mikilli vatnsdrykkju, litlu sem engu nammi og sökum hita er matarlystin ekkert voðalega mikil. Eftir að ég kom heim hefur matarlystin aukist mjög og í skápnum var íslenskt nammi sem Hjálmar kom með.....mmmmmmmmmmmmm. Skammta sér Inga, go Inga, go Inga.

Oft dettur mér eitthvað mega sniðugt til að blogga um en þegar ég sest og blogga man ég það nú ekkert.... Læt þetta því duga í dag, verð að skrifa Post-it miða næst ef ég á að muna eitthvað sniðugt :) Regnbogamynd að lokum gott fólk.

Afslöppun

2010-08-27T15:21:00.000+02:00

Ég lofaði víst pistli, best að standa við það sem ég segi, er nú vön því.

Hér er alger afslöppun í gangi, bara verið að þvo þvott, versla, ganga frá eftir fríið, redda síðasta skóladótinu, laga til osfrv. Seydi skreppur af og til í vinnu, ég er "bara" heima ennþá en í næstu viku byrjar fjörið. Skólinn byrjar á mánudag en skólasetning 1.bekkjar er á þriðjudaginn. Spennandi tímar framundan og nú kemst enn meiri rútína á þar sem strákarnir verða báðir í gæslu til allavega 15. Kannski ég geti hætt af og til kl. 13 í vinnunni og haft smá tíma fyrir mig, kannski tekið mig til og farið út að ganga eða eitthvað annað gáfulegt..........

Þar sem flestir eru á facebook mun ég sennilega ekki setja inn mikið af myndum úr fríinu hér á bloggið. Mamma: Þú verður bara að skoða hjá HBH, ef þú ert ekki búin að því :)

Nú er alveg spurning hvort ég fari eitthvað út í ferðasögu.........ég held bara ekki, nema í grófum dráttum. Keyrðum 8500 km allt í allt, Búlgaría er mest hataða landið í minni fjölskyldu, í Tyrklandi var hitabylgja, það var verslað mikið af fötum, farið oft út að borða, legið í sólinni......hóflega þó, hlustað á tilheyrandi "holiday" tónlist.........eitthvað fleira?? Alveg örugglega, kem ekki meiru fyrir mig í augnablikinu. Set frekar inn myndir.

Frændur í kvöldsólinni í Silivri, Tyrklandi

Verslunarferð til Eskisehir

SPLASH

Hér er rigning en hlýtt. Samt skrýtið að þurfa að vera í síðbuxum, sokkum og peysu.......jafnvel í jakka þegar farið er út. Haustið er örugglega ekki langt undan. Allavega virðist ekki vera langt í jólin.........sá jólasætabrauð í Netto í morgun!! Ætti ég að fara að huga að jólagjöfum??? Er reyndar búin að kaupa eina. Nei, ég held að ég hugi fyrst að afmælisgjöf handa mömmu. Hvað langar þig í mamma???

Góða helgi

Þetta kemur, já já

2010-08-23T22:50:00.000+02:00

Bloggið kemur.......alveg örugglega mjög fljótlega bara. Er búin að breyta um útlit, það sést.....haustið er á næsta leyti og ég nýkomin úr fríi. Blogga betur síðar, lofa því. Þarf að setja myndirnar mínar í tölvuna fyrst......give me some time.....var bara að koma heim í kvöld.

Ég lofa að blogga fljótlega.......

Bleikt og aftur bleikt

2010-07-22T15:53:00.000+02:00

Allt í bleiku núna þessa dagana enda Mærudagarnir miklu. Mikið væri gaman að vera á staðnum en það er ekki hægt að vera alls staðar. Var reyndar að uppgötva, mér til mikillar skelfingar, að ef að Mærudagar eru helgina á undan Versló á næsta ári næ ég þeim varla..........nema að strákarnir skrópi síðasta daginn í skólanum en það er EKKI vel séð hér! Fólk jafnvel sektað........Sjáum til þegar nær dregur.
Óska öllum góðrar skemmtunar og gangið hægt um gleðinnar dyr.

Þarf eitthvað að skrifa við þessa mynd ;)

Arfaslök alveg......

2010-07-18T21:54:00.000+02:00

Viðurkenni það alveg að blogg var ekki alveg í 1.sæti meðan að mamma og pabbi voru í heimsókn..... ég hvorki gaf mér tíma til að blogga né vildi eyða tíma í það. Hélt líka að það læsi þetta hvort eð er enginn sála, allavega fáar sálir ;)

Nú eru þau "gömlu" lent á Íslandinu góða, veðrið fínt í borginni sýnist mér á fréttum. Vonandi taka þau bara sólina með sér norður svo að Mærudagar fari fram í sól og blíðu. Þau tóku allavega smá með sér héðan, ég mátti alveg við því að missa smá og tímdi því alveg. Ég sé Mærudaga ekki fyrir mér í roki og rigningu, fékk nú nóg af því á fimmtudagskvöldinu í fyrra!!! Nei, ég óska þess að það verði GOTT veður. Hér verður allavega gott veður svo langt sem spár ná, í dag var 24° og hálfskýjað. Fórum í afmæli til Jemain frænda strákanna en hann varð 5 ára gaurinn. Tók svo Demien bróðir hans með til okkar en honum finnst voða spennandi og gaman að sofa hér. Fínt líka fyrir strákana mína að hafa næturgest. Klukkan er nú að verða tíu og eini sem er sofnaður er Seydi...........hann hrýtur hér á sófanum. Ég sjálf fer nú að verða ansi þreytt eftir að hafa keyrt mö og pa til Dusseldorf um miðja nótt. Þau hljóta líka að vera þreytt en Rakel hlýtur að hafa keyrt eitthvað fyrir þau norður, trúi bara ekki öðru.

Best að setja inn einhverjar myndir.......augnablik.

Mamma blómarós með innkaupapoka (stal þessari hjá henni)

Sumarmynd ársins 2010

Nýi bíllinn okkar, Benzinn sko (stal þessari líka hjá mömmu)

Er þetta ekki bara fínt í dag........verð að koma strákunum í ró áður en ég sofna sjálf........leikskóli á morgun og vinna.

Góðar stundir

Smá fréttir

2010-06-29T11:02:00.001+02:00

Allt í góðu standi hér bara, hitabylgja á staðnum, mömmu til mikillar ánægju. Hún labbar bara um á hlýrabol og á tásunum, dag eftir dag :) Pabba finnst þetta alveg ótrúlegt, situr úti á svölum á kvöldin og dásamar veðrið. Finnst kannski heldur heitt yfir daginn en á kvöldin er alveg indæl. Þau gömlu eru orðin svo sjóuð í heimsóknum hér að þau labba sér í bæinn, fara út að borða, horfa á fótboltaleiki í bænum (aðallega pabbi þó) ofl. skemmtilegt. Ég og mamma fórum í 1. innkaupaferðina í bæinn í gær, alveg frábært að komast svona án strákanna í bæinn, já og án tímaþrengingar.......

Fyrstu mynd dagsins tók ég á leiðinni í vinnuna. Svo falleg þessi "Poppy" blóm :)

Ég, Seydi og Bärbel skelltum okkur út á lífið á laugardagskvöldið. Ætluðum svo rosalega á diskó en þar var bara tómt hús! Við renndum þá bara aftur heim og fórum hér í bæinn á pöbbarölt. Enduðum á bar þar sem hægt er dansa líka, ekkert mega stór dansgólf en alveg nóg. Skemmtum okkur konunglega......sem þýddi að sunnudagurinn fór í það að faðma setuna vel og lengi, já og verma rúmið sem lengst.........alveg merkilegt hvað bjórinn gerir við mig!

Næsta mynd er af þeim "gömlu" á 10 ára hátíð "Schnuppis" kórsins í leikskólanum.

Ýmislegt verður á dagskrá næstu daga. Í dag er Julian með bekknum í dýragarði í Dortmund, tannlæknisheimsókn seinni partinn, grill í fótboltanum á fimmtudaginn, fótbolti (Þýskaland-Argentína) á laugardaginn ofl. ofl.

Bestu kveðjur úr hitanum og til hamingju með daginn Guðmundur frændi og Viddi

Long time ago....

2010-06-20T18:53:00.000+02:00

Langt síðan síðast........alveg meira en 10 dagar. Það er svo erfitt að finna rétta augnablikið til að rita nokkur orð svo ég ákvað bara að rita, án þess að það væri rétta augnablikið......ég er nefnilega að drepast úr hausverk! Ætti frekar að sofa bara. Er reyndar búin að dotta og lúra í mest allan dag, horfði á leikina á HM, dottaði af og til, missti af seinna marki Paraguay t.d. Hjá mér kemst nú lítið annað að en HM þessa dagana, líka afsökun fyrir bloggletinni.

Er þó farin að hlakka til að huga að komu foreldra minna á næsta fimmtudag. Alveg farin að skipuleggja hitt og þetta. Fyrst af öllu að huga að því hvenær ég þurfi að leggja af stað til að ná í þau.......Lending er 6:20- skemmtilegur tími- og það tekur mig um 40 mín. að keyra til Dusseldorf. Þyrfti því að leggja af stað svona rúmlega 6, það tekur oft stuttan tíma að afgreiða farþega/töskur svona snemma morguns og þau gömlu gætu verið komin út fyrir 7. Vil nú ekki láta þau standa lengi og bíða eftir mér. En þetta reddast nú alveg, eldgosið er búið svo að ekki er hætta á ösku í lofti.

Tók mynd af rósum í gær en þær eru í blóma hér útum allt. Þyrfti eiginlega að fara í blómarósa-myndaleiðangur. Þarf ekkert að fara langt, bara í næstu götu. Þessi mynd er tekin í náttúrugarði sem náttúrusamtök (NABU) hér tóku yfir og umturnuðu en húsið sem fylgir með var að grotna niður. Mjög flott hjá þeim en leikskólinn mætti þangað í gær og við fórum í allskonar þrautir/leiki m.a. að veiða úr hálfgerðum drullupolli með sigti úr plastflösku og rýju, svo átti að hlusta/lykta/snerta hluti, búa til hús fyrir skordýr ofl. Hægt var svo að kaupa pylsur og vöfflur. Indæl stund þó að veðrið hafi ekki verið sumarlegt, um 15° og skýjað.

Þann 12.júní voru Scorpions með tónleika hér í almenningsgarðinum við leikhúsið. Tónleikarnir voru úti svo það var hægt að standa við hliðin og kíkja inn, ég og Bärbel gerðum það.....og margir aðrir. Löbbuðum svo um svæðið, keyptum okkur bjór og kíktum aftur á tónleikana. Veðrið var alveg æðislegt, logn og hlýtt. Þar sem þetta var síðasta kvöld Listahátíðarinnar í Recklinghausen ( Ruhrfestspiele) , var laser/flugeldasýning um kvöldið. Alveg magnað.....líka magnað að bjórinn var lækkaður í 1 Evru á flöskuna :) Ég drakk samt ekkert mikið og það er gott að geta labbað heim frá garðinum. Var bara ekki komin neitt seint heim en það var gott að komast út að skemmta sér aðeins. Stefnan er svo tekin á "Yfir 30" partý um næstu helgi, tökum Seydi með þar sem við verðum með bestu barnapíur í heim........

Æi,. þetta er orðið gott í bili. Veit ekki hvort ég blogga mikið á næstunni þar sem aðal kvittarinn verður staddur hjá mér ;)

Góðar stundir

Smá tími til að blogga...

2010-06-08T13:38:00.000+02:00

...áður en ég þarf að sækja Henrik í leikskólann. Best að gera það þá........

Eins og flestir vita skruppum við til Danmerkur um helgina sem var löng vegna frídags á fimmtudag og skólafrís á föstudaginn. Þetta passaði alveg því að Helga Dóra og vinkona voru stödd hjá Elfu svo það var upplagt að skella sér. Strákarnir voru rosa hrifnir og skemmtu sér vel, sérstaklega í Legolandi. Ég átti yndislega helgi með góðu og skemmtilegu fólki. Ógleymanleg dvöl í alla staði. Keyrslan var ekkert spes en hún tók heldur langan tíma þar sem Þjóðverjar eru svo duglegir að breikka og laga hraðbrautirnar.......ég sem hélt að ríkið væri á hausnum! Ég mátti því oft bara keyra á 80 km og það er heldur hægt svona á hraðbraut. En þetta hafðist og Recklinghausen tók á móti okkur með þrumum og látum eftir indælis veður alla dagana.

Aðalskvísurnar í heimsókn í Álaborg

Ó já, við Helga skelltum okkur EINAR í heimsókn til Hrafnhildar og co. í Álaborg. Snilldar hugmynd hjá HD að við færum bara tvær, barnlausar. Nutum dagsins í botn alveg hreint.

Næsti pöbb takk fyrir :)

Ég er alveg ákveðin í því að fara til Danmerkur aftur, ekki spurning. Voða hyggelig að vera þar.

Seydi kom ekki með en hann skrapp til Tyrklands og kemur heim í dag. Kannski hefur hann keypt eitthvað handa elskunni sinni.......meira um það seinna. Vona allavega að hann hafi keypt smátterí handa strákunum.

Nú eru bara rúmlega 2 vikur í að mamma og pabbi komi. Það verður alveg frábært og mikið um að vera. Hátíð í leikskólanum, HM í fótbolta á skjá niðri í bæ, útskrift Henriks, íþróttadagar í skólanum, lokagrill í fótboltanum, hjólahátíð í bænum ofl. ofl. Ætli við Seydi notum ekki tækifærið og förum út að borða saman, bara við tvö að kvöldi til en eins og er komumst við bara á hádeginu. Ekkert slæmt við það en alltaf smá í tímaþröng. Þetta verður alveg magnað sumar, byrjaði allavega vel um helgina :)

Sumarkveðja

Engar fréttir, góðar fréttir...

2010-05-25T20:25:00.000+02:00

...eða bara bloggleti, erfitt að finna rétta augnablikið til að blogga, ekkert merkilegt að segja. Hvar á ég að byrja?

Síðustu daga hefur verið þvílík blíða, alveg um 25° hiti og sól, alveg fínasta sumarveður. En það hefur líka sínar dimmu hliðar.........ég neyðist til að fækka fötum, sína leggina osfrv. Þýðir sem sagt að ég tók fram MEGA plokkarann og skellti á leggina, tók smá tíma því að blessuð hárin voru orðin ansi löng enda er ég nýsloppin úr trénu og náskyld öpunum frændum vorum. Það sem ég öfundaði bekkjarsystur og vinkonur sem voru með engin eða ljós hár á leggjunum, já ég viðurkenni það alveg. Það er bölvun að vera svona eins og ég er og hefur heft mér að mörgu leyti, förum samt ekkert nánar út í það! USA dvölin opnaði reyndar fyrir mér nýjar víddir, þar eru ÖLL hár af löppum rökuð af, reglulega. Hár á löppum, já og bara alls staðar, þykir sóðalegt og óhugsandi. Í dag er þetta auðvitað komið hingað og brasilískt og ég veit ekki hvað, líka. Og NEI, ég hef ekki farið í þannig lagað og ætla mér það ekki, nei nei. En jæja, ég skellti á mig brúnkukremi 3 daga í röð til að fá smá lit, sé svo í gær að mér hefur ekki alveg tekist að gera þetta jafnt á leggjunum.....æi skítt með það, hef séð myndir af stjörnunum með misheppnað "tan".

Ætli ég finni einhverja mynd til að setja inn......hmmmmmmmm. Smá vor kannski.

Julian hjólar í vorinu

Sumarblómin :)

Já, sumarblómin eru komin á svalirnar. Ég og Bärbel hentumst í búð og ég fjárfesti í þessum fínu blómum og við settum þau í pottana. Vona að þau deyi ekki alveg strax.........

Akkúrat NÚNA situr Unnur systir í Osló og bíður spennt eftir fyrra úrslitakvöldi í Eurovision. Fékk sms frá henni áðan, hún er víst í trans. Ég er ekki hissa, þetta er draumur að rætast hjá henni. Alltaf gaman þegar draumar rætast. Ég lofa að hringja fyrir Ísland í kvöld en sem betur fer sýnir Þýskaland fyrra kvöldið en hitt kvöldið er ekki sýnt og við getum því ekki hringt. Bara 40 mín. til stefnu, ég fer að setja mig í stellingar, koma strákunum í ró, þeir eru reyndar voða rólegir eins og er. Kannski opna einn öllara og fá mér snakk.

Knús og kveðjur, takk fyrir innlitið

Ekkert að frétta?!........

2010-05-12T18:45:00.004+02:00

Lítið að frétta, veður er kalt svo ekki sé meira sagt........8° kuldi og skýjað í dag! Þetta fer í mínar fínustu, veðrið hefur svo greinilega áhrif á andlega heilsu, þó ég reyni nú að láta það ekki hafa of mikil áhrif. Strákarnir eru líka hálf pirraðir. Julian er með exem (ekkert veðrinu að kenna sjálfsagt) og Henrik með bronkítis (gæti verið veðursveiflum að kenna). Ég las á netinu að exem getur aukist við stress........kannski að þetta skóla/gæslustress hafi bara haft þessi áhrif, eða aukið þau allavega. Alveg spurning! Það gengur vel eins og er, Kevin er samt enn ekki alveg hættur að vera leiðinlegur. Julian sagðist hafa spurt afhverju hann væri svona og Kevin svaraði að ein ástæðan væri að hann má ekki heimsækja hann (Julian sko)! Ég meina "halló", hvern langar til að leika við einhvern sem honum finnst ekkert skemmtilegur.........? Julian vill frekar eiga fáa góða vini en að vera vinamargur og vinsæll. Hann er samt vel liðinn af hinum krökkunum og það hefur aldrei neitt komið upp á í sambandi við að hann væri að ergja aðra krakka. Hann segist eiga nýjan vin úr gæslunni, hann sé í 1.bekk og ætli Julian sé ekki svona smá fyrirmynd. Hann virðist vera mjög næmur á það hvernig börn eru, forðast helst "villingana". Reyndar erfitt þegar sumir hanga í honum og fara allt sem hann fer, eins og þessi Kevin. Nóg um hann.....

Julian gerði mæðradagsgjöf handa mér í gæslunni. Límdi servíettur á flís (ekki efnið samt) ofl. Sjá mynd:

Mæðradagur var annars svona la la.....ég ætla að hætta að óska mér þess að synir mínir séu extra þægir og góðir á svona dögum! Hætta að gera mér einhverjar grillur um það, allavega í bili. Kannski ég fái einhvern tímann morgunmatinn í rúmið? Myndi alveg trúa Julian til þess að gera svoleiðis. Henrik finnst ég nú svo leiðinleg, ég segi sko stundum "nei" við hann! Þá er ég sko extra leiðinleg og geri ALDREI neitt fyrir hann og kaupi ALDREI neitt handa honum........ Voðalega kannast ég við þetta úr minni æsku, ég fékk aldrei neitt ;) Hann er samt svo indæll stundum. Ég fór í bað um daginn og hann strauk á mér appelsínuhúðina og sagði "oh, mamma,þú ert með svo mjúka húð" :) Annan daginn spurði ég strákana hvort þeir væru nú ekki búnir að fá nóg af mömmu gömlu, þann daginn sko (það var kvöld). Þá segir Henrik, "Nei, þú ert falleg og við elskum þig"........svo mikill sjarmör þessi elska.

Við ætlum að heimsækja ættingja Seydi um helgina. Frídagur á morgun og skólafrí á föstudaginn. Vona að það rigni ekki mikið og hitastigið mætti hækka líka.

Smá vor í lokin.........

Góða helgi og takk fyrir heimsóknina

Kalt veður

2010-05-03T16:43:00.000+02:00

Já það er ansi kalt þessa dagana, ekki meira en 10° hiti í dag og skýjað. Á síðasta fimmtudag var 27° hiti! Ég veit ekki hvað maður á að halda um þetta blessaða vor........ég hef allavega sett frest á að setja út sumarblómin, þau gætu frosið á nóttunni.

Náttúran hefur samt tekið vel við sér og allt orðið vel grænt, já og bleikt, rautt,hvítt osfrv. Alltaf jafn fallegt. Verst hvað trén eru fljót að fara úr blóma. Myndina fyrir neðan tók ég þegar ég sat föst í teppu á leið til Oer-Erkenschwick að keyra Henrik í afmæli. Ein lokuð gata leiddi til þess að allir þurftu sömu leið og ég sat hálf föst í korter.

Repjuakur

Næsta mynd er tekin í næstu götu á leið í almenningsgarðinn. Ef vel er að gáð má sjá bæði Henrik og Seydi :)

Kirsuberjatré (koma samt engin kirsuber)

Löbbuðum á hátíðina í almenningsgarðinum á 1.maí eins og 100.000 aðrir. Veðrið var fínt, miklu betra en spáð var. Vorum samt ekkert lengi, synir mínir eru lítið fyrir mikinn mannfjölda og mikið labb.......Svo fannst þeim hávaði í músíkinni. Við keyptum því eplatertustykki og fórum með heim, ég hellti upp á kaffi og við höfðum það bara næs þangað til að við skruppum í grillveislu til kunningja Seydi. Hann grillaði m.a. heila geit. Ég sat beint við bakkann með geitinni og efri kjamminn blasti við mér en ég kippti mér nú ekkert upp við það enda alin upp við sviðahausa og -lappir ;) Smakkaði smá af kjötinu, ekki í 1.skipti samt, en mér finnst kjötið ekkert spes. Fékk mér frekar kjúllavængi. Eftir grillveisluna keyrði ég Seydi í teiti til fótboltafélaganna og Bärbel vinkona kom yfir og við fengum okkur nokkra drykki, spjölluðum og gláptum á imbann. Julian sofnaði seint og Henrik enn seinna eða eftir miðnætti......þolið í þessum drengjum er ótrúlegt.

Í morgun snéri ég eitthvað vitlaust upp á mig í sturtunni og er því með þennan heljarins hálsríg. Get varla litið til hægri og niður......verð að slaka á, ekki kannski það besta að sitja hér og blogga! Vonandi lagast þetta nú fljótt, er svo andskoti vont. Hætti núna.......takk fyrir innlitið.

Hlýtt veður

2010-04-25T20:25:00.001+02:00

Við ráðhúsið

Í dag er hlýtt en síðustu daga hefur verið frekar kalt, sérstaklega á morgnana. Ég er komin með svo nóg af þessum kulda, nenni bara ekki að klæða mig í þykka jakka og jafnvel hanska.....já ég tók með mér hanska á fótboltaæfingu hjá Henrik á fimmtudaginn. Það kom sér vel enda er oft ansi hvasst þar þegar vindurinn blæs. Ég vona svo innilega að þessum næturkulda sé lokið núna, ég vil fara að planta blómum í pottana á svölunum, labba um í sumarjakka, jafnvel á bol eins og í dag. Ég er ekkert að biðja um hásumar, bara svona 20°-25° hita. Það er alveg nóg svona á vorin.

Ég hef samt ekkert að segja, lífið gengur sinn vanagang, ég vinn til rúmlega 13, næ í Henrik, dúlla mér með honum og næ svo í Julian klukkan 16. Hann treystir sér ekki til að labba heim þó að margir jafnaldrar hans geri það. Ég ýti ekki á hann að labba einn, hann fær alveg að ráða þessu sjálfur. Stundum er hann með voða lítið hjarta og undanfarið er hann eins og skugginn minn......víkur varla frá mér, ég má varla fara upp á þvottaloft, hann fer með niður ef ég þarf að ná í eitthvað í bílinn (Henrik bíður uppi), hann kemur og kúrir hjá mér á hverju kvöldi og virðist eitthvað hræddur um að ég láti mig hverfa! Ég veit ekki alveg afhverju hann er svona, ég hef aldrei gleymt honum neins staðar.........En ef hann vill þetta er það í góðu lagi, mér finnst voða gott að knúsa hann og kremja. Henrik má ég hins vegar ekki kyssa þessa dagana.........

Eftir viku verður kominn maí! Hrikalega sem tíminn líður hratt......ég verð orðin 100 ára áður en ég veit af! Veit reyndar ekki hvernig ég lít út þá...... maður er nú orðinn nógu krumpaður og grár. Nú fara sundlaugar að opna og ef veður er gott fer maður að spóka sig á bikiní.......já, ég er lítið fyrir sundboli, verð að vera brún á maganum sko :) Ég gleymi því aldrei hvernig ég leit út þegar ég kom frá USA, hnöttótt með sundbolafar...... aldrei aftur takk. Er ansi hrædd um að næstu vikur verði ég að minnka skammtana á disknum, hætta að borða nammi á kvöldin og hreyfa mig meira. Mig langar, svona innst inni, að vita hvernig það er að vera grönn. Bara prófa, hef aldrei verið það........ Langar til að hafa granna leggi, lítinn sætan rass osfrv. Maður má nú láta sig dreyma...............

Eigið góða viku framundan, síðustu vikuna í apríl.

Kaos

2010-04-17T11:36:00.000+02:00

Ekkert kaos hjá mér EN þar sem flugsamgöngur liggja niðri er mikið kaos á flugvöllum hér og á öðrum stöðum í Evrópu. Eldgosið, já og aðallega þetta öskuský, er aðalfréttin hér, bæði í blöðum, í útvarpi og sjónvarpi. Mörg þúsund manns sitja fastir á flugvöllum, lestir fyllast og bílaleigur og taxar gera viðskipti ársins núna. Heyrði t.d. af fólki sem millilenti í Frankfurt frá USA og komst ekki áfram t.d. til Asíu.......hefur enga vegabréfaáritun fyrir Þýskalands og verður því að sofa á flugvellinum, þar var komið upp beddum og átti að redda þessu blessaða fólki m.a. hreinum nærfötum og svona. Spyr mig samt núna.......afhverju hreinum nærfötum?? Mátti fólkið ekki fá töskurnar sínar?? Ekkert um það í fréttunum. En hvað um það, Bild blaðið er heimsmeistari í að gera úlfalda úr mýflugu, RISA fyrirsögn á blaðinu í dag, sá það hjá kjötkaupmanninum, "Das Aschemonster" eða öskuskrýmslið og mynd af þessum gígum sem mynduðust á jöklinum!!! Ekkert minnst á það (á netinu allavega) að þetta sé mynd af jöklinum. Þeir mega samt eiga það að þeir sendu fréttamann til Íslands en hann segir að á Íslandi gangi lífið sinn vanagang, fólk sé í búðum, að taka bensín osfrv. Allt með hinni stökustu ró........ Annað finnst mér ég svo lesa í ísl. fjölmiðlum um öskufall, skemmd tún ofl. Bild er auðvitað þekkt fyrir æsifréttamennsku en er samt mest lesna blaðið hér, held ég....... Fólk elskar dramað.

Nóg um þetta eldgos. Hér er heiður himinn og spáð 18° hita í dag, fallegur vordagur framundan. Ég ætla að skreppa á verkstæðið á eftir, klára nokkra reikninga og leyfa strákunum að hjóla á meðan. Henrik þarf að æfa sig meira að hjóla án hjálparadekkja. Kannski við skreppum í bæinn í Dorsten, alltaf gaman að labba þar um. Á morgun ætla ég með strákana til Düsseldorf að hitta Bjarnhildi og Heiðar en þau voru í Köln og eru núna í DUS. Bjarnhildur er með góðgæti handa mér......bæði nammi og Season All. Jibbí, loksins fæ ég uppáhalds kryddið mitt. Best að muna að lokið er eitthvað öðruvísi, passa mig vel á því :) Það verður gott og gaman að spjalla á íslensku.......fæ alltaf svör á þýsku til baka frá sonum mínum! Ég held að ég verði að fara að hafa íslenskutíma handa þeim, hafa heimaskóla, nóg á ég af bókum. Líka svo þeir læri að lesa á íslensku og þekkja framburðinn á orðunum. Drífi í því sem fyrst.

Endilega kíkja á síður strákanna á barnalandi. Ég var í hópi þeirra sem fengu nýja útlitið, eða mátti breyta og ég gerði það. Er að kynnast þessu svo að það er kannski ekki allt alveg tilbúið en mér líst vel á breytingarnar. Smá vormynd að lokum.

Magnolia í þarnæstu götu

Veðursveiflur

2010-04-08T20:11:00.000+02:00

Þær fara ekkert of vel í mig þessar veðursveiflur, í gær var t.d. 23° hiti og sól, í dag var rigning og 10° hiti, eða ætti ég frekar að segja "kuldi".........brrr mér var kalt í dag. Er svo tilbúin í vorblíðu, leið svo vel í Gysenberg garðinum í Herne í gær. Liggjandi á teppi með snakk og vatn, strákarnir að leika á leiksvæðinu eða við sparkandi í bolta. Tók þessa mynd þar.

Magnolia tré

Leiksvæðið í garðinum er mjög skemmtilegt og nóg af opnu svæði líka til að sparka í bolta eða leika með frisbee. Einnig eru þarna leiktæki og sundlaugargarður. Vantar alveg svona garð í Recklinghausen.

Hluti af leiksvæðinu.

Eitthvað ætlar vorið að vera áfram svona "kalt". Við ætluðum kannski að fara í helgarferð eitthvert en ég hef enga löngun til að labba um einhvers staðar í rigningu. Vil þá frekar vera heima.......get þá labbað í bæinn meðan að það er þurrt, eða keyrt í einhverjar verslunarmiðstöð eða farið á innileikvöll. Sjáum til.

Ekkert bólar á páskaeggjunum......ætli póstburðarmaðurinn/konan hafi ekki bara borðað þau! Kannski maður fari að spyrjast um þau. Var þetta böggull mamma? Þá er sko ekki hægt að leita eftir númeri. Ég skil stundum ekki hvernig pakkar eða bréf "týnast". Birtast svo bara allt í einu eins og ekkert hefði í skorist. Hey, ætli einhver nágranni minn hafi tekið á móti pakkanum og étið eggin..........hahaha nei ætli það.

Þó að það sé kannski ljótt að segja það þá hlakka ég til hversagsleikans sem byrjar á mánudaginn. Engin nöldrandi börn um að þeim leiðist, komast í vinnuna, fara EIN í matvörubúð, regla á hlutunum og vonandi háttatími fyrir tíu! Helst fyrir níu sko........Mínir prinsar munu aldrei verða eins og mörg þýsk börn, fara að sofa milli sjö og átta. Ekki séns, þeir þurfa minni svefn en "venjuleg" börn og meðan að þeir vakna á morgnana til að fara í skóla/leikskóla þýðir lítið að breyta þessu. Sjáum til hvernig það verður að vekja Henrik svefnpurrku í haust..........hann er aðeins úldnari á morgnana heldur en Julian. Sefur þó lengur.

Vá hvað sólarlagið er fallegt. Logn, skýjað og bleik ský. Alger draumur í dós. Það verður sem sagt kalt í nótt.

Knús í hús

Halló apríl

2010-04-02T19:28:00.000+02:00

Mér datt ekkert aprílgabb í hug svo ég að sleppti því að vera nokkuð að plata mann og annan. Ekki einu sinni á facebook. Margir reyndu að gabba vini sína með því að segjast vera trúlofaðir, nú eða einhleypir :) Ég plataði ekki einu sinni strákana, né Seydi. Rosalega léleg í þessu.

Fór loksins út að labba í dag þar sem Seydi var heima. Klæddi mig í íþróttaföt og skó og arkaði upp næstu götu og inn í skóg á útivistarsvæði. Mætti fullt af fólki, ýmist labbandi, skokkandi eða með hunda. Veðrið var fínt til göngu, um 10° og sól. Úr þessu varð næstum því klukkutíma gangur og ég hef ekki fundið fyrir neinum strengjum enn.....Þyrfti að komast oftar í göngutúra eða í hjólatúra. Mér finnst eiginlega skemmtilegra að hjóla. Geri það næst.

Í lúterska kirkjugarðinum ofar í götunni

Á morgun fáum við heimsókn. Frændi Seydi kemur með familíuna, konu og 2 börn. Þá verður fjör hjá okkur. Ég veit ekki alveg hvenær þau koma en þangað til ætla ég að gera rækjutertu, skúra og fara með Henrik í klippingu. Hann vill endilega fara í klippingu, finnst hann kominn með smá sítt að aftan.......hann veit kannski að mér finnst sítt að aftan alger horror. Er svo fegin að Florian vinur þeirra lét klippa þessa lufsu af sér um daginn.

Æi, hef ekkert að segja. Nema bara gleðilega páska og ekki borða yfir ykkur. Við vonum að páskaeggin komi á morgun. Annars verður þýskt páskanammi bara að duga, nóg er nú til af því. Reyndar var lítið eftir í Lidl í gær en ég keypti samt nokkra poka.

Takk fyrir innlitið

Tívolí, tívolí, tívolííííí

2010-03-27T13:15:00.000+01:00

Páskatívolíið í fullum gangi, heljarinnar flugeldasýning fyrsta kvöldið, sást alveg hingað en tívolíið er í suðurbænum og ég bý í norðubænum (við erum ekki að miða við Húsavík sko). Í fyrrakvöld heyrði ég líka í flugeldasýningunni en þann dag er alltaf sýning, miðvikudagurinn er fjölskyldudagur með ýmsum tilboðum t.d. ódýrara í tækin. Það var vægast sagt FULLT á miðvikudaginn enda geggjað veður, 21° hiti og sól. Við mættum um fimmleytið og það var stappað, þegar leið á kvöldið var auðveldara að komast í gegnum þvöguna en við komum heim rúmlega átta. Við skemmtum okkur vel og eyddum hellings pening.......

Parísahjólið

Laugardagur í dag. Ég fór snemma á fætur en Seydi vildi komast sem fyrst í vinnuna, þarf eitthvað að redda hinu og þessu í dag. Er vanalega ekki að vinna á laugardögum en varð að gera það í dag, bað m.a.s. vinnumanninn að mæta. Ég sit hér heima með hausverk og kvef. Er samt skárri í dag en í gær. Sinupret töflurnar eru að virka.............sem minnir mig á það að ég þarf að kaupa pakkningu í dag. Ég neyðist því til að fara í apótek á eftir. Kannski maður labbi sér einn rúnt í bæinn eða svo, áður en apótekin loka þá. Datt í hug að renna í IKEA í Dortmund en ég er engan veginn í stuði til að labba þar um svona á mig komandi. Fæ mér frekar ferskt loft þ.e. ef að prinsunum þóknast að klæða sig og fara út. Voru að byrja að kubba heyrist mér. Settu disk á fóninn og eru nú að leika sér. Sé til eftir smá stund.

Stór færsla um Ísland í bæjarblaðinu í dag. M.a. um að Ísland færir ekki klukkuna í nótt eins og aðrir 700 milljónir manna í Evrópu. Auðvitað mynd af gosinu með. Sá myndir af því í fréttum einn morguninn og hló að fréttafólkinu bera fram Eyjafjallajökull og Mýrdalsjökull.......ekki beint auðveldustu íslensku orðin. Hef bara ekkert kíkt á íslenskar fréttir nýlega svo þetta eru einu myndirnar sem ég hef sé, þ.e. hreyfðar myndir.

Eigið góða helgi, það sem eftir er. Á morgun verð ég 2 tímum á undan ykkur á Íslandi.

Ein og nýt þess

2010-03-22T15:25:00.001+01:00

Á núna skyndilega stund með mér sjálfri. Henrik fór heim með Tom B. vini sínum og verður þar til klukkan fimm. Ég þarf reyndar að ná í Julian klukkan fjögur en þessir 2 tímar, bara fyrir mig, eru fínasta afslöppun. Ég tók úr þvottavél, setti í aðra, braut saman þvott, lagaði til, opnaði glugga og svalahurðir og settist svo við tölvuna til að kíkja á það nýjasta.

Meira sem erlendir fjölmiðlar gera veður úr þessu gosi! Hérna í Bild lá við að það væri heimsendir í fyrirsögninni........þeir eru nú þekktir fyrir að blása allt rosalega upp og nánast alltaf fyrsti með fréttirnar, þ.e. ef þær eru spennandi. Der Spiegel var á undan með gosfréttina og hafa litlu við bætt. Bild var seinni til EN er nú að blása þetta upp, bíða eftir tsunami og ég veit ekki hvað. Hægt er að kommenta við fréttina og hafa 11 manns gert það og m.a. sagt að þetta sé byrjun á heimsendi 2012. Það sem fólk kommentar stundum er nú bara alveg ótrúlegt, sérstaklega við fréttir um ofbeldi/morð sem "útlendingar" fremja. Alltaf sama tuggan.

Ég verð nú að setja inn eina mynd eða svo, lofaði því nú einhvern tímann. Best að sýna ykkur part af páskaskreytingunum okkar. Dreif mig í að skreyta í gær, fínt að lífga aðeins upp á stofuna.

Páskalegt og nýju áklæðin á stólunum.

Rétt áðan hringdi ein mamma úr bekknum hans Julian. Spurði hvort að Julian kæmi í afmælið hans Deniz á morgun......ég kom af fjöllum. Julian hefur gleymt að nefna þetta og sýna mér boðskortið. Ég sagði að auðvitað kæmi hann svo nú verð ég að fara með Julian í búð til að kaupa afmælisgjöf. Best að hjóla í bæinn og ná svo í Henrik á hjóli, tek bara hlaupahjólið hans með. Indælis veður til að hjóla, mætti vera aðeins meiri sól til að hlýja mér en ég vil ekki kvarta. Spáð 17° hita á miðvikudaginn en þá ætla ég í tívolí með strákana enda fjölskyldudagur. Við skruppum bara aðeins á laugardaginn en þá byrjaði að rigna svo við fórum heim eftir smá stund. Alltaf jafn gaman að finna "tívolílyktina" eða lykt af sykurbrenndum möndlum. Nú eða brenndum hnetum, sólblómafræjum ofl. Voða gott og voða fitandi........ Má nú varla við því þar sem mér finnst allt vera að springa utan af mér. Sumarið kemur og ég verð enn ekki komin í "bikiníform" (ef hægt er að kalla það bikiníform hjá mér) ef þetta heldur svona áfram. Það liggur við að ég fái mér vatnslosandi pillur og laxerolíu!!

Er ekki sólin að reyna að pota sér í gegnum skýin. Finn hlýjuna inn um stofugluggann. Blessuð sólin elskar allt.

Vorkveðja og takk fyrir að kvitta ;)

Vorið fundið

2010-03-18T11:49:00.002+01:00

Ó já, það kom á fullum krafti í dag. Það var þokkalega hlýtt í gær, fór alveg í 14° en í dag á víst að vera enn hlýrra enda skín sólin glatt. Ég er heima með Julian en honum var illt í maganum í gær og hálf slappur í morgun. Seydi er drullu slappur og ég sjálf titraði svo í gærkvöld að ég hélt að ég væri að syngja mitt síðasta......sofnaði loksins með hlýtt teppi og sæng yfir mér. Var því smá eftir mig í morgun, með hausverk og öll stíf. En eftir að hafa þvegið gluggana götumegin, ryksugað og skipt um gardínur líður mér betur. Tók bara góðan tíma í þetta og fór mér hægt. Ætti að vera orðin alveg hress seinni partinn ;)

Hef því miður enga mynd af vorinu til að setja hér inn. Kannski kemur hún seinna í dag. (Komin mynd). Langar mest að labba út í góða veðrið. Sé til hvernig Julian verður. Hann er enn á náttfötunum, bara að dunda.

Í gær hitti ég syni og dóttur Frau Philipps, sem bjó tveimur hæðum fyrir neðan mig og mig grunaði strax að nú væri þessi elskulega kona dáin. Það var svo, hún dó víst á síðasta föstudag og enginn hafði sagt mér neitt. Ég hafði heldur ekki hitt neinn úr stigaganginum til að spjalla. Jarðarförin er á morgun og ætla ég að votta mína samúð og mæta þó að ég sé nú ekkert voðalega spennt fyrir einhverju sem kemur að trú, hvað þá kaþólskri. Ég læt mig samt hafa það, bara fyrir Frau Philipps heitna. Bärbel ætla að passa strákana og ná í Julian í gæsluna.

Annars er ekkert mikið að frétta. Við erum að spá í Danmerkurferð um páskana. Heimsækja Elfu Helga. Ef Seydi vill eða kemst ekki með, fer ég bara ein með strákana. Þetta er um 6 tíma ferð. Ég ætti að redda því.

Vorkveðja

Ó vor, ó vor, hvar ertu nú?

2010-03-12T20:08:00.000+01:00

Alveg merkilegt þetta vor, það bara vill ekki koma. Frostnætur nótt eftir nótt, ýmist sól og kalt eða þungbúið, rakt og kalt, dag eftir dag. Nei, þetta kalla ég ekki vor.......ég sem bloggaði svo fallega um vorið fyrir stuttu. Greyið fuglarnir bíða bara eftir því að það hlýni. Eru staddir við Bodensee í S-Þýskalandi. Bændur segja að þessu kuldi sé bara fínn fyrir þeirra uppskeru, þeir hljóta að vita það betur en ég! Það er eins og að náttúran sé á "hold" og bíði bara eftir því að SPRINGA út. Það var því indælt að sitja smá inni í fuglahúsinu í litla dýragarðinum okkar í dag. Örugglega yfir 20° hiti þarna inni. Það var svo þeim mun kaldara að þurfa aftur út.....

Í fuglahúsinu sem mamma þorir ekki inn í

Í dag fórum við í okkar fyrstu hjólreiðaferð í ár. Ég fann fljótlega að eitthvað væri nú lítið loft í dekkjunum og ég með allt til alls, ætlaði að pumpa í dekkin EN var búin að gleyma því að ég þarf á bensínstöð til að pumpa í þau.......gengur ekki að nota venjulega pumpu. Ég varð því að hjóla svona áfram,nennti ekki að taka krók á bensínstöðina. Við lögðum hjólunum, löbbuðum í gegnum dýragarðinn og skruppum smá á leikvöllinn. Fengum okkur svo kakó/kaffi og kökur á litla kaffihúsinu. Svo var bara að renna sér heim. Afar þægilegt að búa neðar í bænum heldur en garðurinn.

Ég henti svo svínakjöti í pönnu, sauð hrísgrjón, setti sveppi og zucchini + indverska sósu úr krukku yfir kjötið og tilbúinn var maturinn. Átti salat frá því í fyrradag, peppaði það bara smá upp með meira iceberg og olíu. Át þetta fyrir framan uppáhaldsfréttirnar mínar á RTL, uppi í rúmi. Leyfði strákunum að horfa á barnaefnið í stofunni. Oh, ég elska að borða uppi í rúmi og horfa á fréttirnar, sérstaklega á föstudögum :)

VERÐ að kaupa afmælisgjöf handa pabba á morgun. Bara verð að komast í búð. Helst án strákanna en auðvitað tek ég þá með í neyð. Sjáum til hvað kallinn hefur mikið að gera. Hann gæti kannski bara tekið gaurana með sér, allavega annan þeirra. Það er samt ekkert auðvelt að skipta þeim á milli. Þeir vilja fá að vera einir EN geta bara ekki verið án hvors annars nema í smá stund. Alveg ótrúlegir. Það er samt aðallega Henrik sem vill ekki vera einn heldur vera með stóra bróður. Held að þetta sé samt voða eðlilegt og algengt.

Já og voðalega er þetta orðið langt blogg.......best að hætta bara núna enda þættir/myndir að byrja eftir smá. Óska öllum góðrar helgar.

Nýtt "look"

2010-03-07T20:22:00.000+01:00

Það var kominn tími á nýtt útlit hjá mér. Þessi dökki litur passaði ekki alveg við hækkandi sól og varð því þessi fallegi bleiki litur fyrir valinu. Bleikt vekur hjá mér gleði, bleikur litur er ekki bara fyrir litlar prinsessur heldur líka þroskaðar konur (og karla). Pretty in Pink. Það var skemmtileg mynd, þyrfti að sjá hana aftur. Aðallega til að sjá Andrew McCarthy. Ég var svo ástfangin af honum að ég var með útklippta mynd af honum úr Bravo í veskinu mínu. Svona var maður "bilaður" sem unglingur. Bravo er enn til og enn jafn vinsælt, þrátt fyrir netið og allt sem fylgir því. Bravo átti stóran þátt í því að maður vissi hvað var "in" á unglingsárunum. Alveg sama þó maður skildi ekkert í þýsku. Það voru myndirnar sem skiptu máli, og að ógleymdum plakötunum.......ég hengdi nokkur upp á vegg hjá mér, m.a. úr Grease 2 og Rob Lowe. Hann var voða lekker. Ég tók m.a.s. stórt plakat af honum með mér til USA, hitti hann samt ekki þegar ég fór til L.A. Hitti bara engan frægan, buhuuu. That´s life. En ég hef þó stungið tánum í Kyrrahafið, o já. Miðjarðarhafið líka, já og Atlantshafið auðvitað. Hef nú komið víða svona þegar ég fer að rifja upp liðna tíma........á samt eftir nokkur lönd hér í kring eins og England, Portúgal, Svíþjóð, Finnland og Pólland. Kem kannski í Makedóníu í sumar. Við Seydi vorum aðeins að plana Tyrklandsferðina. Munum sennilega fara í gegnum Makedóníu í staðin fyrir að keyra í gegnum Búlgaríu. Það er ekki beint uppáhaldslandið okkar.........svo er þarna 100 km leið í Serbíu og að landamærum Búlgaríu sem er voðalega leiðinleg með "sveitavegum" og mjóum göngum. Það var horror að keyra þarna að kvöldi til. Sjáum til. Höfum smá tíma til að plana. Eigum líka eftir að kaupa nýjan bíl til að fara á. Ætlum allavega að reyna að selja Benzinn og Passatinn sem fyrst. Nægur tími, nægur tími.

Engin mynd í dag. Ætlaði ekkert að blogga, bara að breyta um lit. Lét samt smá blogg fylgja með :)

Knús

Kominn mars

2010-03-04T17:38:00.000+01:00

Enn og aftur komin vika síðan síðast......voðalega eru þessar vikur fljótar að líða, ég á bara ekki til orð. Ég verð orðinn fimmtug áður en ég veit af, svei mér þá! Þá verður frumburðurinn orðinn sjálfráða....... Nei, ég held að það sé best að halda sig bara við daginn í dag. Það er hann sem skiptir máli á þessu augnabliki.

Ég sit hérna við skjáinn, sem ég færði aftur á neðri hilluna á skrifborðinu. Held að ein af ástæðum stöðugs hausverks og þreytu í hnakka,hafi verið að ég þurfti að horfa UPP á skjáinn. Hef greinilega setið of mikið við tölvuna........neita því nú ekkert. En á meðan að ég vinn mína vinnu, sé um að ala upp börnin mín, sé um að heimilið sé hreint og matur á borðum, skammast ég mín sko ekkert fyrir það að "hanga" í tölvunni í tíma og ótíma. Ég veit að á sumrin er ég minna við en meðan að vorið varla á sér kræla, sit ég hér........og blogga. Má samt til með að setja inn mynd af snjóklukkunum, fyrir ykkur sem ekki eruð á facebook.

Snjóklukkur í gamla kirkjugarðinum

Ég sá líka fyrstu krókussuna í gær, gula og fjólubláa. Þeir voru sem ekki alveg útsprungnir en ekki langt í það, eða hvað? Það er spáð snjóslyddu um helgina.......ég nenni svo ekki að fá snjó aftur. Það er orðið svo hlýtt í sólinni þegar hún skín hérna á svalirnar, ég sat m.a.s. úti með blaðið í gær. Mælirinn sagði 22° í sólinni :) Er með dregið fyrir núna svo ég sjái á skjáinn, líka til að sólin sjái ekki rykið mitt......þó ég þurrki af finnur hún alltaf ryk, ótrúlegt.

Í morgun byrjaði ég á því að keyra til Dinslaken til að ná í framljós fyrir Seydi. Það var indælt að keyra um á Autobahn, alein og götur þurrar. Ég keyrði samt varlega, of mikið af flutningabílum á ferðinni, finnst mér. Sumum finnst gaman að fara fram úr, sérstaklega þessir "útlensku" fara fram úr kollegum sínum vörubílstjórum og þá hefst "fílahlaup" eins og það kallast hér þegar tveir flutningabílar keyra leeeeeeeeeeeengi hlið við hlið. Sem betur fer var hraðbrautin þreföld svo ég gat rennt fram úr fílahlaupinu, á tveggja akreina hraðbraut er þetta horror og sem betur fer á flestum stöðum bannað, þ.e. fyrir flutningabíla að fara fram úr.

Verð í fríi á morgun. Fer í eftirlit hjá kvennsa rúmlega ellefu. Um að gera að skella sér í bæinn fyrst og á eftir líka enda stofan niðrí bæ. Voða heppilegt allt saman. Líka gott að geta labbað niður í bæ. Veit ekki með að hjóla enda spáð meiri kulda en í dag eða um 4°. Sjáum til. Ég er sem sagt komin í helgarfrí..........jibbí

Góða helgi

Ekkert blogg í meira en viku....

2010-02-24T20:22:00.001+01:00

...segir Hjálmar. Jú jú, það er rétt, ég var alveg við það að hætta að blogga þegar hann kommentaði. Ég hætti við að hætta, í bili allavega. Var alveg viss um að enginn væri að lesa, nema mamma og Unnur (sem er nú ekkert alltaf á netinu sko). Án kommenta finnst mér eins og að ég sé að skrifa dagbók fyrir sjálfa mig. Ef ég væri að því myndi ég ekki opinbera það á netinu. Ætti kannski að taka upp á því, skrifa dagbók, jafnvel handskrifaða.......hvernig væri það???

Veit ekki hvort ég hef nokkra mynd í dag. Hef ekkert verið að mynda nema þá strákana og þeir eiga sínar síður fyrir sínar myndir. Hey, ég veit. Set inn gamla mynd af Seydi sem ég skannaði. Er komin með skanna hérna heim og var að prófa hann. Versogú, svona leit Seydi út fyrir tæplega 20 árum.

Hann veit ekkert að að set þessa mynd inn. Skoðar aldrei bloggið mitt enda skilur hann ekkert í því. Ætli ég sýni honum þetta ekki samt, við felum ekkert fyrir hvort öðru.

Annars er ég eitthvað svo stressuð, eiginlega útaf engu, samt getur það ekki verið útaf engu........finnst ég ekki gleyma einhverju hér og þar og allstaðar. Hrædd um að gleyma veskinu mínu, týna peningaveskinu, koma of seint að sækja strákana, gleyma talkennslunni, sofa yfir mig, hafa ekki nógu hreint og fínt, hugsa um hvað á að vera í matinn osfrv. osfrv. Hvernig fara konur, sem eru í fullri vinnu og kannski með enn fleiri börn, að þessu! Kannski spilar það inn í að ég hef engan sem hleypur upp á fyrir mig, nema þá helst Bärbel vinkonu. Seydi hefur meira en nóg að gera í vinnunni, ég líka, nóg er nú stressið þar stundum. Ég náði smá tíma til að slaka á, á síðasta sunnudag. Sendi Seydi með strákana til tengdó, nennti ekki með. Ekki oft sem ég er alein, nema þegar ég keyri í og úr vinnunni. Það er bara ekkert nóg. Nú koma örugglega komment um að Seydi geti bara hætt fyrr að vinna osfrv. Auðvitað getur hann það stundum, hann veit það alveg sjálfur og gerir sitt besta. Það er bara alveg ótrúlegt hvað hann er "vinsæll", ég veit ekki hvað það hringja margir í hann á dag eða koma á verkstæðið...... Það fyrsta sem ég ætla að gera, er að reyna að færa svefntíma strákanna fram. Láta þá fara að í ró hálftíma fyrr, svo kannski aftur hálftíma. Verst að þeir eru eins og ég, þurfa minni svefn en meðal börn.

Ég finn það bara að ég verð að fá lengur frið á kvöldin. Hef notið þess ef strákarnir hafa sofnað fyrr.

Væl og skæl er þetta........var það þetta sem þú baðst um Hjálmar :) Kvittaðu nú......

40 ár...

2010-02-15T19:10:00.000+01:00

...og 1 dagur eru liðin síðan að ég leit dagsins ljós. Ég kom víst í heiminn rúmlega 8 um morguninn, svona á réttum tíma til að mæta í skólann. Held að það hafi gert mig svona "úber" stundvísa manneskju ;) Það er stundum hægt að stilla klukkuna eftir mér. Ef ég á að mæta klukkan 10, þá mæti ég klukkan 10, ekki 10 mínútur í eða 10 mínútur yfir! Þetta er oft ofboðslega þreytandi ávani eða kækur eða bara kostur, æi ég veit það ekki. Þetta getur nefnilega komið mér í koll EF eitthvað tefur för mína..........þá mæti ég of seint og þá líður mér illa. Ferlegt bara.
En jæja, ég komst niður og upp af 4. hæð í gærkvöld svo að mín skoðun er sú að ég hafi ekkert elst neitt ógurlega mikið á 1 nóttu. Er bara ekki lengur "þrjátíu og eitthvað"......svona líður tíminn, hann stoppar ekkert!

Ætla nú ekki að röfla mikið heldur setja inn eina mynd eða tvær. Karneval er að verða búið, fegin er ég. Ekkert nema myndir af einhverjum Karneval teitum í blöðunum, Karneval hér og Karneval þar. Fór nú samt í bæinn með strákana í dag og við söfnuðum eitthvað af nammi, aðallega vondum molum sem urðu hálf ógeðslegir í slabbinu. Þeir eru samt komnir í skál, hvort þeir verða borðaðir veit ég samt ekki.

Nenni ekki að skrifa mikið um afmælisveisluna á laugardaginn.....segi bara eitt. Fjölskylda Seydi er upp til hópa ókurteis og vanþakklát. Segi ekkert meir, í bili allavega. Nenni ekki að velta mér upp úr þessu en ég mun ekki baka fyrir þau aftur, það er ljóst.........

Jæja, fleiri myndir :)

Afmælistertur

Afmælisgjafir

Karneval

Gleðilegan bolludag..........

Snjóslabb ofl.

2010-02-04T19:52:00.000+01:00

Er ekki kominn tími á nýtt blogg........handboltinn löngu búinn og Ísland kom heim með bronsið, ekkert smá flottur árangur. Þýskaland fór heim með skottið á milli lappanna, tschüssi......bæbæ. Til hamingju Ísland. Vona að fólk hellist ekki í volæði eftir handboltaæði. Þetta mót hefur örugglega lyft mörgum upp í annars dimmum janúarmánuði. Tala nú ekki um þegar auð er jörð, þá er allt enn dimmra. Nú er það þannig hér, mestur snjór farinn inn í bæjum, eitthvað eftir í köntum og á ökrum en það er allt annað að líta út núna, allt grátt og ljótt. Slabbið skemmtilega er nokkurn veginn farið en maður veit aldrei nema að annað hret sé á leiðinni. Um leið og hitinn fer í um 5° kemst ég í vorfíling, hætti að vera með hanska og húfu og nýt þess að anda að mér ósýnilegu vorlofti, hehe.

Þessa vikuna komst ég bara í vinnuna í gær en á mánudaginn fór ég með Henrik til læknis vegna rauðra flekka og kláða og kallinn er með skarlatsótt. Ég þurfti nú að fara á netið til að afla mér meiri upplýsinga um þennan blessaða sjúkdóm. Er ekkert hættulegur og kemur úr streptókokka bakteríum. Var víst að ganga í leikskólanum. Ég tók Henrik með í vinnuna í gær en ég ætlaði með hann í leikskólann. Læknirinn stoppaði það nú af........var hin sem var á vakt í gær (þær eru sko tvær með stofuna) og hún vildi ekki skrifa undir vottorð um að hann mætti fara í leikskólann. Vonandi gengur það upp á morgun.........Ég kemst samt ekki í vinnu. Julian þurfti endilega að smitast og er því líka kominn á sýklalyf. Hann virðist vera veikari en Henrik, með hálsbólgu með þessu en sem betur fer engan hita. Hann verður orðinn hress á mánudaginn, ég er alveg viss um það og stefni ótrauð á afmælisveisluna á Flipp-Flopp innileiksvæðinu. Tökum því bara rólega á morgun og um helgina. Ég verð að muna að kaupa afmælisgjöf handa frumburðinum.......ætla að kaupa tösku undir Nintendo tölvuna hans. Það er það eina sem hann óskar sér. Sjáum svo til hvort ég kaupi eitthvað fleira. Hann er reyndar búinn að fá disk með mörgum leikjum fyrir tölvuna svo að hann er ekkert á flæðiskeri staddur. Vantar heldur ekkert sérstakt. Sjáum til.

Mig var farið að klæja í fingurna að breyta einhverju á heimilinu, færa mublur, mála, bara eitthvað. Tók mig því til og breytti í herbergi strákanna áðan. Það tók nokkra tíma og það tók líka á........ég er hálf dösuð núna og þreytt. Best að setjast aðeins niður og slaka á. Kannski finn ég einhverja mynd til að setja með........

Illa rutt í bænum......

Knús

Handbolti enn og aftur

2010-01-28T15:15:00.000+01:00

Ég veit ekki hvernig ég lifði daginn af í gær, enginn handbolti til að horfa á. Ég ákvað því að lesa í stórskemmtilegri bók eftir tyrkneska konu sem alin er upp hér, stórfyndin og góð. Julian fékk heimsókn og Henrik var í tölvunni, ég hafði því frið til að lesa. Næst ætla ég að lesa fyrri bókina eftir konuna, greip þessa bara á bókasafninu án þess að vita að önnur bók hefði verið á undan. Skiptir ekki, hún er ekkert framhald.

Stórleikur í handbolta í dag, eftir tæpan klukkutíma. Ég á bara eftir að ná í Julian kl. 16 og svo hleyp ég heim í leikinn. Veðrið er bilað, í morgun bráðnaði mikið af snjónum og það rigndi af og til, núna er snjókoma sem fylgdi þrumum og eldingum! Allt orðið hvítt aftur.......jæja, skárra en ljóta, brúna slabbið.

Ég er með hálsríg. Henrik kom upp í, í nótt og ég var alltaf að vakna og hef greinilega sofið eitthvað skakkt....á enn erfitt með að líta til hægri. Þetta hlýtur að lagast fljótlega. Ég var svo pirruð á öllu í morgun að Seydi gafst upp á að reyna að tala við mig eða tjónka við mig.......ég var svo búin að gleyma pirringnum þegar ég kom í vinnuna. Hef týnt honum á leiðinni.

Þetta dugar í dag. Nenni ekki að sitja of lengi hérna útaf hálsríg. Verð að athuga hvort að leikurinn verði sýndur í TV, annars verð ég að horfa í tölvunni. Það er ekkert eins gaman en hvað gerir maður ekki í neyð.

Snjómyndir að lokum.

Handboltahátíð og fleira

2010-01-20T20:23:00.000+01:00

Fyrsta íþróttahátíð ársins er hafin, EM í handbolta. Bæði Þýskaland og Ísland eru með, ég held auðvitað mest með Íslandi, ef þeim gengur ekki vel held ég bara með Þýskalandi, þeim gengur ekkert rosa vel hingað til. Ég held þá bara með Noregi, eða bara Danmörku. Vona bara einhvern veginn að Frakkland vinni ekki, veit ekki afhverju........Þeir gerðu bara jafntefli við Ungverjaland í gær en oft byrja þeir ekkert vel en koma svo sterkir inn.

Næsta íþróttahátíð er svo í febrúar. Ólympíuleikarnir í Vancouver, þá mun ég sitja meira og minna fyrir framan imbann......eins mikið og ég get. Í sumar er svo heimsmeistarmót í fótbolta í Suður-Afríku. Leikirnir verða sýndir á stórum skjá niðri í bæ eins og á HM 2006 og EM 2008. Alveg magnað.

Annars er ekkert planað hjá mér.........eins og vanalega. Flest gert með stuttum fyrirvara. Ætlum reyndar að fara til Tyrklands í sumar en það er spurning hvenær (allavega eftir 15.7.) og hvernig......ég nenni eiginlega ekki að keyra en samt er það að sumu leyti gaman. Kannski koma þau gömlu í heimsókn í sumar??? Eða einhver annar??? Allir velkomnir þó að þröngt sé í koti og evran dýr ;)

Það er lítið á seyði hjá okkur þessa dagana. Julian er til fjögur í gæslunni og við erum oftast bara heima það sem eftir er dagsins enda með eindæmum heimakær :) Mér finnst bara gott að slaka aðeins á eftir desembertörnina og á undan vor-/sumartörn. Reyndar er nóg að gera í vinnunni og fullt hús dag eftir dag. Seydi vinnur fram á kvöld og ég ferja bíla frá kúnnum frá Recklinghausen á verkstæðið. Í gær keyrði ég Golf á verkstæðið, fór heim á Ford Mondeo og í dag keyrði ég Audi (með leðursætum) fram og til baka. Skilaði bílnum og labbaði í gegnum bæinn, skrapp í H&M og keypti mér hlýrabol og bleika blússu.........sumarið má bara koma, hahaha. Gott að fá smá tíma fyrir sjálfan sig en á miðvikudögum er söngæfing í leikskólanum.

Jæja, Desperate Housewives byrjað. Meira seinna.........Mynd af krókussum eða páskaliljum stinga hausunum upp fylgir með.

Merkisafmæli

2010-01-18T12:51:00.000+01:00

Í dag eiga tvær mér kærar manneskjur merkisafmæli. Fyrst af öllu "litli" bróðir minn, fæddur fyrir 30 árum meðan á breytingum stóð og því sváfum við fjölskyldan þar sem "litli" bróðir er nú með stofuna sína :) Elsku Hjálmar Bogi (það tók smá tíma að venjast nafninu) minn, hjartanlega til hamingju með daginn. Njóttu hans.

Í dag á líka indæl bekkjarsystir mín afmæli, henni er allt fært frá og með deginum í dag (segir máltækið). Elsku Sylvía, til hamingju með daginn. Takk fyrir gestrisnina í sumar.

Einhverjir fleiri eiga sjálfsagt afmæli, mig minnir að Hera Hermanns frænka mín eigi líka afmæli. Ætti nú kannski í kíkja í Íslendingabók.......

Læt þetta duga í dag. Meira seinna í vikunni.

Snjórinn blívur......

2010-01-08T11:17:00.000+01:00

Annað árið í röð byrjar árið snjóríkt og á víst að bætast vel við á morgun, alveg heilir 20 cm! Það er sko helling á Recklinghausen mælikvarða, spurning hvort að það gengur eftir. Fólk er beðið að vera bara heima og fara bara út ef það nauðsynlega þarf. Ég ætla út........ætla að upplifa æskuminningar þegar vaðið var út í stórhríð með skíðagleraugu. Á reyndar engin skíðagleraugu en ég býst ekki við að þetta verði það slæmt, á minn mælikvarða sko ;)

Ég tók mynd hérna eitt kvöldið, best að skella henni hér inn. Tók hana klukkan 22:30.

Fór í vinnuna í gær eftir rólegt jólafrí. Þarf svo að vera heima í dag því að Henrik gubbaði.......fór til læknis og hann gæti verið að fá í magann. Fékk stíla ef hann skildi gubba aftur en vonandi var þetta bara smá skot en þetta er víst að ganga í leikskólanum. Mér sjálfri líður ekkert of vel í maganum en það er kannski bara útaf því að ég keypti einhverja "þarmajógúrt" og át 2 sveskjur í morgun......já já,nú á að byrja árið í hollustunni. Át samt 2 blúndur í gær........aldrei hægt að hemja sig. Aginn alveg í núlli. Auglýsingarbæklingar frá 100 líkamsræktarstöðvum fljúga í póstkassann, nú eiga allir að hreyfa sig eftir hátíðarnar. Sama sagan ár eftir ár. "Allir að komast í bikiníform fyrir vorið" móttó. Mig langar en ég dríf mig bara ekki, þyrfti helst stöð með barnagæslu, þær eru dýrastar og gæslan eitthvað gloppótt. Gæti líka farið út að ganga þegar Seydi er kominn heim..........seint á kvöldin. Nú eða skoppað hér í stofunni til að svitna aðeins.........það er svo miklu þægilegra að sitja og gera ekki neitt. Ég held að viljinn sé ekki nægur en ég held að ef ég byrja og sé árangur, mun ég kannski halda áfram. Kannski......... ég held að mér líði nógu illa í líkamanum, finnst ég vera bara í lagi, oftast allavega. Mætti kannski vera stinnari frá hné og upp í mitti EN á ég ekki bara að láta sjúga það úr, hahaha. GLÆTAN. Nú svo verður maður víst ekki yngri, frá fertugu er víst erfiðara að ná af sér pundum og mikilvægara að lifa heilsumslega. Ég hef því rúmlega mánuð til að undirbúa mig!!!!

Nóg komið af bulli. Undirbý mig fyrir stórhríðina á morgun.

Gleðilegt ár 2010

2010-01-01T22:00:00.000+01:00

Megi gæfa og hamingja fylgja ykkur, og mér og mínum auðvitað, á þessu nýja ári. Hvíslað var að mér að ég ætti nú að fara að skipuleggja eitthvað afmæli eftir 1 1/2 mánuð.......ég get bara ekki skipulagt svona langt fram í tímann. Hef heldur ekki hugmynd um hvað mig langar að gera........nema kannski helst stinga af í helgarferð eitthvert. Nenni ekki að standa í veisluhöldum.......nema þá fengi ég kannski fleiri gjafir, hahaha. Fyrst þarf ég að skipuleggja afmæli frumburðarins. Ætli við tökum ekki innileikvöll á það, ekkert þægilegra en það. Seydi borgar.

Skaupið var alveg frábært, ég skældi næstum því í lokaatriðinu.......þjóðarstoltið sagði til sín ;) Ég er samt ekkert að flytja til Íslands sko, líður bara vel hér í minni veröld. Vantar stundum vini og vandamenn en það er ekki hægt að fá allt í lífinu og ég reyni að vera ánægð með það sem ég hef og gera það besta úr því. Meira get ég ekki. Jól og áramót eru alltaf tími til að hugsa enn meira heim, smá heimþrá gerði vart við sig.......líka í snjóinn ;) Langar svooooooo á skíði. Á reyndar bara ELDGÖMUL Blizzard skíði, 1.80 m löng uppi á lofti og enga klossa. Efast um að ég myndi slá í gegn í Melnum.......

Eyddi áramótunum hjá Sultan mágkonu. Hún eldaði hænu og var með fullt af meðlæti sem dugaði svo líka í matinn hjá tengdó í dag. Gott að þurfa ekki að elda 2 daga í röð, þvílíkur léttir. Í dag snjóaði smá og ég tók strákana með mér og við löbbuðum til tengdó, tekur svona hálftíma með 2 gaura í eftirdragi. Seydi keyrði, þvílíkt latur.

Úff, ég er orðin svo uppþembd af áti, mér finnst allt springa utan af mér, puttar og leggir vera að springa. Samt hreinsaðist vel út í dag........bjórinn er góður til þess. Drakk samt "bara" 4 og smá freyðivín.....sem betur fer, annars hefði ég eytt deginum í rúminu. Fínt svona bara.

Ætla að reyna að koma strákunum í ró, þeir sváfu langt fram eftir degi. Horfa svo á íslenska mynd á eftir. Eitthvað um Reykjavík-Rotterdam með Baltasar og Ingvari.

Hef enga mynd til að setja með. Sorry allir. Gleðilegt ár aftur.

Gamlárs

2009-12-29T16:30:00.000+01:00

Eftir 2 daga er Gamlárs, nýtt ár fer að hefjast. Gangið hægt um gleðinnar dyr og farið varlega með flugeldana. Óska öllum gleði og hamingju á árinu 2010.

Við erum bara í letinni, sofum til hálf níu-níu, borðum morgunmat og í gær fór ég aðeins í vinnuna og svo í búð, í dag fór ég með strákana í íþróttasal niðrí bæ þar sem hægt var að hamast og hoppa. Þeir vildu nú ekki leyfa mér að fara svo ég lék mér með og fór svo aðeins í H&M og með gaurana í klippingu. Voru orðnir eins og tröll.... sérstaklega Julian. Nú á ég 2 nýja stráka :)

Julian vildi ekki láta mynda sig meira....Eðlilegir!

Seydi fór að vinna eins og fyrri daginn, reyna að ná inn pening sem fólk skuldar síðan 2006.....síðasti séns.

Ég er að hugsa um að hafa eitthvað létt í matinn, þetta át nær engri átt. Borðaði svínamedalíur í gær með steiktu grænmeti og sósu. Best að borða bara grænmeti eða núðlur í dag.

Bestu kveðjur úr 2ja stiga hita og rigningu.

Gleðileg jól

2009-12-23T18:51:00.000+01:00

Óska ykkur öllum gleðilegra jóla og gæfu á nýju ári. Þakka innlitin á bloggið mitt og kommentin.

Kær jólakveðja
Inga Björk

4. í aðventu + 1

2009-12-21T21:29:00.000+01:00

Já já, kominn mánudagur eftir aðventu........eða er aðventan ekki búin? Er ég að misskilja, er aðventan alveg fram að jólum? Allavega eru 3 dagar til jóla og pakkarnir frá mér bara týndir og tröllum gefnir........pabbi hringdi í tollinn og fór á póstinn, ég hringdi í DHL og enginn veit neitt! Pabba er sagt að pakkinn hafi kannski lent í skipi, hann sé ekki kominn til Íslands, mér er sagt að hann fari EKKI í skip og þeir hjá Íslandspósti séu oft erfiðir í samskiptum t.d. við að upplýsa um alþjóðleg númer á pökkum og staðsetningu.......hringavitleysa bara. En konan sem ég talaði við í dag setti af stað leit að pakkanum, voða almennileg, ekki hægt að segja það um alla þessa "callcenter" starfsmenn sem vinna daginn út og inn, allavega er opið þarna 365 24/7. Ég vona bara það besta, að pakkinn komi fyrir jól en ég verð líka ánægð ef hann finnst..................þoli ekki svona.

1 dagur eftir í skólanum og svo er komið jólafrí. Henrik fer sennilega í leikskólann á Þorlák, get þá átt tíma með Julian, farið með hann í klippingu og svona. Voðalegur lubbi kominn á hann. Henrik hefði þurft líka en ekki eins nauðsynlega.

Halterner Strasse kl.9

Hér liggur snjór, það snjóaði heilan helling í gær. Við vorum hálftíma að keyra í afmæli til bróður Seydi en einn af sonum hans átti afmæli í gær. Vanalega erum við rúmlega 10 mín. að keyra. Fólk kann bara ekki að keyra í snjó, er jafnvel á sumardekkjum.......þegar við komum heim fór Seydi á bensínstöðina neðar í götunni og ég ákvað að labba heim. Fá mér ferskt loft eftir reykingarstybbuna í afmælinu. Ég elska snjó, allt er svo bjart, allt er svo hljótt, fáir á ferli, friður bara. Voða notalegt. Því miður mun snjórinn (sennilega) bráðna fyrir jól :( Skruppum því á þotur fyrir framan leikhúsið í dag. Það þýddi samt lítið til að þreyta syni mína, þeir eru enn vakandi og klukkan er hálf tíu! Óþreytandi þessir drengir. Eru samt komnir á ról upp um sjöleytið! Ætla að koma þeim í ró........verð að fá frið til að hugsa, hahaha.

Hafið það gott elskurnar. Knús

3. í aðventu

2009-12-13T10:51:00.002+01:00

Gleðilegan 3ja í aðventu. Nú er það svalt hjá mér, rétt rúmlega frostmark en sólin ætlar að láta sjá sig svo að það verður blíðuveður. Vantar bara snjóinn til að jólastemningin verði algjör. Við erum víst ekki nógu hátt uppi og það vestarlega að hér kemur sjaldan snjór. Reyndar á að kólna enn meira eftir sem líður á vikuna en veðrið á samt að vera bjart og ekki snjóar úr heiðum himni.......

Unnur gaf mér þetta fína skraut

Ég er eiginlega búin að skreyta allt nema jólatréð. Það fær að bíða fram á Þorláksmessu. Þegar kemur að uppsetningu jólatrés er ég voðalega gamaldags, held í þessa æskuminningu eins lengi og ég get. Hlusta á jólakveðjur og skreyta tréð, reyndar ekki bara tréð því að yfirleitt var jólaskrautið ekki sótt fyrr en á Þorlák og allt skreytt. Nú er öldin önnur og margir farnir að skreyta híbýlin sín í lok nóvember, allavega með jólaseríum í glugga og tré. Þegar ég var barn löbbuðum við alltaf hring til að telja aðventuljós því að seríur komu seinna upp og kveikt var á jólatrénu um miðjan desember (eða er mig að misminna???) Ég átti þessa forláta seríu sem entist alveg í MÖRG ár. Eitthvað annað en þessar lélegu seríur í dag.......Reyndar á víst að fjárfesta í almennilegum seríum, þær bæði endast betur og eru ekki eins hættulegar. Sumar ódýrar seríur verða svo heitar að það getur kviknað í. Hérna mæla þeir með að kaupa ekki seríur undir € 5. Ég sá ægilega fallegar seríur í gær, frá merki sem heitir "Sirius" en þær kosta líka sitt, frá 25 evrum og upp úr. En fallegar voru þær.
Kannski best að kaupa seríur í janúar á útsölu ;) Jólaskraut líka :) Um að gera að spara.

Jæja gott fólk. Læt þetta duga í dag. Eigið góðan dag. Við ætlum kannski á flóamarkað og svo í bæinn að gefa pakka með dóti sem strákarnir áttu en börn sem eiga bágt fá svo gjafirnar.

Kveðja

Örblogg

2009-12-07T20:18:00.000+01:00

Örstutt í dag. Var að gera síðuna aðeins jólalegri, tók myndina hér fyrir ofan af "jólaþorpinu" okkar. Strákarnir eru rosa hrifnir og fengu að kaupa sér fígúrur til að setja í þorpið. Ætlum að gera það að hefð að kaupa eitthvað á hverju ári.

Hef enga mynd til að skella hér inn, þessi fyrir ofan verður að duga í dag. Fólk er hvort eð er örugglega löngu hætt að líta hér við. Ég tala nú ekki um í jólaundirbúningnum. Þegar mamma er nú hætt að kvitta er illt í efni!
Ég hef samt enn þessa þörf til að tjá mig hér, get notað þetta til að muna hluti. Gleymskan eykst jú frá ári til árs. Get kannski lesið hvað ég gerði árið 2009 þegar ég verð 100 ára........hver veit.

Það var alveg indælt að vera í fríi í dag. Fór með jakka af Julian "rennilásabana" í viðgerð, þarf nýjan rennilás. Náði svo í nýju gleraugun mín og skellti mér í klippingu, lét ekkert taka neitt mikið, særa aðeins og "þynna". Rambaði svo um bæinn, sýndi mig og sá aðra. Fór í H&M, C&A (keypti mér m.a. síðan rauðan silki náttkjól þar) ofl. Keypti mér svo ilmvatn í dm. Alltaf þegar ég hef tíma til að skoða OG máta föt finn ég ekkert. Þessa stundina er tískan líka ekki beint hliðholl mínum vexti.......síðir bolir, víðir bolir, síðar peysur, leggings, ökklaskór, mussur í milljónatali osfrv. Ég er svo gamaldags og vanaföst að ég kaupi alltaf það sama, gallabuxur og langerma bolur er mitt "outfit". Ég ætla nú samt í kjól, sokkabuxur og ermar um jólin, læt mig hafa það.......

Jæja, hætti núna, sjónvarpið kallar á mig........Inga.......Inga........Inga........komdu og kveiktu á mér. Fáðu þér te og slakaðu á.

See you

Aðventan nálgast ekki lengur.......er víst komin...

2009-12-02T20:33:00.000+01:00

og ég er búin að koma pökkunum til Íslands af stað! Jibbí, þungu fargi af mér létt, var með í maganum yfir því að koma þeim ekki tímanlega af stað. Maður veit aldrei hvað þessum blessaða tolli dettur í hug! Ég fann kassa, styrkti hann með límbandi, setti jólapakkana í og fylltu upp með þýsku jólanammi. Keypti líka "auka" jólagjöf í dag og setti með. Nokkur jólakort fengu að fljóta með ef einhver vill vera svo vænn að bera þau út á Víkinni..........BITTE :) Með fyrirfram þökk.

Á síðasta föstudag var föndur í bekknum hans Julian. Mér fannst upplagt að sýna bökunarhæfileika mína og gera jólamuffur.......þær vöktu mikla lukku og kláruðust. Föndrið hefði mátt vera betur skipulagt en það gengur bara betur næst, átti góða stund með bekknum.

Jólamuffur

Seydi er farinn í vikuferð til Tyrklands.......það verður gott að slaka aðeins á frá stressinu á verkstæðinu. Það er búið að vera mikið að gera undanfarið og Seydi að vinna fram á kvöld. Svo kemur einhvern veginn allt í einu, t.d. bilaði hurðin á verkstæðið í fyrradag og þarf að skipta um vír til að koma henni upp og niður. Sumir kúnnar koma bara til að ergja (allavega segir Seydi það), honum er sérstaklega "illa við" samlanda sína sem vilja fá allt fyrir ekkert.......

Ég skrapp aðeins á verkstæðið í morgun, náði í nokkra pappíra, lagaði smá til og skrifaði einn reikning. Þarf að skreppa aftur á morgun til að ná í dekk og koma þeim til kunningja Seydi. Þyrfti helst að skreppa til Hollands líka, fer að vanta púðursykur en hann fæst ekki hér. Reyndar gæti hann verið til núna fyrir jólin.... best að athuga það. Langar samt til Hollands, kaupa almennilegt brauð :) Það er ekki ósvipað íslensku brauði.

Ég er víst að fara að leika í leikriti á jólaskemmtun leikskólans. Við ætlum að leika "Frau Holle" eða "Fiðrið hennar Huldu" á íslensku. Hef aldrei lesið söguna en veit svona nokkurn vegin um hvað hún er, ætla samt að lesa hana líka. Ég leik perutréð, hahahaha.

Bið að heilsa ykkur í bili

Aðventan nálgast

2009-11-28T16:58:00.000+01:00

Hva....aðventan byrjar á morgun. Vá hvað tíminn líður hratt, nóvember er að verða búinn! Ég er búin að kaupa jólagjafirnar sem eiga að fara til Íslands, var reyndar að pæla í að kaupa eina í viðbót, sé til með það. Þar sem mér tókst, eina ferðina enn, að kaupa of stórar og þungar gjafir er þetta komið yfir 5 kg!!! Nú þá er bara að kaupa fullt af góðgæti og senda með, kostar lítið meira að senda 5 eða 10 kg. Nú vantar mig stærri kassa, strandar allt á því. Verð að leita betur á verkstæðinu.

Smá jólastemming frá Recklinghausen

Ég komst í smá jólaskap í gær þegar Henrik og co. voru að syngja jólalög niðrí bæ. Svo sungu kórar jólalög fyrir framan ráðhúsið, já það var ansi jólalegt. Nú má aðventan alveg koma. Ég er búin að ná í jólaskrautið, aðventuljósið er komið í gluggann og stjarnan í eldhúsgluggann. Á eftir að setja falleg kerti í 4ra arma kertastjaka sem Hjálmar gaf mér einu sinni. Nota hann líka sem aðventukrans. Dagatalakertið er líka tilbúið, alveg ómissandi á mínu heimili.

Þar sem ég hafði tíma til að fara í bæinn á þriðjudaginn ákvað ég að klára jólagjafakaup til Íslands og skoða ný gleraugu. Fann loksins gleraugu sem mig langaði í og ætti að fá þau eftir rúmlega viku. Ég hef svo vikutíma til að venjast þeim, fá álit frá öðrum en ég má skpta þeim ef mér líkar þau ekki. Vona að ég hafi valið rétt. Hef ekki fengið mér ný gleraugu í 4 ár!

Bayramin mubarek olsun=gleðilega fórnarhátíð. Fór til tengdó í dag til að gleðja þau. Strákarnir fengu gjafir frá pabba sínum og afa. Fínt að fagna öllu mögulegu ef maður hagnast af því :)

Kveðjur

Upplifun

2009-11-17T19:33:00.001+01:00

Ég upplifði eitthvað í morgun sem mig langaði ekkert til að upplifa. Þegar ég var hálfnuð í vinnuna sá ég í fjarska 2 lögreglubíla með ljós, líkbíl ofl. Í þann mund sem ég keyri framhjá er jarðarfaraþjónustan að setja börur með líki í poka á grind........hugsanir mínar snérust í hringi.....ætli einhver hafi dáið þarna í runnanum, eða jafnvel hent sér á teinana (var við brú yfir lestarteina)......allavega voru engin merki um umferðarslys. Ég viðurkenni að þetta var hálf óhugnalegt, rétt eins og þegar ég varð vitni af slysinu í Tyrklandi í fyrra. Þar sem bíl þrumaði á par á vespu......það var ekki falleg sjón. Ég sé eftir því að hafa farið og kíkt en Seydi var með þeim fyrstu á staðinn. En svona er lífið, þó að það séu til óteljandi þættir um líf og störf lögreglu í TV (ég er ekki að tala um CSI og co.) þá er öðruvísi að upplifa svona með eigin augum.

Dagurinn í dag var samt nánast stresslaus, eitthvað annað en í gær þegar ég þurfti að fara með Henrik í talkennslu kl. 15:45, sækja Julian kl. 16:00, hendast í bókasafnið-og þar með leita að bílastæði í bænum-ná aftur í Henrik kl. 16:30 og fara svo í foreldraviðtal kl. 16:40. Það var því gott að eyða síðdeginu í dag bara heima í ró og næði, hlaða spili í tölvuna, elda núðlur, horfa á fréttir. Skrapp þó aðeins í bæinn með Henrik milli 14-16. Náði m.a.s. að kaupa hluta af 2 jólagjöfum :) Já og kaupa mér skó og RAUÐ epli :)

Laugardagurinn fór í undirbúning undir söng hjá leikskólakórnum og klukkan að verða fjögur keyrði ég í bæinn til að litli gaur gæti nú farið að syngja með. Hann er orðinn nokkuð frískur, búinn með annað glasið af lyfjum og við ætlum að kíkja á lækninn á morgun. Vita hvort að lungun séu orðin "frjáls" eins og sagt er hér.

Til að sjá myndir og video af Henrik set ég inn linka. Myndir og Video

Eigið góðan dag og viku.

Allt og ekkert

2009-11-09T22:54:00.005+01:00

Ljósashowið í Recklinghausen. Endaði 7.nóv. Hótel Engelsburg

Velkominn nóvember, ert m.a.s. kominn langt á leið, 1/3 að verða búinn. Vá hvað tíminn líður hratt. Jólin bara nálgast óðum. Ég verð að fara að huga að jólagjöfum. Kaupa dagatöl handa strákunum og dagatalakerti, alveg nauðsynlegt og minnir mig á mína æsku. Ég veit ekkert hvað ég á að kaupa handa fólkinu mínu í jólagjöf.........þið megið alveg skrifa óskalista í kommentin ;) Hvað kaupir maður t.d. handa 12 ára strák? En jólakortin eru komin í hús, bara eftir að skrifa á umslögin og senda. Magnað.

Gullsmiður

Það er heldur hráslagalegt þessa dagana. Í dag var sérstaklega "blautkalt" eins og sagt er hér. Ég eyddi löngum tíma hjá barnalækni með Henrik. Hann er kominn með bronkítis eins og hefur komið fyrir áður. Greyið var alveg bakk í gær, gat lítið borðað, lá bara og lullaði og gubbaði öllu, eða því litla sem hann kom niður. Var nú strax skárri í dag, ég sé það strax á honum og heyri, þegar hann er lasinn talar hann ekki mikið..........hann byrjaði strax að mala í morgun svo ég vissi að hann væri skárri. Æi hann er svo duglegur, þurfti að bíða HEILLENGI hjá lækni til að komast að (FULL biðstofa) svo aftur að bíða inni í herbergi, fá stíl í rass, anda að sér gufu.....tvisvar. Hann fékk sko Kinder egg í verðlaun :)

Ráðhúsið

Ég fór á kvöld númer 2 (af 3) á foreldranámskeiði í leikskólanum áðan. Meira og minna áhugavert. Hvað fólk getur haft áhyggjur að 1 1/2 árs vilji alltaf ýta á takkana á græjunum..... eða kveikja á eldavélinni! Suma foreldra vantar alveg tilfinninguna við að sjá um/ala upp börn. Kunna bara á bókina og vilja gera ALLT rétt og ef eitthvað er ekki eins og það ímyndar sér fer allt úr skorðum. Lítil bómullarbörn vaxa úr grasi. Að þessu leyti er ég ekki vel aðlöguð þýsku samfélagi, allavega stórum hluta af því. En ég spjallaði við 2 mömmur (Arne og Tarek) áður en ég fór heim og við erum nokkurn vegin á sama máli um flest. Þyrftum að hittast til að spjalla, bara við þrjár. Gæti orðið gaman þar sem gaurarnir eru allir á sama aldri.

Ætli ég verði ekki að sofa á sófanum eða í rúmi Henrik. Rúmið mitt er fullt........ætla að kíkja aðeins á imbann áður en ég leggst til hvílu.

Góða nótt

Haustið

2009-10-30T19:41:00.003+01:00

Vá hvað haustið er geggjað í ár, enn hanga alveg fullt af laufblöðum á trjánum, skærgul og falleg. Í dag var eins og komin væri hríð........laufblaðahríð, vantaði bara aðeins meiri vind og þetta hefði verið stórhríð :)

Ég elska haustið en því miður er það búið of fljótt og trén búin að týna laufblöðunum. Sem betur fer er líka ansi mikið um sígræn tré og sígræna runna hérna.

M.a.s. rósir blómstra sumstaðar ennþá.

Maríuhænur fljúga útum allt þessa dagana, ein settist á öxlina á mér í dag þegar ég sat úti á svölum í 15° hita og sól, indælt. Hlýtur að vera lukkumerki ;)

Ég sá líka vespu í dag, hún hefur lifað frostið um daginn af. Ekkert frost þessa dagana, bara indælt veður og 15° hiti. Þoka í morgun en hún var fljót að víkja fyrir sólinni.

Halloween á morgun og Allra Heilagur á sunnudaginn. Fúlt þegar frídagar detta á sunnudaga, allt hvort eð er lokað. Allavega búðir og svona. Graskerið er komið með andlit og stendur uppi á hillu á svölunum :)

Mér tekst ekki að losna við þessi 2-3 kg (til að byrja með) enda þýðir ekkert að úða í sig nammi og hreyfa sig ekkert nema hérna í tröppunum.........nei, aginn er ekki mikill og því lítil von um árangur. Æi, nenni ekki að hugsa um þetta, langar bara í nammi þegar ég hugsa um að leggja af!

Spurning um að hætta þessu bloggi, kannski skrifa einu sinni í mánuði eða svo. Ef mamma fer á facebook er ég ansi hrædd um að ég hætti þessu..........

Góða helgi

Lego

2009-10-21T19:47:00.003+02:00

Nostalgía

Lego er frábært dót. Takk Ole Kirk Christiansen fyrir þessa snjöllu hugmynd og snjalla nafn á dóti. Ég átti ansi mikið af Lego kubbum, fólki, gluggum, hurðum og m.a.s. eldhús........samt var og er Lego frekar dýrt dót. En það endist líka vel og kynslóð eftir kynslóð hafa gaman af þessu. Reyndar er sumt orðið ansi ýkt og flókið að setja saman og ef það blandast við hina hrúguna er MJÖG erfitt að finna rétta kubbann. Ég var einu sinni marga klukkutíma að setja saman flugvél sem Julian á. Og ekki er hún sú flóknasta.......kubbarnir voru bara komnir saman við hina. Mér finnst mest gaman af venjulegum kubbum. Var reyndar rosa stolt af eldhúsinu mínu (kannski átti Unnur það líka eða jafnvel bara hún????). Missti einu sinni tönn þegar ég ætlaði að taka kubba í sundur, hún var hvort eð er laus :) Ég er alger Lego aðdáandi.

Strákarnir mínir að föndra fyrir mömmu sína

Tók mér frí í dag og fór með strákana í Legoland Discovery Center í Duisburg. Þurftum að bíða í klukkutíma í röð til að komast inn......það var þess virði og okkur fannst gaman. Set inn myndir hjá strákunum. Skrapp í IKEA á leiðinni heim. Keypti mér m.a. nýtt jólatrésskraut, úr korni, svona stjörnur, hjörtu og annað. Ætla að breyta til í ár og sleppa kúlunum.

Er þreytt núna eftir þennan þvæling en sem betur fer var veðrið gott og hitinn fór í 18° og sólin skein. Alveg magnað haustveður.

Farið vel með ykkur

Munið mig, ég man ykkur

2009-10-17T18:17:00.003+02:00

Hafði ekkert til að blogga um og hef ekki tekið neinar spennandi myndir svo ég set bara mynd af mér sjálfri hér inn. Aðeins búin að breyta henni, bara að leika mér. Er ein heima eins og er. Líður ekkert of vel og því tók Seydi strákana út að borða. Ég lagði mig reyndar áðan og það hjálpaði mikið, held ég hafi m.a.s. sofnað smá. Yndislegu synir mínir leyfðu mér bara að sofa og voru ekkert að trufla. Í þetta skiptið! Julian á það til að kalla á mig.......mamma, maaaaaaammma, maaaaaaaaaammmmmma........JÁ.........ekkert, ætlaði bara að athuga hvar þú værir! Hefur gert þetta ansi oft undanfarið. Hann hangir mikið í "pilsfaldinum" þessa dagana. Kannski af því að hann er í haustfríi og fylgir mér út um allt. Eiginlega ætti ég að vera fegin að synir mínir vilja yfir höfuð vera hjá mér, knúsa mig og kyssa. Æi já, mér finnst það bara æðislegt.

Maríuhænur á hausti

Ekkert að láta undan þessar maríuhænur þó að næturfrostið sé mætt. Önnur þeirra er evrópskt, hin asísk. Svo segir Julian. Við erum voða hrifin af þessu dýri enda er það notað sem lukkumerki ásamt svíni, smárablaði og sótara. Já og svo skeifa og 1 cent.

Erum komin í smá Halloween fíling. Búin að skreyta smá með litlum gler graskerjum og dóti. Orðið ansi haustlegt hjá okkur. Úti líka en langt því frá eins snemma eins og í fyrra. Ég sé það á myndum sem ég tók í byrjun október 2008. Við erum allavega 2-3 vikum á eftir. Hvað er svo normal veit ég ekki alveg. Sums staðar er bara kominn vetur t.d. í Austurríki. Skíðafólk komið á brettin.

Jæja, best að njóta þess að vera "Home Alone" í smá stund. Knús og kossar.

Haustpirringur....

2009-10-11T10:39:00.003+02:00

Self made, haustkrans

Repjuakur að hausti

Læt myndirnar tala, haustið er komið. Samt ekki eins langt komið og í fyrra, ég sé það á myndum sem ég tók þá. Á föstudaginn var sól og fínt veður, í gær var komin rigning. Seinni partinn kom sólin þó á milli rigningargusa. Þar sem Henrik var með hita fór ég með Julian smá túr í bæinn, aðeins til að komast út. Við rétt sluppum við gusu meðan að við vorum inni í búð.

Nenni ekki að blogga meira, er eitthvað pirruð, allt fer í taugarnar á mér þessa stundina. Svona er þetta stundum en líður sem betur fer fljótt hjá. Vonandi verð ég ekki lasin, fann smá til í hálsinum í fyrradag, er með smá hausverk og hor í nös. Líður ágætlega í dag.

Tók mig til og bakaði bæði muffur og svampbotn í gær. Skellti svo bananarjóma á milli og frosin ber ofan. Fínasta terta. Seydi keypti lambasneiðar í gær og grillaði þær á samlokugrillinu. Var fínt, ekkert eins gott og ísl. lamb en það mátti borða það. Þessir tyrknesku kjötiðnaðarmenn virðast ekki kunna að skera kjöt svo það líti vel út......hálf ljótar sneiðar hjá þeim!

Haustkveðjur

Löng helgi

2009-10-05T14:02:00.004+02:00

Það er alveg spurning um að blogga í dag. Er í fríi vegna kennarafundar, ákvað að vera bara heima þó ég hefði alveg getað farið með Julian í gæslu og Henrik í leikskólann. Gott að taka bara langa helgi á þetta. Á laugardaginn var þjóðhátíðardagur Þýskalands en Dorsten (bærinn þar sem verkstæðið er) ákvað að hafa búðir opnar (flestar) og hausthátíð í leiðinni. Við skelltum okkur þangað eftir að hafa komið við á verkstæðinu og verðmerkt bíla og fært til á stæðinu. Eitthvað verður að gera til að selja druslurnar........reyna það allavega. Höfum samt selt eina 3 bíla á undanförnum vikum, verður að teljast ágætt miðað við "ástandið".

Í gær var svo flóamarkaður og þar var nú keypt alveg hellingur, Milka súkkulaði og annað sælgæti, gulir tómatar, skyndikjúllaborgarar, pylsur, rúmföt, Playmobil dót ofl. Við komum þungt hlaðin heim.

Þarf að fara í bókasafnið á eftir, ætla að taka Bärbel og Florian með. Vona að strákarnir vilji labba, þeir eru svoddan glannar á hjólum og oft stórhættulegt (finnst mér) að fara í hjólareiðatúr.

Ég ákvað því að skella mér ALEIN í hjólatúr seinni partinn í gær. Skildi kallana bara eftir heima. Ég held ég hafi ekki svitnað svona mikið í maaaaaaaaarga mánuði enda lítið í ræktinni!

Fákurinn minn

Út um gluggann í stofunni

Bara 4 dagar og þá er komið haustfrí. Alveg heilar 2 vikur! Ekkert planað hér á bæ, alveg spurning um að fara eitthvert í frí. Á fimmtudaginn er ég líka í fríi.......ætla að keyra krílin af leikskólanum á elliheimili þar sem "Schnuppis" kórinn ætlar að syngja. Fæ stóra bílinn til þess og get því tekið 6 krakka með. Seinni partinn er svo partý á grænu deildinni, Plock partý en Plock er regndropi og hann er þemað hjá þeim núna. Snýst allt um vatn.

Það var ljótt að missa af ættarmóti um helgina. Reyndar þekkir maður nú flesta, veit allavega hvernig þeir líta út. Ekkert svona "ó hver ert þú?" dæmi þar á ferð. Svona er það þegar flestir búa á sömu þúfunni eins og mínir ættingjar, báðum megin. Ég man sem krakki öfundaði ég vini sem áttu afa, ömmu, frændur og frænkur á öðrum stöðum en Húsavík. Ég átti ekki marga ættingja utan Þingeyjarsýslu og á ekki enn. Takk Rakel að eiga heima í borginni :) Hahaha.
Kannski á ég þessvegna heima erlendis, það var snemma draumur að komast út í heim, sjá eitthvað annað en Þingeyjarsýslu og Ísland. Ég er búin að sjá ýmislegt, frá Los Angeles til Tyrklands en það er líka margt sem ég hef ekki séð eins og t.d. Svíþjóð og Finnland, Pólland og Portúgal. Kannski á ég eftir að heimsækja enn fjarlægari staði eins og Ástralíu og Japan, hver veit.............

Góðar stundir

Helgin

2009-09-29T18:00:00.003+02:00

Deutsche Bank Recklinghausen

"Fallegt" útsýni á leiðinni til Hannover

AUTOBAHN

Loftbelgur í kvöldsólinni

Svona var umferðin 11 km af leiðinni heim...

Fór út að borða á laugardaginn, í hádegishlaðborð hjá "Kínverjanum" (hvort hann er frá Kína veit ég ekki). Seydi bauð eins og vanalega ;) Löbbuðum hring í bænum og svo tók hann gaurana með í bras svo að ég gat verið alein heima í smá stund........það var indælt og alveg nauðsynlegt.

Drifum okkur á verkstæðasýningu í Hannover á sunnudeginum. Vorum reyndar heldur seint á ferðinni svo að við náðum bara um 4 tímum á sýningunni. Sumum fannst það nú heldur langt (strákunum) en Seydi hefði örugglega geta verið þarna alla helgina. Þetta var alveg ágætt, veðrið var geggjað en við vorum heldur seinheppin þennan dag. Ég þurfti með gaurana á klóið eftir smá tíma og þegar við komum út höfðum við týnt Seydi. Allt í lagi svo sem en eftir hálftíma ákvað ég að hringja í hann............enginn svarar! Það var ekki svo mikill hávaði að hann heyrði ekki í gemsanum :/ Ég reyni að hringja (og leita) í klukkutíma!! Loksins hringir hann, hafði haft símann á "silent"! Það er ekki í lagi með manninn.........Við ætluðum þá að fá okkur kaffi og kökur (fengum mat í hádeginu) en þá var bara ALLT búið, shit. Oh jæja, Julian langaði þá til að hitta vélmennið.........við komum þangað og þá var nýbúið að slökkva á honum, shit. Oh jæja, þá langaði Julian að kasta bolta í körfu (það var búið að vera lööööööööng röð allan daginn), þá var hætt að leyfa að kasta, shit.............Julian var svo leiður. Hafði þá allavega sparkað fótbolta í mark hjá "Robotkeeper", hann varði allt, næstum því. Ég hitti allavega ekki ;)

Nú var ég komin með nóg og fór út í góða veðrið með gaurana. Löbbuðum í bílinn með alla bæklingana sem við höfðum fengið og skruppum svo aftur á sýninguna til að slútta þessu enda allt að verða búið. Lentum svo í þessari fínu "teppu" (rúlluðum alltaf smá) á leiðinni heim. Allir orðnir svangir svo við hentumst á Burger King í sólsetrinu. Komum ekki heim fyrr en að verða níu, allir þreyttir og Julian svaf í bílnum og aftur strax þegar hann kom heim.

Myndir af sýningunni verða hjá strákunum.

Haustið er greinilega komið, þoka og svalt á morgnana. Rigning í nótt, skýjað í dag. Samt 19° hiti.

Knús

"Gamlar" myndir

2009-09-23T14:44:00.002+02:00

Henrik 2006

Julian 2006

Bræður skítugir eftir verkstæðisheimsókn

Örblogg núna, þarf að ná í Julian eftir nokkrar mínútur. Fann þessar skemmtilegu myndir í gemsanum sem Seydi var með, ég átti hann einu sinni. Tíminn líður hratt og ekki nema 3 ár síðan að gaurarnir mínir voru bara smábörn......skemmtilega fyndnar myndir.

Ætla að skreppa í bæinn með Julian til að kaupa afmælisgjöf handa bekkjarbróður hans sem á afmæli 1.okt. Höfum klukkutíma þangað til að örverpið er búið á söngæfingu í leikskólanum. Alltaf á spani.........nei nei, við höfum það oftast rólegt seinni partinn og á kvöldin. Ég þarf á foreldrafund í leikskólanum í kvöld........þarf því að hringja nokkrum sinnum í Seydi til að hann kom á réttum tíma! Fyrst stefni ég að því að elda "Októberhátíðar" kjúlla úr Lidl. Fer eftir því hvað ég er dugleg :)

Jæja, verð að þjóta..........bis dann

Síðsumarveður

2009-09-18T20:29:00.004+02:00

McDonalds t.h. Benz bílasala í miðjunni

Í gær hringdi Arne, vinur Henrik, í hann og spurði hvort að Henrik vildi koma að leika. Það passaði vel því að ég ætlaði með Julian að kaupa á hann skó eftir gæsluna. Ég fór því með H. til Arne og náði í Julian. Þar sem hann gleymdi að borða hádegismat (sagði að enginn hefði kallað á hann í mat) var hann glorhungraður. Við stoppuðum því á McDonalds og fengum okkur í gogginn. Þegar ég sat í bílnum fyrir utan ákvað ég að taka mynd og setja hér inn. Sýna annan hluta af bænum en oftast. Skóna fengum við í íþróttabúðinni góðu, Decathlon, alveg snilldar búð.

Útileikhús við Emscherkanal Gelsenkirchen

Í dag var yndislegt veður og við Bärbel ákváðum að eyða deginum í Nordsternpark í Gelsenkirchen. Ég hafði aldrei komið þarna og vissi ekkert við hverju ég átti að búast. Fyrir nokkrum árum var þarna haldin "Blómasýning ársins" og því er þarna núna fallegur garður, leikvellir, hjólabrautir, síki fyrir flutningabáta, útileikhús ofl. ofl. Fleiri myndir munu koma hjá strákunum á barnalandi. Við áttum þarna frábæran dag þrátt fyrir að strákarnir gerðu sig hundblauta. Nokkuð ljóst að þarna fer ég aftur.

Góða helgi

Haustdagur

2009-09-13T18:49:00.003+02:00

Í morgun hringdi Bärbel vinkona í mig og spurði hvort við nenntum að koma með út að labba. Hún og Florian ætluðu að fara til Mollbeck, sem er nokkurs konar útivistarsvæði. Þar er líka útisundlaug sem alltaf er svo köld að ekki duga nær 40° gráður til að hlýja manni, brrrrr. Þarna koma saman joggarar, hundafólk og Nordic Walking labbarar. Einnig eru sumir á hjólum og aðrir bara labbandi. Tjarnirnar þarna eru allt annað en hreinar.......eiginlega frekar ógeðslegar, samt eru fiskar í sumum þeirra og B. hefur séð menn veiða þarna! Ekki myndi ég borða þann fisk.

Við áttum þarna rúmlega 2 góða tíma. Strákunum leist nú ekkert á það að "fara bara út að labba" en á endanum fannst þeim gaman og fóru að búa til stíflu úr trjágreinum. Við lofuðum þeim að við myndum koma þarna aftur.

Þegar heim var komið grillaði ég lambasteikur á innigrilli, steikti kartöflur og bjó til jógúrtsósu. Kvöldmaturinn bara tekin snemma. Seydi var þreyttur eftir boltann........svaf vel hér á sófanum, ég las bók og strákarnir rifust, léku sér, hlógu, görguðu, trufluðu mig og settu herbergið á annan endann. Fengu sér líka sítrónute með hunangi, gott við hósta en þeir báðir er með leiðinlegan hósta á morgnana.

Veðrið var örugglega betra á N-Íslandi í dag heldur en hér, "bara" 16° hiti og sól og rigning til skiptis. Akkúrat núna er sól og því dregið fyrir hérna í sofunni, annars er varla hægt að sjá út úr augunum hérna inni.

Stóra, 2ja ára sjónvarpið okkar er bilað, byrjaði með því að fjarstýringin klikkaði og svo fór myndin að "dilla" þegar kveikt var. Endaði á því að myndin dillaði allan tímann! Seydi ætlar með það í viðgerð, spurning hvort hægt er að gera við svona dót. Erum því TV laus inni í herbergi, ég sakna þess smá en get alveg lifað án þess........... í smá tíma allavega, hahaha.

Á morgun verður elsku mamma mín 60 ára! Vá hvað mér fannst 60 ára fólk hundgamalt sem krakki........svona breytast viðhorfin, mér fannst 39 ára fólk líka eldgamalt! Ég var 18 ára þegar mamma var 39 ára, úff, ef mitt barn væri í USA núna sem skiptinemi, eða bara einhvers staðar langt í burtu...........sem betur fer eru mínir bara kríli ennþá.

Ekki gleyma að kvitta, það lífgar upp á líf mitt að sjá ykkur kvitta, þó ekki væri nema segja "kvitt" :)

Hitabylgja

2009-09-08T21:06:00.003+02:00

Séð í suðaustur frá svölunum

Aldeilis blíða í dag, hitinn fór í 27° og sólin skein nær allan daginn. Í morgun var svalt og Julian kvartaði yfir kulda því ég sendi hann í hnébuxum í skólann, ég vissi að honum yrði heitt þegar liði á daginn. Þessi fína Azoreyja-hæð gefur okkur þetta indæla veður eitthvað fram eftir viku. En það er greinilegt að haustið er á leiðinni (hef ég sagt það áður???) því að nú er orðið dimmt um hálf níu og það verður svalt um leið og sólin sest, já og á morgnana.

Séð í suðvestur, sólin að setjast

Ég veit svo sem ekkert hvað ég á að blogga um, ekkert djúsí í gangi hér frekar en fyrri daginn. Það er heldur rólegt á verkstæðinu, fólk á engan pening eftir sumarfríið........nei ég segi svona. Frá október fer fólk svo að skipta á vetrardekkin og þá lífgast viðskiptin. Seydi er líka hálf "latur" þessa dagana. Ég held að hann sé enn eftir sig eftir veikindin í byrjun ágúst, nær aldrei að hvíla sig nóg. Reyndar er klukkan núna rúmlega níu og Seydi enn í vinnunni, ekki latari en það.

Það er samt greinilegt að fólk hefur ekki eins mikinn pening á milli handanna og áður. Margir að leita að eins ódýrum bíl og hægt er eða prútta þegar að viðgerðum kemur.........Krísan ætti samt að vera búin að ná botninum, hér allavega og allt á uppleið. Það verður spennandi að sjá í lok september, hvort að við fáum nýjan kanslara eða hvort að Angela kellingin heldur velli. Hingað til hefur hún gert marga góða hluti og ég er bara nokkuð ánægð með kellu.

OK, orðið gott. House M.D. að byrja í TV, nýir þættir en á sumrin ganga hérna endursýningar í endursýningar ofan.......þreytandi. Svo er 24 á eftir, má ekki sofna yfir þeim eins og fyrir viku!

Góðar stundir

September

2009-09-01T17:06:00.003+02:00

Slökkvistöðin

Vertu velkominn septembermánuður. Veðurfræðingalega séð er komið haust, segja fróðir menn hér. Það sést að haustið er á leiðinni, í dag byrjaði dagurinn sólríkur og hlýr, núna rignir og hitastigið lækkar.

Haustið er góður tími, eiginlega bara eins og allur annar tími. Allar árstíðir hafa eitthvað gott við sig. Það er helst veturinn sem mig vantar hér, það er snjórinn en það má alveg lifa án hans. Ég hef reynt að fara til Íslands til að fá snjó en eitthvað varð lítið úr því........allavega tvö síðustu jól! Svo þegar ég kem hingað heim 6.jan 2009 er allt á kafi, alveg 30 cm jafnfallinn snjór sem var þó nokkuð lengi á, vegna kulda. Sjáum til hvernig veturinn verður hér, enn nokkuð langt í hann og oft hefur september verið sólríkur og hlýr. Ekkert víst að haustið sé komið.

Á sunnudaginn reif ég mig upp og fór með strákana í hjólatúr. Mest allan tímann var ég með hjartað í buxunum.........þvílíkir villingar sem ég á, hjóla eins hratt og þeir geta, hvar sem er. Reyndar passa þeir sig við götur og stoppa alltaf við gönguljós. Þeir mega eiga það. Það var heldur mikil umferð þennan dag enda sveitastjórnarkosningar og fullt að fólki mætt í ráðhúsið til að fagna.........eða ekki. Við munum allavega hafa sama borgarstjóra áfram. Ágætt bara. Strákarnir voru orðnir þreyttir rúmlega sjö svo að ég hringdi í Seydi og lét hann ná í þá. Komum við á ísstaðnum góða fyrst og ég gúffaði í mig jógúrtís með rjóma. Má ekki vera of hollt, hehehe.

Æi, hef ekkert meira að segja. Er að setja vírusvara í tölvuna og ætla að fara að elda. Foreldrafundur í skólanum í kvöld. Ætla að senda Seydi, ef hann verður ekki búinn að vera eftir vinnuna. Ég fer þá bara eins og alltaf :)

Knús í hús.

Frídagur ofl.

2009-08-25T18:59:00.005+02:00

Í gær var verkstæðið lokað. Seydi fór með kunningja til Mílanó og kom ekki heim fyrr en seint um kvöldið. Of langt mál að skrifa útaf hverju hann fór, nenni því ekki. Ég notfærði mér því daginn til að hreyfa mig aðeins......ákvað að fara í hjólatúr um svæðið. Hjólaði framhjá maísökrum (sjá mynd), eplatrjám, villum og sveitasetrum. Þetta var fínasti túr enda veðrið fínt til hjólreiða, ekki of heitt og ekki of kalt.

Eftir túrinn renndi ég mér í bæinn, skipti auðvitað fyrst um föt. Langaði svo að finna mér skó, vantaði venjulega, svarta, gönguskó fyrir haustið/veturinn. Var orðin úrkula vonar að finna skó. En viti menn, í Deichmann fann ég þessa fínu skó og aðra til......(þeir voru á hálfvirði svo ég bara vaaaaaaaaarð að taka þá með).

Það var indælt að vera bara ein að rölta í bænum, ekkert nöldur frá strákunum um að fá þetta og hitt, fara heim eða geta ekki labbað meira. Þegar ég ætlaði svo að setjast niður á mexíkóskum stað til að snæða sitja ekki Sabine og Ricarda þar :) Ég vissi reyndar að þær yrðu í bænum en að við myndum hittast var ekkert víst. Þær voru á hraðferð til tannsa svo að við hittumst stutt en svo aftur um kvöldið. Ricarda kom til okkar seinni partinn og við löbbuðum í garðinn, kíktum á dýrin og á leikvöllinn. Heimsóttum Doris og Edgar (afa og ömmu Ricarda) um kvöldið þegar ég keyrði Ricarda "heim". Ég veit ekki hvenær ég mun sjá Ricarda mína næst en þökk sé facebook, get ég nokkurn veginn fylgst með henni úr fjarlægð. Hún og Sabine fljúga til Kanada á morgun enda skólar að byrja í næstu viku.

Í dag var fyrsti rigningardagurinn í nokkurn tíma. Ég klæddi mig aftur í gallabuxur og sokka eftir berfætta léttbuxna daga :) Á morgun er aftur spáð 27° hita og sól, sólin er reyndar komin og skín hérna inn um gluggann, eða á gardínurnar. Fyrsta haustlægðin er svo á leiðinni um helgina. Já haustið nálgast og nokkur laufblöð orðin gul/rauð.

Farið vel með ykkur og bestu kveðjur.

Heitur dagur

2009-08-20T20:03:00.002+02:00

Já þetta var heitur dagur í dag, hér er mynd sem sannar að hitinn fór í 38°!! Sem betur fer var rakinn ekki mikill og smá vindur svo að þetta var eiginlega bara þægilegt, þ.e. ef maður þurfti ekki að reyna á sig........

Ég skellti mér í sunda með gaurana eftir talkennsluna hjá Henrik. Vorum því ekki komin fyrr en að verða hálf fjögur og þá var enn röð við kassahúsið, ég bjóst sko ekki við því. Eins og sést á mynd vorum við ekki alveg ein í sundi.......

Seydi ætlaði að bjóða mér út að borða í hádeginu í dag en akkúrat þá komu nokkrir kúnnar og það var ekki hægt að láta þá bíða. Förum bara á morgun......vonandi :) Ætlum að prófa nýja kínverska staðinn í Dorsten.

Það fer ekki mikið fyrir svengju í dag, ákvað að gera bara boozt í kvöldmat. Setti í það bláber, hreina jógúrt, súrmjólk, frosin ber, appelsínusafa og smá Grenadine, já og ís. Ljúffengt.

Núna þessu fór allir opnir gluggar að lokast og opnast, kominn dragsúgur og kannski þrumuveður á leiðinni. Allavega orðið ansi hvasst úti. Væri ekki hissa á því enda er einhver kuldalægð á leiðinni og þegar hún hittir hitabylgjun....úff, þá verður RISA árekstur.

OK, ætla að halda áfram að horfa á HM í frjálsum og vona að strákarnir fari þokkalega snemma að sofa :)

Heimsókn

2009-08-17T15:42:00.003+02:00

Í gær fékk ég, já og við, góða heimsókn en Ricarda er í bænum og heimsótti okkur. Við höfum ekki sést síðan nóv. ´07. Við eyddum deginum mest heima en fórum líka í bæinn og Seydi pantaði auðvitað MEGA ís handa okkur. Hann var góður að vanda og það fannst geitungunum líka!!! Að lokum voru þeir orðnir um 10 sem voru að ergja okkur og eiginlega var erfitt að njóta íssins. Sumir geitunganna drukknuðu svo í eigin græðgi eða í bráðnuðum ísnum, gott á þá...

Fórum aðeins á leikvöllinn enda er veðrið eins og best gerist að sumri til. Um miðja viku er jafnvel spáð um og yfir 30°. Um næstu helgi er stefnan tekin á safn í Münster. Þar eru víst risaeðlur en það er draumur Julian að fara í þannig safn. Ætlum að taka Ricarda með :)

Fyrsti skóladagurinn hjá Julian gekk vel, að vakna var smá erfitt en hafðist þó. Ég hefði alveg viljað sofa aaaaaaaaaðeins lengur í morgun en svona er lífið. Hversdagsleikinn er tekinn við og rútínan er að mörgu leyti góð.

Horfði á frábært met í 100 m. hlaupi í gær! HM í frjálsum er í fullum gangi og oft í gangi á skjánum þessa dagana. Alltaf gaman að horfa á frjálsar.

Jæja, best að sjóða núðlur og hella tómatsúpunni frá í gær yfir og baka smá í ofni.

Hversdagskveðja

Nýr bloggstíll

2009-08-15T19:36:00.004+02:00

Frá og með núna ætlar ég að hafa annan brag á þessu blessaða bloggi. Ætla mér að taka mynd af einhverju merkilegu eða ómerkilegu og setja hér inn, skrifa eitthvað við myndinar, hvar hún er tekin osfrv. Auðvitað mun ég halda áfram að skrifa eitthvað rosa krassandi úr mínu lífi.........eða þannig.

Fyrsta myndin verður af mínum (ó)ektamanni, í óekta bol frá Tyrklandi :D Hann stóð sig eins og hetja við grillið á uppskeruhátíðinni í leikskólanum. Ég held að við séum rosa vinsæl þar, erum svo dugleg að hjálpa til við hitt og þetta, sérstaklega ég ;) Laga til eftir skemmtanir og svona, ég bakaði líka vöfflur í dag og við seldum alveg helling til að fá pening í foreldraráðskassann.

Veðrið var alveg geggjað, spurning um að setja inn mynd frá hátíðinni........ borgarstjórinn mætti m.a.s, afhverju veit ég ekki. Hann allavega dæmdi í leikinn sem Seydi spilaði á fótboltamótinu :)

Góða helgi

Komin heim

2009-08-11T19:50:00.002+02:00

Svo að sumir fari ekki að kvarta yfir bloggleysi og furðulegum titlum er best að skrifa nokkrar línur. Ég er sem sagt komin heim í Halterner Strasse, Seydi lasni sótti okkur á flugvöllinn, var að leggja bílnum þegar við komum út. Þurftum smá að hringjast á til að hann fyndi okkur. Hann sagði að við hefðum fundið lyktina af hvort öðru fyrst að við mættum á sama tíma, við vorum nefnilega á undan áætlun.........já, það er nú til líka! Veit ekki hvenær flugfélög fara að gefa upp réttan flugtíma til Íslands, hann er ekkert 3,5 tímar heldur rétt um 3 tímar en við vorum enn fljótari enda háloftin róleg og annað eins rólegt flug hef ég ekki upplifað. Strákarnir sváfu allan tímann eins og margir og ljósin voru slökkt. Verst var að hafa ekki mp3 spilara því ekki gat ég nú sofið frekar en fyrri daginn, reyndi alveg margar stellingar.

Það var gott að koma heim þrátt fyrir þreytu. Henrik svaf mest allan daginn og Julian fór mjög snemma í bólið. Ég fór smá í búð enda ísskápurinn tómur þar sem Seydi hafði ekki borðað neitt síðan á fimmtudaginn og legið í rúminu. Nú er búið að taka upp úr töskum, ganga frá (ekki töskunum samt) og koma sér í gírinn. Sváfum reyndar lengi í morgun og því fór Henrik ekki í leikskólann en við ætlum okkur að vakna tímanlega á morgun.

Ég mun kannski seinna fara út í ferðasöguna frá Íslandi en ekkert ítarlega þó. Veit bara að ég ætla EKKI að vera leið út í það sem ég gerði ekki eða fór ekki heldur njóta þess sem ég gerði og sá :)

Skjáumst

Farin í flug og komin á Frón, fer bráðum aftur í flug :)

2009-08-03T21:52:00.003+02:00

Unnur systir kvartaði yfir því að ég hefði ekkert bloggað, væri enn á leiðinni á flugvöllinn!
Ég er auðvitað löngu komin til Íslands og er að fara aftur eftir tæplega viku. Fer suður á föstudaginn og stefni að því að eyða helginni hjá Rakel litlu sys í borginni. Hef bara aldrei eytt neinum tíma þar að ráði, aldrei komið í Fjölskyldugarðinn, aldrei Þjóðminjasafnið, aldrei í Árbæjarsafn, aldrei, aldrei, aldrei. Hef reyndar komið í Smáralind og Kringluna, heppin ég. Er að reyna að dobbla mömmu til að koma með, fara í borgarferð þrátt fyrir handfötlun. Sjáum til. Kannski getur hún skellt sér á útsölu í IKEA? :)

Ég get ekki sagt að veðrið hafi verið mér hliðhollt......ó nei. Bara þessa daga á Snæfellsnesinu, þar var fínasta veður, heldur hvasst stundum. Sem betur fer lét sólin nú sjá sig á Mærudögum en vikuna þar á eftir var rigning.......dag eftir dag! Og mikið af henni. Ég ætla að vona að hitabylgjan í Þýskalandi standi fram yfir næstu helgi, þarf svo mikið á sól og hlýju að halda. Það er samt alltaf indælt að vera á Víkinni góðu. Er búin að fara í Mývó, Akureyri, Bárðardal. Labbað um bæinn ef veður leyfði, tekið nokkrar beygjur á bíl, farið í fjöruferð en mest bara verið heima. Stundum finnst mér enn vera svona 1980 og ég er 10 ára, minningarnar hellast yfir mann þegar ég hugsa til baka. Það er eins og tíminn standi í stað...........nema ég er ekki 10 ára og það er árið 2009!

Þetta er orðið gott, ætli ég bloggi nokkuð fyrr en ég kem heim aftur.

Eftir 2 sólarhringa...

2009-07-07T20:36:00.003+02:00

...verð ég mætt á flugvöllinn í Köln/Bonn, tilbúin að tékk mig inn í flugið til Íslands sem leggur (vonandi) af stað kl. 22:35. Spennan fer að aukast. Ég er reyndar ofur róleg í þetta skiptið. Er búin að pakka næstum því öllum sem á að fara með, bara nokkrar brækur og snyrtidót eftir, já og skór af strákunum. Það besta er að ég er ekki komin nema í 27 kíló! Hvernig er þetta hægt??? Ég er farin að halda að vigtin mín sé eitthvað biluð en það getur varla verið. Allavega er önnur taskan 14 kg og hin 13 kg. Allt í góðum málum bara.

Veðurspáin á Fróni er fín á næstunni, alltaf gaman að lenda í góðu veðri, nógu oft rigning í Keflavík! Hérna er veðrið sveiflukennt, sól, ský, rigning, þrumuveður og allt þar á milli.

Verð með aukabarn á morgun. Vinur Henriks langar voða að heimsækja hann en hann er að flytja til Bochum og skiptir því um leikskóla. Ekkert víst að þeir sjáist aftur á næstunni. Gaurinn mætir rúmlega 9 og verður allan daginn. Foreldrar hans ætla að mála nýju íbúðina í friði á meðan.

Þarf svo rooooosalega að þrífa gluggana hérna en ég nenni því eeeeeeeeeeeeeeekki. Ætla að láta það duga að þrífa puttaför að innan. Þarf líka að þrífa gólfið en ætla að gera það annað kvöld, já og ég þarf líka að þrífa þvottaloftið núna í júlí! Spurning um að gera það á fimmtudaginn.

Jarðarför Michaels Jacksons í dag, fer ekki framhjá neinum. Ég ætla samt ekki að horfa á hana í beinni, hef nú engan áhuga á því. Ætla að koma þreyttum gaurum í rúmið og horfa á spennuþætti.

Veit ekki hvort ég blogga meira áður en ég kem, örugglega ekki. Segi því bara, SJÁUMST.

9 dagar.....

2009-06-28T15:03:00.002+02:00

.....síðan að ég bloggaði síðast. Ekki alveg að standa mig. Enda er líka komið sumar og þá er tímanum frekar eytt í eitthvað annað en að sitja og blogga. Kíki nú samt mjög reglulega á facebook, held alltaf að ég sé að missa af einhverju........hvað það ætti svo sem að vera!

Fékk góða gesti á föstudagskvöldið en Hrafnhildur Jóna og famili komu við hjá okkur á leiðinni til Frakklands. Greyin lentu bæði í teppum í Danmörku og vinnusvæðum hérna á Þýs. Voru því seint á ferðinni en Julian og Henrik voru samt enn vakandi enda spenntir að hitta gestina. Henrik var búinn að spyrja ansi oft hvenær þau kæmi, hvað þau hétu nú aftur, hvað strákarnir væru gamlir osfrv. osfrv. :) Strákarnir okkar náðu vel saman og áttu góðar stundir á laugardeginum. Alltaf gaman að fá góða gesti.

Nú eru ekki 2 vikur í Íslandsferð. Allir orðnir spenntir. Nú er bara að muna að pakka ekki of miklu niður........Kannski mér takist það núna því að 1 taska má ALLS ekki vera meira en 20 kg. Þessi lággjaldaflugfélög eru miklu strangari en hin. Svo borgaði ég bara fyrir 2 töskur, sjáum til hvort það dugar, annars þarf ég að taka þá 3ju með og borga heilar 10 evrur fyrir hana, hvora leið. Samt sem áður voru þessi flugmiðar þó nokkuð mikið ódýrari en bæði Express og Icelandair.

Var að koma úr bænum en í dag var því fagnað að LOKSINS væri búið að ganga frá hringnum í kringum bæinn, þ.e. götunum. Þeim var lokað í dag og alls konar keppnir í gangi, m.a. línuskauta og hjóla. Allskonar básar voru fyrir framan ráðhúsið og fengum ýmsar auglýsingagjafir. Julian fékk að prófa eitthvað tölvuspil og við fengum okkur Bratwurst að borða. Veðrið var alveg fullkomið fyrir þessa skemmtun, hlýtt en engin sól og því enginn alveg að bráðna. Við tókum 1 hjólahring á götunni, það var gaman að upplifa bæinn frá götunni, ekki í bíl.

Þetta er bara orðið fínasta blogg. 3 dagar eftir í sumarfrí hjá strákunum. Vonandi verður veðrið gott á föstudaginn en þá stefnum við í skemmtigarðinn Ketteler Hof með Bärbel og Florian.

Góðar stundir

"Týndar" minningar

2009-06-19T18:29:00.003+02:00

Á dögum stafrænna myndavéla, netsins, gemsa ofl. tækja hugsa ég of hvernig það hefði verið ef þetta dót hefði verið til þegar ég var yngri. Af mér eru ekki til margar ljósmyndir, forláta vélin hennar mömmu var heillengi biluð og þá var ekkert verið að hlaupa út í búð og kaupa nýja. Það var ekki fyrr en ég keypti mér myndavél sjálf, fyrir blaðapeninga, sem farið var að taka myndir aftur. Ég keypti mér þessa forláta Kodak vél með ægilega löngu flassi sem sett var á. Rosalega var ég montin með vélina. Minnir að ég hafi verið 10 ára þegar ég keypti hana. Kassinn undan vélinni er enn til, inniheldur bréf frá dönskum vinkonum uppi á lofti á Garðarsbraut.

Stundum finnst mér leiðinlegt að eiga ekki til fleiri myndir af mér. Ekki eru heldur til videoupptökur af mér, eða okkur. Mér finnst myndir oft hjálpa til við að minnast hins og þessa. Oft finnst mér mín barnæska vera hulin einhverri dulu. Ég man nokkur atriðið en oft minnist ég þess best ef til eru myndir af því eins og bekkjarkvölds í 5.bekk, hjólreiðaferðar nokkura vinkvenna eða skvísumyndir af mér og Helgu Dóru úti á svölum en vélin hennar mömmu virkaði í einhvern tíma fyrir útimyndir, en flassið var ónýtt, áður en hún gaf alveg upp öndina.

Samt er ég líka fegin að vera ekki unglingur í dag og eiga von á einhverjum "pínlegum" myndum af mér á netið! Netið gleymir engu.........Hérna í Þýsklandi var að byrja áróður til að fá unglinga til að hugsa sig tvisvar um áður en þau setja myndir og prívat upplýsingar um sig á netið. Reyndar þarf ekkert bara unglinga til að fólk setji inn meira en lítið "pínlegar" myndir á netið, ó nei. En hvað er svo sem pínlegt í dag??? Oft virðast allar hömlur vera fallnar (er hægt að segja þetta svona?) Þið vitið hvað ég meina ;)

Ef einhver þarna úti á myndir af minni barnæsku má sá hinn sami alveg hafa samband :) Hvar ætli upptökur af sýningu í bíóinu séu? Af hinum stórkostlega dansi okkar bekkjarsystra í hvítum minipilsum! Ég í hvítu minipilsi.........úff. Kannski mig langi ekkert að sjá þessa upptöku. Eða þegar ég lék Boggu leikfimiskennara??? Held að þetta séu einu upptökurnar af mér í minni æsku.

Kannski er bara ágætt að æskan sé hulin slæðu..............

Góða helgi

Leikhúsferð

2009-06-14T10:56:00.004+02:00

Jæja, skellti mér á sýningu Sokkabandsins "Here and Now" í gær. Bauð Bärbel vinkonu með. Var smá efins um að taka hana með eftir gagnrýni einhvers á sýningunni! Hún var vægast sagt léleg.
Hvað um það, við mætum á svæðið, bíðum úti enda veðrið indælt. Ég sé þá skutlu í mjög svo íslenskum stíl labba þarna um og heyri svo "já já já" muldrað......aha, greinilega íslensk. Hún kemur svo til okkar og spyr á hvaða sýningu við séum að fara. Við segjum það og spyr hvort að hún sé ekki íslensk. Jú, vá, ert þú líka íslensk :) Hún bauð okkur þar með í "VIP" plássið, látið var vita að Íslendingur væri að koma upp og teknar voru myndir af okkur og einnig á filmu í heimildarmynd. Fengum svo freyðivín og gátum staðið á svölunum og horft yfir lýðinn, hehe. Nokkrir bættust við og þarna höfðum við góða yfirsýn yfir svæðið þegar "limman" kom með Sokkabandið. Þeim var sagt að Ísl. væri á svæðinu og Elma Lísa sagði "áttu heima hér?" " og ertu að koma á sýningu?" "Flott". Áfram Ísland, Áfram Ísland, Áfram Ísland glumdi í leikhúsinu :)

Jæja, við löbbuðum inn og sýningin hófst. Ef ég hefði vitað að ALLT sem er á sýningunni er tekið af netinu hefði ég skilið allt betur. Því miður fórst það að segja það í upplýsingum um sýninguna. Það sagði mér önnur aðstoðarkonan fyrir utan en hún kom til að spyrja hvernig okkur hefði fundist. Við Bärbel skemmtum okkur vel og sjáum ekki eftir þessu kvöldi. Fengum okkur nokkra öllara og hlustuðum á Leningrad Cowboys sem voru með útitónleika fyrir neðan leikhúsið. Seinna var svæði svo opnað og við kíktum aðeins en komumst nú ekki langt þar sem fullt var af fólki.

Ég var svo komin heim rúmlega tíu en sýningin byrjaði kl. 18. Fékk mér jarðarber með rjóma fyrir svefninn. Vaknaði illa um þrjúleytið, einhverjir gaurar görguðu hérna úti en glugginn minn var smá opinn. Úff hvað ég hrökk við........hélt ég myndi ekki sofna aftur en sem betur fer gerði ég það nú.

Ég steingleymdi að taka þvott úr vélinni í gær og fór því upp í morgun og náði í hann og hengdi út. Allt kyrrt og hljótt, sólin komin upp og enginn vindur. Kyrrð og ró........Eitthvað er að þykkna upp, jafnvel spáð þrumuveðri í dag. Ekkert planað hjá okkur. Allt opið.

Sjáumst

Stutt blogg úr vinnunni

2009-06-10T10:13:00.002+02:00

Sit hér ein, búin að skúra skrifstofuna og baðið, yfirmaðurinn er enn ókominn, er eitthvað að erindast. Enginn kúnni kominn enn en það glæðist alltaf úr svona upp úr 11.........og langt fram á kvöld. Seydi var reyndar kominn heim rúmlega átta í gærkvöld! Það er bara snemma.

Er að hlusta á Rás 2 og koma ekki hálfvitarnir :) Oftast hlusta ég nú á "lokal" útvarpsstöðina en í dag ákvað ég að hlusta á íslenskt. Er annars voða löt við að horfa á sjónvarp og hlusta á útvarp frá Fróni. Læt það duga að kíkja á netsíður blaðanna. Reyndar eru flestar fréttir um ríkisstjórnina, kreppuna og annað í þeim dúr. Ekki alveg uppáhalds fréttirnar! En sjálfsagt nauðsynlegar. Ég á það til að kíkja á "heitar umræður" á mbl.is. Sumt er áhugavert, annað ekki, enn annað fyndið eða fáránlegt..........það sem sumt fólk nennir að tuða á blogginu, eða kommenta, úff, púff.

Sumarið er enn í fríi, júníveðrið var í apríl og núna er aprílveður. Sól, rigning, þrumur, vindur, allt til skiptist. Svo er spáð um 30° hita um helgina. Kannski ég geti þá farið í fyrstu sundferðina?! Ná í smá lit, annars verð ég bara að notast við brúnkukrem........þarf líka að ná af mér 3 kílóum. Þyngist alltaf um 3-4 kg. þegar ég er á Íslandi og þá er best að taka þau bara af áður en ég legg í´ann. Það tókst um jólin en þá var ég líka nýbúin að vera með magapínu og gat ekkert borðað í 2 daga. Ég ætti kannski að fara í jarðarberjamegrun, borða ekkert nema jarðarber, kannski kirsuber líka. Er samt hrædd um að fá þá ógeð á annars geggjuðum jarðarberjum :) Þarf að tína meira til að búa til marmelaði handa mömmu og kannski fleirum. Er nokkuð bannað að flytja inn marmelaði?

Helgin byrjar í dag. Á morgun er frídagur, föstudagur skólafrí og mánudagurinn líka. Spurning hvort ég fari samt ekki með Henrik í leikskólann en hans leikskóli verður opinn á mán. Þá getum við Julian gert eitthvað sniðugt saman. Sjáum til hvernig stemmingin verður.

Farið vel með ykkur og njótið dagsins í dag og allra daga :)

Pirringur

2009-06-05T09:48:00.003+02:00

Nú er ég orðin ansi þreytt á þessu verkfalli fóstranna í leikskólanum........enginn leikskóli þessa vikuna og svo á víst að opna í 1 dag í næstu viku en halda svo áfram að "stræka" (er ekki til eitthvað orð yfir þetta á íslensku?). Henrik verður því að druslast með mér í vinnuna, dag eftir dag. Hann er kominn á það stig að langa bara ekkert í leikskólann aftur. Ég veit ekki hvað fólk gerir sem virkilega þarf á pössun að halda, allan daginn kannski. Heyrði í 2 mömmum í gær, þær höfðu ekki lengur "samúð" með fóstrunum. Önnur þeirra býr rétt hjá leikskólanum, keyrir þar framhjá með syni sína til að fara með þá í pössun, þá sitja fóstrurnar þar úti og drekka kaffi. Tóku sér víst pásu í kaffidrykkju í gær og þrömmuði í bæinn til að mótmæla. Nei, ég er búin að fá nóg eins og tveir aðrir foreldra sem skrifuðu lesendabréf í blaðið í morgun. Alltaf bara fjallað um hlið fóstranna, ekki foreldra og hvað þá barnanna. Sumir foreldrar vilja fá gjöldin endurgreitt. Ég var t.d. líka búin að borga trommukúrs fyrir Henrik. Hann fór einu sinni. Það er reyndar hollvinafélagið sem er með þennan kúrs en þar sem leikskólinn er lokaður er ekki hægt að halda hann. Við í foreldraráði ætlum að hittast á mánudagskvöldið, ræða málin, kannski er hægt að safna undirskriftum, heyra hvað aðrir foreldrar segja osfrv.

Það er sem sagt allsherjar pirringur í gangi hérna.......ég orðin þreytt á að hafa Henrik með mér allan daginn, hann orðinn þreyttur á að fara á verkstæðið og annað sem ég þarf að gera, Julian orðinn þreyttur á pirringnum í okkur og bræður gera mikið af því að kýta og rífast. Nú segi ég STOPP og ætla að hætta að pirrast..........annars verður þetta alger vítahringur. Helgin framundan, bæjarhátíð í Dorsten. Kannski gaman að kíkja þangað ef veður leyfir. Ekki mjög álitlegt þessa dagana, nema það hangir nokkurn vegin þurrt. Í morgun var 10° hiti en eitthvað eru skýin að hreyfa sig og það glittir í bláan himinn. Vonandi verður þurrt í dag en í gæslunni í skólanum er skemmtidagskrá. Það á að grilla, hoppukastali á staðnum ofl. Ég ætla að mæta fyrr til að hjálpa við að undirbúa. Seydi ætlar að reyna að hætta fyrr og mæta líka, spurning hvernig það fer. Ég var á leiðinni út úr dyrunum áðan þegar hann hringir og segir mér að fara ekki af stað, ég verði að ná í varahlut hjá Ford hér í RE, klukkan 11 og koma með hann. Borgar sig því ekki að keyra til Dorsten og aftur til baka. Því sit ég hér og blogga. Henrik litar á meðan.

Óska góðrar helgar.

Helgarferð ofl.

2009-06-02T12:40:00.002+02:00

Það var gott að sofa í eigin rúmi í nótt eftir 2 nætur á loftrúmi sem lak.......við þurftum að pumpa tvisvar í fyrrinótt með tilheyrandi hávaða, annars hefðum við legið á gólfinu með rassinn eins og fyrri nóttina :) En ferðin til Germersheim var í alla aðra staði skemmtileg. Við gistum hjá frænda Seydi og konu hans sem eiga 2 lítil börn. Strákurinn þeirra er alger snillingur, er rétt orðin 3ja ára og bara alger gullmoli. Hann alveg dýrkaði Julian enda á hann ekkert nema frænkur og 1 systur. Gaman að fá svona stóra frændur í heimsókn.

Ég gerði lítið annað en að láta þjóna mér, þyngdist um allavega 1 kíló enda síétandi. Byrjuðum á að fara í lítið tívolí á laugardagskvöldið. Ég fékk marbletti á hnén eftir klessubílana..........þessir ansans klessubílar! Fórum að tína jarðarber á sunnudaginn, heil 9 kíló! Um kvöldið var svo tyrkneskt brúðkaup hjá einhverjum sem kemur frá sama þorpi og Seydi í Tyrklandi. Vorum ekkert boðin en það er óþarfi í tyrkneskum brúðkaupum.......Heimsóttum svo frænku Seydi (tengdapabbi og hún eru bræðrabörn) í gær og hún útbjó risa morgunverð, svo var nammi, kirsuber, ostakaka ofl. gotterí. Hún alveg dýrkar Henrik, svona svipað og Unnur systir. Finnst hann algert krútt. Enduðum ferðina hjá hálfbróður tengdamömmu í smá snakki áður en við lögðum af stað. Vorum ekki nema 3 tíma á leiðinni enda engin teppa og ekki mikil umferð.

Nú er að þvo þvott, 1 vél búin, önnur að þvo. Sólin skín og spáð yfir 20°. Þurfum að fara í bókasafnið á eftir. Kannski í bíó, sjáum til.

Föstudagskvöld

2009-05-29T20:23:00.002+02:00

Ég sit hér við tölvuna með örbylgjunúðlurétt á diski og hvítvín í glasi. Vínið er mjög fínt enda með smá kolsýru, eitthvað portúgalskt (Portico) sem ég keypti í Aldi. Ætla að kaupa meira við tækifæri. Strákarnir eru komnir inn í rúmið mitt til að horfa á föstudags barnamyndina. Allir eru þreyttir eftir allt síðdegið á leikvellinum í garðinum. Seydi er kominn af stað heim, þurfti bara að kíkja við hjá kunningja, spurning hvort að hann ílengist þar.

Löööööng helgi framundan en á þri. er enginn skóli og enginn leikskóli heldur.......alla vikuna, áfram verkfall. Henrik fer sem sagt ekki í leikskólann fyrr en hvað, 8. júní! Þá er bara um mánuður í heimferð. Indælt.

Við förum (sennilega) af stað til Germersheim á morgun. Ef að Seydi hefur ekki eitthvað að gera á verkstæðinu. Sjáum bara til, ekkert stress í gangi. Ég er nú nógu rugluð fyrir, þarf ekki á stressi að halda...... Ég ath. 100 sinnum á dag hvort að peningaveskið mitt sé örugglega í veskinu, hvort að veskið sé örugglega í bílnum osfrv. Var svo stressuð útaf gargi í Henrik í gær að ég keyrði utan í hliðarstólpann á verkstæðinu! RISA rispa fyrir ofan dekkið. Anda rólega er mottóið og ég gerði það í dag. Naut þess að gera ekki neitt, nema fylgjast með gaurunum á leikvellinum, og spjalla við Bärbel. Gat loksins farið ein í vinnuna í morgun, ekkert verkfall í dag. Gott að "losna við" hávaðamengun annað slagið.......nema þá hávaða í músíkinni í útvarpinu en það er engin mengun :)

Góða helgi.

Hitamet og annað

2009-05-25T20:31:00.008+02:00

Hérna eru hitametin slegin hvað eftir annað, reyndar ekki alveg hjá mér, heldur í S-Þýskalandi. Mér fannst samt alveg nógu heitt í dag, fór í 28° hjá mér og sólin skein. Það dró fyrir sólu seinni partinn og ég var viss um að nú kæmi óveður en ekkert gerist enn og það er aftur orðið þokkalega bjart. Í gær var yndislegt veður, 25° hiti og blár himinn allan daginn :) Ég hjólaði með strákana í bæinn. Við fengum okkur góðgæti á ísstaðnum góða, litum á leikvöllinn og garðinn bakvið ráðhúsið. Hjóluðum svo heim framhjá lestar/strætóstöðinni og keyptum drykki í sjoppunni þar.

Ég var nýkomin inn í kjallara þegar Seydi hringir og spyr hvort að hann eigi að taka strákana með í garð í Dortmund. Hann var nýkomin þaðan að kaupa bíl og langaði að kíkja aftur. Ég var fegin að fá smá frið og settist því út á svalir og náði að lesa helling í "Sér grefur gröf" áður en að innrásin kom. Seydi kom ekki bara með strákana heldur einn frænda og kærustu hans. Þau kíktu bara við áður en þau lögðu í hann til Germersheim. Ég henti kjúlla á grillið og þau fóru södd heim, Seydi hafði líka komið við á Subway á leiðinni heim.

Ég hætti að vinna fyrr í dag, kláraði bókina enda þurfti ég að skila henni í dag. Nennti ekki að framlengja útaf nokkrum blaðsíðum. Ákvað að leigja enga bók í þetta skiptið heldur lesa eitthvað af bókunum sem ég hef fengið í gjöf og byrjað á en ekki klárað........

Henrik heimsótti Arne vin sinn í dag og ég fór með Julian til læknis á meðan. Hann er með fimmtu veikina en ég hélt að hann væri með ofnæmi fyrir jarðarberjum. Julian var glaður að svo var ekki enda elskar hann jarðarber og við ætlum að tína í þessari viku. Ætli ég reyni ekki að búa til marmelaði líka. Ég sat smá hjá mömmu Arne í dag og við spjölluðum á meðan að krakkarnir léku en systir Arne er jafngömul Julian og hún var með heimsókn líka. Það var sem sagt fjör í garðinum hjá þeim.

Á morgun, miðviku- og fimmtudag er verkfall í leikskólanum. Sumir leikskólar voru í verkfalli í síðustu viku en nú er komið að okkar. Ég tek Henrik bara með í vinnuna. Á miðvikudaginn á hann svo að mæta aftur á barnaspítalann í talpróf. Íþróttavikan heldur áfram hjá Julian og þau eiga að mæta í íþróttafötum á mið.- og fimmtud. Svo er verðlaunaafhending á föstudaginn.

Við ætlum að heimsækja ættingja Seydi í Germersheim um Hvítasunnuna. Nóg af frídögum þessar vikurnar. Í þarnæstu viku er einhver kirkjunnar frídagur á fimmtudeginum + frí í skóla á fös. Endalaus frí fram að sumarfríinu sem byrjar 2.7.

Oh, ég er enn búin að blogga langloku......kveðja

Eurovision búið

2009-05-18T18:28:00.003+02:00

Og Norge malaði þessa keppni, ekki hægt að segja annað. Það var engin spenna í atkvæðagreiðslunni, bara alls engin, nema kannski um 2-4 sætið. Hjá mér voru nokkrir ættingjar Seydi mættir til að fara í brúðkaup og komu svo til mín til að horfa á Júró. Það var því keppni hérna og ég vann þá keppni auðvitað því að Ísland varð í 2.sæti en Tyrkland í því 4. (held ég). Ég leit á úrslitin frá forkeppnunum, þar voru Ísland og Norge nr. 1 og Tyrkland og Aserbaídjan nr.2, og þannig fóru þessi leikar. "The BIG 4" höfðu ekkert í okkur að gera.......Bretland komst næst því og Frakkland fékk alveg ótrúlega mörg stig, ég sofnaði næstum því yfir þessu ofur leiðinlega lagi.

En nú er þetta búið og Eurovision verður víst í Noregi á næsta ári. Ég er búin að lofa Hjálmari bróður að koma þangað. Hann og Unnur ætla víst að fara. Ætli maður verði ekki að kaupa miða núna? Það væri nú gaman að skreppa til Norge aftur, hef ekki komið þangað síðan 1993! Mig var nú samt búið að dreyma um að skreppa til Chicago í maí á næsta ári........hef nú ekki komið til USA síðan 1988!!! Það er ansi langt síðan, alveg heil mannsævi.

Nú er brúðkaup Ibo mágs búið. Herlegheitin voru í gær og tókst víst vel og hann og Seydi voru allavega sáttir í 1 dag. Þeir eru sko ekki búnir að talast við í nokkur ár......rifust útaf einhverjum smámunum. Ibo er þverhaus, hefur ALLTAF rétt fyrir sér, lætur aldrei undan og hrokinn lekur af honum. En konan hans er yndisleg og mig langaði mest í þetta brúðkaup til að gleðja hana.
Fór í kjól og alles.....keypti mér sjal við og var bara alger pæja. Kjóllinn er 11 ára gamall, jólakjóll frá 1998. Ég hef ekki notað hann síðan minnir mig. Fer nú ekki oft í síðkjóla. Gleymdi hins vegar að taka mynd af mér. Þið verðið bara að ímynda ykkur hvað ég var mikil pæja, hahahaha.

Seydi varð laus við nokkur hundruð evrur í gær.......þurfti að "borga" brúðina út. Farið er á heimili foreldra hennar (sem hún býr auðvitað ennþá) og náð í hana, hún er borguð út. Þar sem Seydi á mestan peninginn, fékk hann þann heiður. Svo fengu þau 1000 Evrur í gjöf, plús 100 sem Julian lét þau hafa (fékk hjá pabba sínum). Eins gott að ég var búin að borga miðana heim. Seydi gæti sagt, nei vina, þú getur ekki farið heim í sumar, ég hef ekki efni á að borga þér laun! Neiiiiii grín.

Það er eitthvað svo mikið um að vera þessa dagana. Íþróttavikur í skólanum, frídagur á fimmtudag, engin skóli og leikskóli á föstudag. Á síðasta föstudag keyrði ég Henrik og aðra stelpu í leikhús í suðurbæinn en allir krakkar af leikskólanum, eldri en 4ra ára, fóru að sjá "Froskakonungurinn". Svo var þetta brúðkaup, þar á undan var "gæsakvöld" á föstudagskvöldið. Eurovision tók sinn toll líka en það var bara gaman. Ég fór til tannsa og sárið eftir endajaxlinn grær vel. Fer aftur á morgun til að láta líta á framtennurnar. Mér finnst vanta smá neðan á þær, spurning um að fylla smá. Fyrir utan þetta kemur þetta hversdagslega, þvo þvott, ryksuga, laga til, sækja strákana í skóla og leikskóla, talkennsla já og að vinna. Nóg að gera.

Læt þetta líka duga núna. Er að vona að strákarnir sofni snemma í kvöld en við komum heim um miðnætti í gær og þeir þurftu auðvitað að vakna snemma í morgun. Sérstaklega Julian en Henrik getur sofið aðeins lengur. Julian var svo þreyttur að hann sagðist ætla að eyðileggja skólann!

Lifið heil en ekki í pörtum.

Eurovision nálgast

2009-05-11T18:43:00.003+02:00

Allir Eurovision aðdáendur komnir í stuð er það ekki? Unnur systir er örugglega ekki viðræðuhæf þessa vikuna ;) Eftir nokkra leit á netinu komst ég að því að Þýskaland sýnir fyrri undankeppnina beint, sem betur fer. Ég fór því að leita á hvaða stöð og fann það loksins, á Phoenix.........einhver stöð sem ég horfi mjög sjaldan á enda oft pólitík og annað "áhugavert". En ég get þá vonandi hringt fyrir Ísland og Tyrkland. Það gat ég ekki í fyrra þar sem Þýskaland fékk ekki kvöldið sem Ísland tók þátt í. Mig minnir að ég hafi horft á þetta beint á einhverri erlendri stöð, jafnvel þessari hollensku eða frönsku/svissnesku. Get þá kannski horft á seinni undankeppnina þar.

Ég hef svona rennt yfir öll lögin. Mörg voru nokkuð góð bara, sum alger hörmung. Tek það fram að þetta er mín skoðun, enda mitt blogg ;) Við fyrstu hlustun fannst mér Azerbadjan, Finnland, Portúgal, Andorra og auðvitað Ísland og Tyrkland flott. Man ekki eftir fleirum......verð eiginlega að horfa á þetta aftur! Man samt að mér fannst Króatía og Þýskaland hörmung. Holland er náttúrulega bara fyndið, mamma hlýtur að fíla þá. Svona ekta slagari. Mér finnst Svíþjóð slakt.......alltaf sami stíll á þessu hjá þeim.

Það er varla hægt að spá um úrslit. Flestir eru að heyra (og sjá) þessi lög í allra 1.skipti. Ekki búnir að horfa á þau 100 sinnum eða heyra. Hérna t.d. eru lögin ekki einu sinni spiluð í útvarpi, ég hef allavega ekki heyrt neitt, ekki einu sinni Þýskaland. Áhuginn hér er bara bundið við vissan hóp og hann er nú ekki stór. Ég held að framkoma og "live" söngur á úrslitakvöldunum skipti miklu máli. Vinningslagið þarf að segja "búmm" til að fólk hringi. Kannski ekki alveg í ár þar sem dómnefnd mun aftur taka völdin, allavega 50% :) Sjáum til hvernig það fer.

Ætli ég sé búin að skrifa nóg til að þessi ógeðslega fluga fari útaf síðunni.....get nú líka alveg tekið hana en þá myndi bloggið missa "pointið".

Átti fínan mæðradag í gær. Svaf til 9:20, borðaði morgunmat sem Seydi tók að mestu til, spjallaði við eigin móður á msn, fékk kort frá Julian, sem hann hafði gert í skólanu og æðislegan blómvönd þegar Seydi og Julian komu heim úr boltanum. Vafraði svo um á netinu og skellti á smurða tertu með rækjusalati, meðan að Seydi hvíldi sig en sendi hann svo út til tengdó með strákana. Þau fóru svo að borða ís en ég vildi frekar sitja EIN heima og lesa bók á svölunum enda 23° hiti og sól. Indælt.

Friðurinn var svo úti þegar liðið kom og tengdamamma skilin hér eftir......hún var þreytt, alltaf voða þreytt greyið konan. Ég breiddi því bara teppi á hana og hún sofnaði hérna í sófanum. Ekki getum við spjallað mikið saman þar sem þýskan hennar er mjög svo takmörkuð og tyrkneskan mín arfa slök. Strákarnir tóku smá rimmu um kvöldið. Eru voðalega mikið fyrir það þessa dagana, keppast um allt, rífast um allt en þess á milli er leikið sér, spjalla og hlegið!!! Ég verð bara að halda ró minni til að þetta verði ekki vandamál. Það var smá erfitt síðustu daga enda Rósa frænka í heimsókn..........ég sem trúði því aldrei að hún hefði svona slæm áhrif á mig :)
Þetta fékk ég allt. Föndruð kort frá strákunum (Henrik vinstra megin og Julian hægra megin) og maríubjöllu frá Julian og maríbjöllur á grasi frá Henrik. Hann hafði "gleymt" að mála þær í leikskólanum og reddaði því í dag :)

Góða Júróviku

Hrollur

2009-05-05T17:31:00.004+02:00

Ég kem heim úr vinnunni í dag, búin að fara í bankann, ná í Henrik á leikskólann og versla smá.... opna hurðina og hrekk við.........á baðherbergisteppinu (baðið er beint á móti útidyrunum) situr þessi líka hlussu fluga! Aldrei séð svona stóra flugu, jú fyrir utan "Libelle" (Damla). Úff, hvað geri ég nú, hún virtist nokkuð róleg bara svo ég náði í glas.....hikaði smá en tókst að setja glasið yfir hlussuna. Fer svo með teppið út á svalir, hlussan í glasinu og ég sleppti........hjúkkit, hún gat flogið. Vona að ég sjái hana aldrei aftur! Hún var örugglega meira en 3 cm á lengd. Fór á netið og gúgglaði. Held að þetta sé rétta flugan "Hornisse" á þýsku, hornet á ensku. Úff, fæ enn hroll.

Jæja, þá er ég loksins búin að kaupa miða heim. Alltaf sömu vandræðin á mér. Spurning um að ná í gott verð, snýst allt um það enda margir flugvellir og flugfélög í boði. Ódýrast var að að kaupa miða með Germanwings frá Köln/Bonn. Alveg 200 Evrum ódýrara en Express frá Eindhoven. Ég nenni sko ekki að keyra til Frankfurt/Hahn til að fljúga með þeim heldur, kostaði líka 100 € meira en mínir miðar. Gott mál allt saman. Það góða við Germanwings er líka að þetta eru kvöld/næturflug. Ég þoli EKKI að vakna um miðja nótt til að fljúga, alveg hrikalega pirrandi. Ég flýg klukkan 22:35 frá Köln og lendi rúmlega miðnætti 10.7. Bruna beint í sumarbústað daginn eftir og verð þar í viku. Kem svo á Víkina og verð á landinu til 10.8.
Oh hvað það er gott að vera búin að ákveða sig :)

SJÁUMST